ຂ່າວຫຼ້າສຸດ

ປາກງື່ມ ເອົາໃຈໃສ່ກວດ-ປິ່ນປົວພະຍາດ ໃຫ້ຜູ້ໄດ້ຮັບຜົນກະທົບຈາກໄພນ້ຳຖ້ວມ

112 14 ກ.ຍ. 2018 ຂ່າວໜ້າ​ໜຶ່ງ

    ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ (ນວ) ເປັນ​ເມືອງ​ໜຶ່ງ​ທີ່​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ງື່ມ​ທີ່​ເພີ່ມ​ຂຶ້ນ​ສູງ ແລະ ໄຫຼ​ເຂົ້າ​ຖ້ວມ 20 ບ້ານ ສົ່ງ​ຜົນ​ໃຫ້​ປະ­ຊາ­ຊົນ​ໄດ້​ຮັບ​ຜົນ​ກະ­ທົບ​ທາງ​ດ້ານ​ສຸ­ຂະ­ພາບ ສະ­ນັ້ນ ຫ້ອງ­ການ​ສາ­ທາ­ລະ­ນະ​ສຸກ​ເມືອງ ຈຶ່ງ​ໄດ້​ເລີ່ມ​ລົງ​ກວດ ແລະ ປິ່ນ­ປົວ​ພະ­ຍາດ​ປະ­ຊາ­ຊົນ​ຢ່າງ​ທັນ​ການ ເພື່ອ​ຕ້ານ ແລະ ປ້ອງ​ກັນ​ພະ­ຍາດ​ທີ່​ເກີດ​ຂຶ້ນ​ມາ​ກັບ​ນ້ຳ​ຖ້ວມ.

    ທ່ານ ຄຳ​ຫຼ້າ ເພັດ​ລາ​ວັນ ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ ເມືອງ​ປາກ​ງື່ມ ໃຫ້​ສຳ­ພາດ​ວັນ​ທີ 13 ກັນ­ຍາ 2018 ວ່າ: ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ປາກ​ງື່ມ ໄດ້​ແຕ່ງ­ຕັ້ງ​ຄະ­ນະ​ແພດ 6 ຄະ­ນະ ລົງ​ປະ­ຈຳ­ການ​ບໍ­ລິ­ການ​ກວດ​ສຸ­ຂະ­ພາບ​ໃຫ້​ປະ­ຊາ­ຊົນ ຜູ້​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ແຕ່​ວັນ​ທີ 23 ສິງ­ຫາ 2018 ເປັນ­ຕົ້ນ​ມາ ເຊິ່ງ​ມາ​ຮອດ​ປັດ­ຈຸ­ບັນ ສາ­ມາດ​ກວດ​ສຸ­ຂະ­ພາບ ແລະ ປິ່ນ­ປົວ​ພະ­ຍາດ​ໄດ້ 20 ບ້ານ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ໃນ​ນີ້ ພະ­ຍາດ​ທີ່​ພົບ​ຫຼາຍ​ແມ່ນ​ພະ­ຍາດ​ຕີນ​ຫໍ ໄຂ້​ຫວັດ ແລະ ພະ­ຍາດ​ລະ­ບົບ​ປະ­ສາດ (ສຸ­ຂະ­ພາບ​ຈິດ) ເຊິ່ງ​ໄດ້​ແຈກ​ຢາຍ​ຢາ​ປິ່ນ­ປົວ​ພະ­ຍາດ​ໂດຍ​ບໍ່​ເສຍ​ຄ່າ ນອກ​ນີ້ ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ປາກ​ງື່ມ ຍັງ​ໄດ້​ຜະ­ລິດ​ນ້ຳ​ດື່ມ ແລ້ວ​ນຳ­ໄປ​ຊ່ວຍ­ເຫຼືອ​ປະ­ຊາ­ຊົນ ມື້­ໜຶ່ງ 4.000 ລິດ ເພື່ອ​ໃຫ້​ປະ­ຊາ­ຊົນ​ໄດ້​ດື່ມ­ນ້ຳ​ສະ­ອາດ.

    ສຳ­ລັບ​ແຜນ­ການ​ຟື້ນ​ຟູ​ໃນ­ຕໍ່­ໜ້າ ຈະ​ສືບ­ຕໍ່​ໂຄ­ສະ­ນາ​ໃຫ້​ສຸ​ຂະ​ສຶກ​ສາ​ໃຫ້​ປະ­ຊາ­ຊົນ ໂດຍ​ອີງ­ໃສ່​ການ​ປະ­ຕິ­ບັດ​ຫຼັກ­ການ 5 ປ ພ້ອມ​ທັງ​ເລັ່ງ​ຟື້ນ​ຟູ​ບຳ­ບັດ​ນ້ຳ­ສ້າງ ແລະ ນ້ຳ​ບາ​ດານ 1.000 ກວ່າ​ໜ່ວຍ ໃນ​ນີ້​ຈະ​ນຳ​ເອົາ​ຢາ​ຄໍ​ລິນ​ລົງ​ໃສ່​ບັນ­ດາ​ນ້ຳ­ສ້າງ ແລະ ນ້ຳ​ບາ​ດານ​ດັ່ງ­ກ່າວ ເພື່ອ​ບຳ­ບັດ​ນ້ຳ​ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ ແລະ ສືບ­ຕໍ່​ໃຫ້​ພະ­ນັກ­ງານ​ແພດ​ໝໍ ລົງ​ຕິດ­ຕາມ​ພະ­ຍາດ​ທີ່​ອາດ​ເກີດ​ຂຶ້ນ​ພາຍ­ຫຼັງ​ນ້ຳ​ຫຼຸດ​ລະ­ດັບ​ລົງ ເຊັ່ນ: ພະ­ຍາດ​ໄຂ້​ໄຮ​ໜູ ໄຂ້​ຫວັດ ແລະ ສືບ­ຕໍ່​ຟື້ນ​ຟູ​ສຸ­ຂະ­ພາບ​ຈິດ​ໃຫ້​ປະ­ຊາ­ຊົນ.

ຂ່າວທີ່ກ່ຽວຂ້ອງ