ຂ່າວຫຼ້າສຸດ

ECB ຮຽກຮ້ອງ​ໃຫ້​ເອີ​ຣົບ​ສ້າງຕັ້ງ​ອົງການ​ຕ້ານ​ການ​ຟອກ​ເງິນ

166 14 ກ.ຍ. 2018 ຂ່າວຕ່າງປະເທດ
ECB ຮຽກຮ້ອງ​ໃຫ້​ເອີ​ຣົບ​ສ້າງຕັ້ງ​ອົງການ​ຕ້ານ​ການ​ຟອກ​ເງິນ

    ທ່ານ ເບ​ໂນ​ອິດ  ໂຄ​ເອີ ສະມາຊິກ​ໃນ​ຄະນະ​ນຳ​ຂອງ​ທະນາຄານ​ກາງ​ເອີ​ຣົບ (ECB) ກ່າວ​ເມື່ອ​ບໍ່​ດົນ​ມາ​ນີ້​ວ່າ ເອີ​ຣົບ​ຄວນ​ມີ​ອົງການ​ຮ່ວມ ກ່ຽວ​ກັບ​ການ​ຕ້ານ​ການ​ຟອກ​ເງິນ  ຫຼັງ​ຈາກ​ທີ່​ເກີດ​ຫຼາຍ​ເລື່ອງ​ຢູ່​ໃນ​ລະບົບ​ທະນາຄານ ຂອງ​ບັນດາ​ປະເທດ​ສະມາຊິກ ສະຫະພາບ​ເອີ​ຣົບ  (EU) ທີ່​ເປັນ​ການ​ໃຫ້​ເຫັນ​ເຖິງ​ຊ່ອງ​ຫວ່າງ ໃນ​ການ​ສະກັດ​ກັ້ນ​ອາ​ສະ​ຍາ​ກຳ​ດ້ານ​ການ​ເງິນ.

    ທ່ານ ໂຄ​ເອີ ກ່າວ​ຫຼັງ​ການ​ປະຊຸມ​ກັບ​ບັນດາ​ລັດຖະມົນຕີ​ການ​ເງິນ  ຂອງ​ເຂດ​ໃຊ້​ເງິນ​ເອ​ໂຣ (Eurozone) ຊຶ່ງ​ຈັດ​ຂຶ້ນ​ທີ່​ນະຄອນຫຼວງ​ວຽນ ຂອງ​ປະເທດ ໂອ​ຕະ​ຣິດ ວ່າ  ECB ໃຫ້ການ​ສະໜັບສະໜູນ​ຕໍ່​ທຸກໆ​ແນວ​ຄວາມ​ຄິດ​ລິ​ເລີ່ມ ທີ່​ເປັນ​ການ​ນຳໄປ​ສູ່​ວິທີ​ການ​ແກ້​ໄຂ ໃນ​ການ​ເພີ່ມ​ທະວີ​ການ​ປະສານ​ສົມທົບ ແລະ​ກົມກຽວ ເພື່ອ​ຮັບ​ມື​ກັບ​ໄພ​ຟອກ​ເງິນ ແລະ ຕາມ​ເງື່ອນໄຂ​ອຸດົມ​ການ​ແລ້ວ ກໍ​ແມ່ນ​ນີ້​ຈະ​ເປັນ​ອົງການ​ຮ່ວມ ກ່ຽວ​ກັບ​ການ​ຕ້ານ ແລະ​ປ້ອງ​ກັນ​ການ​ຟອກ​ເງິນ​ຂອງ​ເອີ​ຣົບ.

    ແນວ​ຄວາມ​ຄິດ ກ່ຽວ​ກັບ​ການ​ສ້າງຕັ້ງ​ອົງການ​ຄື​ດັ່ງກ່າວ  ກໍ​ໄດ້​ເວົ້າ​ເຖິງ ຢູ່​ໃນ​ແຜນການ​ເບື້ອງ​ຕົ້ນ​ສະບັບ​ໜຶ່ງ ຊຶ່ງ​ບັນດາ​ນັກ​ຄຸ້ມ​ຄອງ​ຂອງ EU ນຳ​ອອກ​ມາ​ເມື່ອ​ບໍ່​ດົນ​ມາ​ນີ້ ເພື່ອ​ເພີ່ມ​ທະວີ​ຄວາມ​ສາມາດ​ໃນ​ການ​ປ້ອງ​ກັນ ແລະ ຕ້ານ​ໄພ​ຟອກ​ເງິນ​ຂອງ EU.  ແຜນການ​ດັ່ງກ່າວ​ໄດ້​ຮ່າງ​ເຖິງ​ເລື່ອງ​ທີ່​ສົງ​ໃສ ກ່ຽວ​ກັບ​ໄພ​ຟອກ​ເງິນ​ຢູ່​ໃນ​ບັນດາ​ທະນາຄານ​ຢູ່​ໃນ  ມານ​ຕາ ລັດ​ເວຍ ເອ​​ສ​ໂຕ​ເນຍ ແລະ ດານ​ມາກ ແລະ ​ກ່ອນ​ທີ່​ທະນາຄານ ING (ໃນ​ໂຮນ​ລັງ) ເຫັນ​ດີ​ຈ່າຍ​ເງິນ​ຄ່າ​ປັບ​ໃໝ​ໄປ​ຫວ່າງ​ບໍ່​ດົນ​ມາ​ນີ້  ເພາະວ່າ​ບໍ່​ສະກັດ​ກັ້ນ​ການ​ຟອກ​ເງິນ​ໄດ້.

 

ຂ່າວທີ່ກ່ຽວຂ້ອງ