ຂ່າວຫຼ້າສຸດ

ນາຍົກລັດຖະມົນຕີ ພົບປະການນຳຂັ້ນສູງຫວຽດນາມ

369 14 ກ.ຍ. 2018 ຂ່າວໜ້າ​ໜຶ່ງ
ນາຍົກລັດຖະມົນຕີ ພົບປະການນຳຂັ້ນສູງຫວຽດນາມ

    ໃນ​ໂອ­ກາດ​ທີ່​ເດີນ­ທາງ​ເຂົ້າ​ຮ່ວມ​ກອງ​ປະ­ຊຸມ ເວ­ທີ​ປືກ​ສາ​ຫາ­ລື​ເສດ­ຖະ­ກິດ​ໂລກ ກ່ຽວ​ກັບ​ອາ​ຊຽນ ຄັ້ງ​ທີ 27 ທີ່ ຮ່າ​ໂນ້ຍ ສສ ຫວຽດ­ນາມ ວັນ​ທີ 13 ກັນ­ຍາ 2018 ທ່ານ ທອງ​ລຸນ ສີ​ສຸ​ລິດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ນາ­ຍົກ­ລັດ­ຖະ­ມົນ­ຕີ ໄດ້​ນຳ­ພາ​ຄະ­ນະ​ຜູ້​ແທນ​ເຂົ້າ​ຢ້ຽມ​ຄຳ­ນັບ ທ່ານ ຫງວ​ຽນ ຟູ ຈ້ອງ ເລ­ຂາ­ທິ­ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ຄອມ​ມູ​ນິດ​ຫວຽດ­ນາມ ທີ່​ຫ້ອງ​ວ່າ­ການ​ສູນ​ກາງ​ພັກ​ຄອມ​ມູ​ນິດ​ຫວຽດ­ນາມ.

    ໂອ­ກາດ​ນີ້ ທ່ານ ຫງວ​ຽນ ຟູ ຈ້ອງ ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ​ຢ່າງ​ອົບ​ອຸ່ນ ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ທ່ານ​ນາ­ຍົກ­ລັດ­ຖະ­ມົນ­ຕີ ແລະ ຄະ­ນະ ທີ່​ໄດ້​ເດີນ­ທາງ​ມາ​ເຂົ້າ​ຮ່ວມ​ກອງ​ປະ­ຊຸມ ແລະ ຢ້ຽມ­ຢາມ​ເຮັດ​ວຽກ​ຢູ່​ຫວຽດ­ນາມ​ຄັ້ງ​ນີ້ ເຊິ່ງ​ເປັນ​ຂີດ​ໝາຍ​ອັນ​ສຳ­ຄັນ ປະ­ກອບ­ສ່ວນ​ເຂົ້າ​ໃນ​ການ​ຮັດ​ແໜ້ນ​ສາຍ​ພົວ­ພັນ​ອັນ​ພິ­ເສດ ແລະ ການ​ພົວ­ພັນ​ຮ່ວມ​ມື​ຮອບ­ດ້ານ​ລະ­ຫວ່າງ ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ​ຫວຽດ­ນາມ-ລາວ ທີ່​ມີ​ມາ​ແຕ່​ດົນ​ນານ​ນັ້ນ ໂດຍ​ສະ­ເພາະ​ແມ່ນ​ການ​ແລກ­ປ່ຽນ​ບົດ­ຮຽນ ການ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ໃນ​ວຽກ​ງານ​ຕ່າງໆ​ໃຫ້​ແຕກ​ດອກ​ອອກ​ຜົນ​ຍິ່ງ​ຂຶ້ນ.

    ທ່ານ ທອງ​ລຸນ ສີ​ສຸ​ລິດ ໄດ້​ສະ­ແດງ​ຄວາມ​ຂອບ­ໃຈ​ຢ່າງ​ຈິງ​ໃຈ​ມາ​ຍັງ​ທ່ານ ຫງວ​ຽນ ຟູ ຈ້ອງ ທີ່​ໄດ້​ສະ­ລະ​ເວ­ລາ​ອັນ​ມີ­ຄ່າ​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ທັງ​ສະ­ແດງ​ຄວາມ​ຂອບ­ໃຈ​ຢ່າງ​ສູງ​ມາ​ຍັງ​ພັກ-ລັດ ແລະ ປະ­ຊາ­ຊົນ​ຫວຽດ­ນາມ ທີ່​ໄດ້​ໃຫ້­ການ​ຊ່ວຍ­ເຫຼືອ​ອັນ​ລ້ຳ​ຄ່າ​ແກ່​ປະ­ຊາ­ຊົນ​ລາວ​ໃນ​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ທີ່​ໄດ້​ຮັບ​ຜົນ​ກະ­ທົບ​ຈາກ​ຄູ​ກັ້ນ​ນ້ຳ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ໃນ​ທ້າຍ​ເດືອນ​ກໍ­ລະ­ກົດ 2018.

    ພ້ອມ​ນີ້ ໃນ​ວັນ​ດຽວ​ກັນ ທ່ານ ທອງ​ລຸນ ສີ​ສຸ​ລິດ ໄດ້​ນຳ­ພາ​ຄະ­ນະ​ຜູ້​ແທນ​ພົບ​ປະ​ສອງ​ຝ່າຍ​ກັບ​ທ່ານ ຫງວ​ຽນ ຊັວນ ຟຸກ ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ໂອ­ກາດ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ສຳ­ເລັດ​ອັນ​ຈົບ­ງາມ ໃນ​ການ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ເສດ­ຖະ­ກິດ​ໂລກ ວ່າ​ດ້ວຍ​ອາ​ຊຽນ​ທີ່​ຮ່າ​ໂນ້ຍ ເຊິ່ງ​ເປັນ​ການ​ປະ­ກອບ­ສ່ວນ​ຍົກ​ສູງ​ຖາ­ນະ​ບົດ­ບາດ ຊື່​ສຽງ​ຂອງ​ຫວຽດ­ນາມ​ຢູ່​ໃນ​ເວ­ທີ​ສາ­ກົນ​ຂຶ້ນ​ອີກ​ບາດ­ກ້າວ​ໜຶ່ງ ການ​ພົບ​ປະ​ສອງ​ຝ່າຍ​ຄັ້ງ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ການ​ຕ້ອນ­ຮັບ​ອັນ​ອົບ​ອຸ່ນ​ມາ​ຍັງ​ທ່ານ ຫງວ​ຽນ ຊັວນ ຟຸກ ແລະ ໄດ້​ພົບ​ປະ­ກັນ​ເປັນ​ປົກ­ກະ­ຕິ​ໃນ​ທຸກ​ກອງ​ປະ­ຊຸມ​ທີ່​ສຳ­ຄັນ​ໃນ​ພາກ​ພື້ນ ແລະ ສາ­ກົນ ເຊິ່ງ​ສະ­ແດງ​ເຖິງ​ມູນ­ເຊື້ອ​ສາຍ​ພົວ­ພັນ​ພິ­ເສດ ເພື່ອ​ເສີມ​ຂະ­ຫຍາຍ​ສາຍ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ຊາດ​ລາວ-ຫວຽດ­ນາມ ໃຫ້​ນັບ​ມື້​ນັບ​ມີ​ປະ​ສິດ­ທິ​ຜົນ​ຍິ່ງ​ຂຶ້ນ ແລະ ໄດ້​ຕີ​ລາ­ຄາ​ສູງ​ຕໍ່​ຄວາມ​ພະ­ຍາ­ຍາມ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ແລະ ພັກ-ລັດ­ຖະ­ບານ​ຫວຽດ­ນາມ ທີ່​ໄດ້​ເອົາ­ໃຈ­ໃສ່​ສ້າງ​ເງື່ອນ­ໄຂ​ອຳ­ນວຍ​ຄວາມ​ສະ­ດວກ ແລະ ໃຫ້­ການ​ຊ່ວຍ­ເຫຼືອ ເພື່ອ​ການ​ພັດ­ທະ­ນາ​ແກ່​ລາວ​ມາ​ຕະ­ຫຼອດ ພ້ອມ​ທັງ​ເຊື່ອ​ໝັ້ນ​ວ່າ ສອງ​ນາ­ຍົກ​ພວກ​ເຮົາ​ຈະ​ພ້ອມ​ກັນ​ເຮັດ​ວຽກ​ຮ່ວມ​ກັນ​ບົນ​ຈິດ­ໃຈ ການ​ຕົກ­ລົງ​ຂອງ​ສອງ​ພັກ ສອງ​ລັດ ແລະ ສັນ­ຍາ​ຕ່າງໆ​ທີ່​ສອງ​ຝ່າຍ​ໄດ້​ລົງ​ນາມ​ຮ່ວມ​ກັນ.

    ພິ­ເສດ ທ່ານ ທອງ​ລຸນ ສີ​ສຸ​ລິດ ໄດ້​ຕາງ­ໜ້າ​ໃຫ້​ພັກ ລັດ­ຖະ­ບານ ແລະ ປະ­ຊາ­ຊົນ​ລາວ ໄດ້​ສະ­ແດງ​ຄວາມ​ຮູ້​ບຸນ­ຄຸນ ແລະ ຄວາມ​ຂອບ­ໃຈ​ຢ່າງ​ຈິງ​ໃຈ​ມາ​ຍັງ​ພັກ​ລັດ­ຖະ­ບານ ແລະ ປະ­ຊາ­ຊົນ​ຫວຽດ­ນາມ​ອ້າຍ​ນ້ອງ ໂດຍ​ສະ­ເພາະ​ມາ​ຍັງ​ທ່ານ ຫງວ​ຽນ ຊັວນ ຟຸກ ທີ່​ໄດ້​ສົ່ງ​ຄວາມ​ເຫັນ​ອົກ​ເຫັນ­ໃຈ ແລະ ການ​ຊ່ວຍ­ເຫຼືອ​ເປັນ​ເງິນ ວັດ­ຖຸ​ສິ່ງ​ຂອງ​ບັນ­ເທົາ​ທຸກ ທີມ​ກູ້​ໄພ ແພດ​ໝໍ ແລະ ອຸ­ປະ­ກອນ​ຕ່າງໆ ໄປ​ຊ່ວຍ­ເຫຼືອ​ຕໍ່​ເຫດ­ການ​ໄພ­ພິ­ບັດ​ຢູ່​ແຂວງ​ອັດ​ຕະ​ປື​ໄດ້​ທັນ​ການ ໃນ​ຂະ­ນະ​ທີ່​ປະ­ຊາ­ຊົນ​ຫວຽດ­ນາມ ໄດ້​ປະ­ສົບ​ໄພ​ທຳ​ມະ​ຊາດ​ອັນ​ຮ້າຍ​ແຮງ ມີ​ຝົນ­ຕົກ​ໜັກ​ຢູ່​ຫຼາຍ​ແຂວງ​ພາກ​ເໜືອ​ຂອງ​ຫວຽດ­ນາມ​ເຊັ່ນ​ດຽວ​ກັນ ທ່ານ ທອງ​ລຸນ ສີ​ສຸ​ລິດ ໄດ້​ຕາງ­ໜ້າ​ພັກ ລັດ­ຖະ­ບານ ແລະ ປະ­ຊາ­ຊົນ​ລາວ ສະ­ແດງ​ຄວາມ​ເຫັນ​ອົກ​ເຫັນ­ໃຈ​ມາ​ຍັງ​ພັກ​ລັດ­ຖະ­ບານ ແລະ ປະ­ຊາ­ຊົນ​ຫວຽດ­ນາມ​ອ້າຍ​ນ້ອງ ມາ­ນະ​ໂອ­ກາດ​ນີ້​ດ້ວຍ.

ຂ່າວທີ່ກ່ຽວຂ້ອງ