ຂ່າວຫຼ້າສຸດ

ເສີມສ້າງວິຊາຊີບໃຫ້ແມ່ຍິງຜູ້ທີ່ດ້ອຍໂອກາດ

169 14 ກ.ຍ. 2018 ຂ່າວໜ້າ​ໜຶ່ງ

    ແມ່­ຍິງ​ຜູ້​ດ້ອຍ​ໂອ­ກາດ​ຈາກ​ແຂວງ​ຕ່າງໆ​ທົ່ວ​ປະ­ເທດ 50 ຄົນ ໄດ້​ຮັບ​ການ​ຍົກ​ລະ­ດັບ​ຄວາມ​ຮູ້-ຄວາມ​ສາ­ມາດ​ດ້ານ​ວິ­ຊາ​ຊີບ​ຂະ­ແໜງ­ການ​ປຸງ​ແຕ່ງ­ອາ­ຫານ ຕັດ­ຫຍິບ ແລະ ເສີມ​ຄວາມ​ງາມ (ໄລ­ຍະ​ເວ­ລາ 3 ເດືອນ) ໃນ​ໂຄງ­ການ​ຮ່ວມ​ມື​ລະ­ຫວ່າງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ແລະ ກະ­ຊວງ​ສະ­ເໝີ­ພາບ​ບົດ­ບາດ ຍິງ-ຊາຍ ແລະ ຄອບ­ຄົວ ສ ເກົາ­ຫຼີ ໂດຍ​ພິ­ທີ​ເປີດ​ເຝິກ­ອົບ­ຮົມ​ດັ່ງ­ກ່າວ ໄດ້​ຈັດ​ຂຶ້ນ​ວັນ​ທີ 10 ກັນ­ຍາ 2018 ຢູ່​ສູນ​ອົບ­ຮົມ​ແມ່­ຍິງ​ລາວ ໂດຍ​ມີ​ທ່ານ​ນາງ ສິ­ລິ​ກິດ ບຸບ­ຜາ ຮອງ​ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທ່ານ Heung Kwon Park ອຸ­ປະ​ທູດ ສ ເກົາ­ຫຼີ ປະ­ຈຳ ສປປ ລາວ ທ່ານ​ນາງ Sun-A WON ຜູ້​ບໍ­ລິ­ຫານ​ຫຼັກ​ອົງ­ການ​ສາຍ­ສຳ­ພັນ​ແມ່­ຍິງ​ອາ­ຊີ ສ ເກົາ­ຫຼີ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ສິ­ລິ​ກິດ ບຸບ­ຜາ ກ່າວ​ວ່າ: ພາຍ­ຫຼັງ​ທີ່​ໄດ້​ຮັບ​ອະ­ນຸ­ມັດ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ຮ່ວມ​ມື​ໂຄງ­ການ (ODA) ລະ­ຫວ່າງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ແລະ ກະ­ຊວງ​ສະ­ເໝີ­ພາບ​ບົດ­ບາດ ຍິງ-ຊາຍ ແລະ ຄອບ­ຄົວ ສ.ເກົາ­ຫຼີ ໃນ​ໂຄງ­ການ​ສົ່ງ­ເສີມ​ສູນ​ອົບ­ຮົມ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ເພື່ອ​ສ້າງ​ຄວາມ​ສາ­ມາດ​ດ້ານ​ວິ­ຊາ​ຊີບ​ສຳ­ລັບ​ແມ່­ຍິງ ໃຫ້​ສະ­ຫະ­ພັນ​ແມ່­ຍິງ​ລາວ ໂດຍ​ສະ­ເພາະ ແມ່­ຍິງ​ຜູ້​ທຸກ​ຍາກ​ດ້ອຍ​ໂອ­ກາດ​ທົ່ວ​ປະ­ເທດ ເຊິ່ງ​ປີ​ນີ້​ເປັນ​ໄລ­ຍະ​ທີ 3 ແລະ ເປັນ​ຊຸດ​ເຝິກ­ອົບ­ຮົມ​ທີ 2 ຂອງ​ໂຄງ­ການ.

    ຈຸດ­ປະ­ສົງ​ຂອງ​ໂຄງ­ການ​ປີ 2018 ເພື່ອ​ສ້າງ​ຄວາມ​ເຂັ້ມ­ແຂງ​ໃຫ້​ສູນ​ກາງ​ສະ­ຫະ­ພັນ​ແມ່­ຍິງ​ລາວ ແລະ ເສີມ​ສ້າງ​ຄວາມ​ສາ­ມາດ​ໃຫ້​ແມ່­ຍິງ​ຜູ້​ດ້ອຍ​ໂອ­ກາດ ເພື່ອ​ໃຫ້​ເຂົາ­ເຈົ້າ​ມີ​ວິ­ຊາ​ຊີບ​ທີ່​ໝັ້ນ​ທ່ຽງ ມີ​ຄວາມ​ຮັບ­ຜິດ­ຊອບ ແລະ ກຸ້ມ​ຕົນ​ເອງ​ດ້ານ​ສະ­ພາບ​ເສດ­ຖະ­ກິດ ພ້ອມ​ນີ້ ຍັງ​ເປັນ​ການ​ປະ­ກອບ­ສ່ວນ​ໃນ​ການ​ສ້າງ­ສາ ແລະ ພັດ­ທະ­ນາ​ປະ­ເທດ​ຊາດ ຊ່ວຍ​ສ້າງ​ລາຍ​ຮັບ​ໄດ້ ແລະ ຊ່ວຍ​ໃຫ້​ແມ່­ຍິງ​ບໍ່​ຖືກ​ຕົວະ​ຍົວະ​ຫຼອກ​ລວງ​ຈາກ​ກຸ່ມ​ບໍ່​ຫວັງ​ດີ ເປັນ­ຕົ້ນ​ການ​ເຄື່ອນ​ຍ້າຍ​ແຮງ​ງານ ຫຼື ການ​ຄ້າ​ມະ­ນຸດ.

    ຊຸດ​ເຝິກ­ອົບ­ຮົມ​ດັ່ງ­ກ່າວ ຈະ​ດຳ­ເນີນ​ແຕ່​ວັນ​ທີ 10 ກັນ­ຍາ-6 ທັນ­ວາ 2018 ເຊິ່ງ​ແຕ່​ລະ​ຂະ­ແໜງ­ການ​ມີ​ວິ­ຊາ​ຊີບ​ທີ່​ຈະ​ໄດ້​ຮຽນ​ຮ່ວມ​ກັນ ແລະ ວິ­ຊາ​ທີ່​ເປັນ​ວິ­ຊາ​ສະ­ເພາະ ຈະ​ໄດ້​ລົງ​ເລິກ​ໄປ​ຕາມ​ແຕ່​ລະ​ຂະ­ແໜງ ສະ­ນັ້ນ​ການ​ລົງ​ເຝິກ​ງານ​ຕົວ​ຈິງ​ຈະ​ບໍ່​ຄື​ກັນ.

ຂ່າວທີ່ກ່ຽວຂ້ອງ