ຂ່າວຫຼ້າສຸດ

ກວ່າຈະໄດ້ຮັບໃບປະກາສະນິຍະບັດແດງ

230 14 ກ.ຍ. 2018 ສຶກສາ
ກວ່າຈະໄດ້ຮັບໃບປະກາສະນິຍະບັດແດງ

    ໃບ​ປະ​ກາ​ສະ​ນິ​ຍະ​ບັດ​ແດງ ແມ່ນ​ຄວາມ​ມຸ້ງ​ຫວັງ​ຂອງ​ນັກ­ຮຽນ​ຈຳ­ນວນ​ຫຼາຍ ຜູ້​ທີ່​ຕັ້ງ­ໃຈ​ສຶກ​ສາ​ຮ່ຳ­ຮຽນ ສະ​ແຫວ່ງ​ຫາ​ຄວາມ​ຮູ້ ກໍ່​ແມ່ນ​ຄວາມ​ຫວັງ​ຂອງ​ພໍ່​ແມ່​ຜູ້​ປົກ­ຄອງ​ເຊັ່ນ​ດຽວ​ກັນ ເພາະ​ທຸກ​ຄົນ​ກໍ່​ຕ້ອງ­ການ​ຢາກ​ເຫັນ​ລູກ​ຫຼານ​ຂອງ​ຕົນ ຮຽນ​ດີ ຮຽນ​ເກ່ງ ມີ​ຄຸນ­ສົມ­ບັດ ມັກ​ຮັກ​ໃນ​ການ​ພັດ­ທະ­ນາ ຫາ​ຄວາມ​ຮູ້​ໃຫ້​ຕົນ​ເອງ ແຕ່​ນັ້ນ​ກໍ່​ຄົງ​ເປັນ​ພຽງ​ຄວາມ​ຄິດ ຄວາມ​ຫວັງ​ເທົ່າ​ນັ້ນ ຫາກ​ບໍ່​ລົງ­ມື​ປະ­ຕິ­ບັດ ເພາະ​ສິ່ງ​ເຫຼົ່າ­ນັ້ນ ມັນ​ຈະ​ເກີດ​ຂຶ້ນ​ໄດ້​ກໍ່​ຕໍ່​ເມື່ອ ຕ້ອງ​ຜ່ານ​ຂະ​ບວນ​ການ­ຈັດ­ຕັ້ງ​ປະ­ຕິ­ບັດ ເຝິກ­ຝົນ ສຶກ​ສາ​ຮຽນ​ຮູ້ ສ້າງ​ພື້ນ­ຖານ​ອັນ​ແໜ້ນ​ແກ່ນ​ມາ​ແຕ່​ຕົ້ນ ໃຊ້​ໄລ­ຍະ​ເວ­ລາ​ພໍ​ສົມ­ຄວນ ບໍ່​ແມ່ນ​ຈະ​ສາ­ມາດ​ປະ­ສົບ​ຜົນ­ສຳ­ເລັດ​ໄດ້​ໃນ​ເວ­ລາ​ອັນ​ສັ້ນ.

    ນາງ ອາ​ລິ​ສາ ວົງ​ວິ­ຈິດ ນັກ­ຮຽນ​ຫ້ອງ ມ7 ສົກ­ຮຽນ 2017-2018 ຂອງ​ໂຮງ­ຮຽນ ນິ​ຣະ​ດາ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ໜຶ່ງ​ໃນ​ຈຳ­ນວນ 6 ຄົນ ທີ່​ໄດ້​ຮັບ​ໃບ​ປະ​ກາ​ສະ​ນິ​ຍະ​ບັດ​ແດງ ໃນ​ສົກ­ຮຽນ​ຜ່ານ​ມາ ກ່າວ​ວ່າ: ກວ່າ​ຈະ​ໄດ້​ຮັບ​ໃບ​ປະ​ກາ​ສະ​ນິ​ຍະ​ບັດ​ແດງ ບໍ່​ແມ່ນ​ເລື່ອງ​ງ່າຍໆ ເພາະ​ຕ້ອງ​ໃຊ້​ຄວາມ​ອົດ­ທົນ​ພະ­ຍາ­ຍາມ​ໃນ​ການ​ຮຽນ​ເປັນ​ເວ­ລາ​ດົນ​ນານ ຕົນ​ເອງ​ນັບ​ວ່າ​ໂຊກ​ດີ​ທີ່​ພໍ່​ແມ່​ໃຫ້­ການ​ສະ­ໜັບ­ສະ­ໜູນ ຊຸກ­ຍູ້​ມາ​ໂດຍ​ຕະ­ຫຼອດ ທຸກ​ສິ່ງ​ຢ່າງ​ເພື່ອ​ການ​ຮຽນ​ຂອງ​ຕົນ ພໍ່​ແມ່​ບໍ່​ເຄີຍ​ຂັດ­ຂ້ອງ ສະ­ໜອງ​ໃຫ້​ໄດ້​ທຸກ​ຢ່າງ ໃຫ້​ທັງ​ຄວາມ​ຮັກ ຄວາມ​ອົບ​ອຸ່ນ ເອົາ­ໃຈ­ໃສ່​ດູ​ແລ ນັບ​ແຕ່​ຈຳ​ຄວາມ​ໄດ້ ພໍ່​ແມ່​ບໍ່​ເຄີຍ​ຮ້າຍ​ດ່າ ເວົ້າ​ຈາ​ບໍ່​ສຸ­ພາບ ມີ​ແຕ່​ເຫດ ແລະ ຜົນ ຈົນ​ເຮັດ​ໃຫ້​ມີ​ຄວາມ​ຮັກ​ພູກ​ພັນ​ກັບ​ຄອບ­ຄົວ​ຫຼາຍ ຈົນ​ກາຍ­ເປັນ​ແຮງ​ຈູງ​ໃຈ​ສຸມ​ໃສ່​ການ​ຄົ້ນ­ຄວ້າ​ຮ່ຳ­ຮຽນ ເຮັດ​ໃຫ້​ມີ​ຜົນ​ການ​ຮຽນ​ທີ່​ດີ​ມາ​ແຕ່​ຊັ້ນ​ປະ­ຖົມ ເຄີຍ​ມີ​ຜົນ­ງານ​ເປັນ​ຕົວ​ແທນ​ນັກ­ຮຽນ​ເກ່ງ​ຂອງ​ໂຮງ­ຮຽນ ເຂົ້າ​ຮ່ວມ​ການ​ສອບ­ເສັງ​ນັກ­ຮຽນ​ເກ່ງ ໃນ​ຊັ້ນ ປ5 ມ4 ແລະ ມ7 ເຊິ່ງ​ກໍ່​ສາ­ມາດ​ຍາດ​ໄດ້​ຄະ­ແນນ​ດີ​ສົມ­ຄວນ ເຖິງ​ວ່າ​ຈະ​ບໍ່​ດີ­ເລີດ​ໄດ້​ອັນ​ດັບ​ໜຶ່ງ​ຂອງ​ປະ­ເທດ ແຕ່​ບໍ່​ເຄີຍ​ເສຍ​ໃຈ ນ້ອຍ​ໃຈ ກົງ­ກັນ­ຂ້າມ​ຍິ່ງ​ເຮັດ​ໃຫ້​ບຸກ​ບືນ​ຜ່ານ​ມາ ຕັ້ງ­ໃຈ​ຮຽນ​ຈົນ​ໃນ​ທີ່​ສຸດ​ຜົນ​ການ​ສອບ­ເສັງ​ຈົບ​ຊັ້ນ ມ7 ໃນ​ສົກ­ຮຽນ​ຜ່ານ​ມາ ສາ­ມາດ​ຍາດ​ໄດ້​ໃບ​ປະ​ກາ​ສະ​ນິ​ຍະ​ບັດ​ແດງ​ມາ​ຄອງ.

    ທ່ານ ສົມ​ເພັດ ວົງ​ວິ­ຈິດ ແລະ ທ່ານ​ນາງ ຄຳ​ຫຼ້າ ປະ​ທັມ­ມະ​ວົງ ຜູ້​ເປັນ​ພໍ່ ແລະ ແມ່ ຂອງ​ນາງ ອາ​ລິ​ສາ ວົງ​ວິ­ຈິດ ກວ່າ​ວ່າ: ຄອບ­ຄົວ​ມີ​ລູກ​ສາວ​ສອງ​ຄົນ ນາງ ອາ​ລິ​ສາ ເປັນ​ລູກ​ສາວ​ຜູ້​ຫຼ້າ ລູກ​ສາວ​ສອງ​ຄົນ​ມີ​ຄວາມ​ຄ້າຍ­ຄື​ກັນ ຄື: ເປັນ​ຄົນ​ມັກ​ຮຽນ ຟັງ​ຄວາມ​ພໍ່​ແມ່ ອີກ​ຢ່າງ​ພໍ່​ແມ່​ກໍ່​ໃຫ້​ຄວາມ​ເປັນ​ກັນ​ເອງ ລ້ຽງ​ລູກ​ແບບ​ສະ­ໄໝ​ໃໝ່ ບໍ່​ບັງ­ຄັບ ຄ່ອຍ​ໃຫ້​ຄຳ​ປຶກ­ສາ​ເປັນ​ຫຼັກ ຟັງ​ເຫດ­ຜົນ ສ້າງ​ຄວາມ​ເຂົ້າ­ໃຈ​ພາຍ​ໃນ​ຄອບ­ຄົວ ສ້າງ​ໃຫ້​ລູກ​ກ້າ​ຄິດ ກ້າ​ສະ­ແດງ​ອອກ ແລະ ກ້າ​ຕັດ­ສິນ​ໃຈ ແນ່­ນອນ ພໍ່​ແມ່​ທຸກ​ຄົນ​ກໍ່​ຕ້ອງ​ມີ​ຄວາມ​ຫວັງ​ໃນ​ຕົວ​ສູງ​ສົມ­ຄວນ ແຕ່​ຄວາມ​ຫວັງ​ນັ້ນ ສ່ວນ​ໜຶ່ງ​ກໍ່​ຍອມ­ຮັບ​ການ​ຕັດ­ສິນ​ໃຈ​ຂອງ​ລູກ​ນຳ ໂດຍ​ສະ­ເພາະ​ການ​ຮຽນ ບອກ​ລູກ​ສະ­ເໜີ​ວ່າ: ການ​ຮຽນ​ຕ້ອງ​ມີ​ການ​ແຂ່ງ­ຂັນ ເຮັດ​ໜ້າ­ທີ່​ໃຫ້​ດີ​ທີ່​ສຸດ ເມື່ອ​ຜົນ​ມັນ​ອອກ​ມາ​ແບບ​ໃດ​ກໍ່​ຕ້ອງ​ຍອມ­ຮັບ ບໍ່​ຕ້ອງ​ໄປ​ມົກ​ມຸ້ນ​ຈົນ​ເກີນ​ໄປ ເອົາ​ທີ່​ຄວາມ​ຮູ້ ຄວາມ​ສາ​ມາ​ທີ່​ເຮັດ​ໄດ້ ແຕ່​ທີ່​ສຳ­ຄັນ ຕ້ອງ​ແຂ່ງ­ຂັນ​ກັບ​ຕົວ​ເອງ​ເອົາ​ຊະ­ນະ​ໃຈ​ຕົນ​ເອງ​ກ່ອນ ກ່ອນ​ທີ່​ຈະ​ເອົາ​ຊະ­ນະ​ຄົນ​ອື່ນ ຮູ້­ຈັກ​ປະ​ເມີນ​ຕົນ​ເອງ ນອບ​ໜ້ອມ​ຖອມ​ຕົວ ເບິ່ງ​ໂລກ​ໃນ​ແງ່​ດີ ຮູ້​ປັບ​ປ່ຽນ-ປັບ­ປຸງ ທັດ­ສະ­ນະ​ຄະ­ຕິ ມີ​ສະ­ມາ­ທິ ສະ­ຕິ​ໝັ້ນ­ຄົງ ເພື່ອ​ພັດ­ທະ­ນາ​ຕົນ​ເອງ​ຢ່າງ​ຕໍ່​ເນື່ອງ.

    ສຳ­ລັບ​ຜົນ­ງານ​ຄັ້ງ​ນີ້ ຖື​ເປັນ​ຜົນ­ງານ​ລວມ​ຂອງ​ທຸກ​ຄົນ ໂດຍ​ສະ­ເພາະ ຄະ­ນະ​ຜູ້​ບໍ­ລິ­ຫານ ຄູ-ອາ­ຈານ ທຸກ​ທ່ານ ນັບ​ແຕ່​ຂັ້ນ​ອະ­ນຸ­ບານ​ມາ​ຈົນ​ເຖິງ​ປັດ­ຈຸ­ບັນ ທີ່​ທຸ້ມ­ເທ​ທັງ​ກຳ­ລັງ​ແຮງ ສະ­ຕິ​ປັນ­ຍາ​ໃນ​ການ​ສິດ­ສອນ ຈົນ​ເຮັດ​ໃຫ້​ລູກ​ສາວ​ມີ​ວັນ​ນີ້ ເຊິ່ງ​ນອກ­ຈາກ​ສ້າງ​ຄວາມ​ພູມ­ໃຈ​ໃຫ້​ຄອບ­ຄົວ​ແລ້ວ ຍັງ​ໄດ້​ມີ​ໂອ­ກາດ​ເລືອກ​ຮຽນ ພິ­ເສດ​ຍ້ອນ​ຄວາມ​ອົດ­ທົນ​ພະ­ຍາ­ຍາມ ເຝິກ­ຝົນ​ຮ່ຳ­ຮຽນ​ເຮັດ​ໃຫ້​ມີ​ຜົນ​ການ​ຮຽນ​ດີ ໄດ້​ຮັບ​ຄັດ​ເລືອກ​ໄປ​ຮຽນ​ຕໍ່​ທີ່​ຕ່າງ­ປະ­ເທດ​ນຳ​ອີກ ສ່ວນ​ເລື່ອງ​ຂອງ​ອະ­ນາ­ຄົດ ພໍ່​ແມ່​ບໍ່​ໄດ້​ບັງ­ຄັບ ສຸດ​ແລ້ວ­ແຕ່​ລູກ​ຍາກ​ຮຽນ​ຫຍັງ ອາ­ຊີບ​ໃດ ຂໍ​ໃຫ້​ເປັນ​ຄົນ​ດີ ມີ​ວິ­ຊາ​ອາ­ຊີບ​ດູ​ແລ​ຕົນ​ເອງ ໄດ້​ສ້າງ​ຄຸນ​ປະ­ໂຫຍດ​ຕໍ່​ສັງ­ຄົມ ແລະ ປະ­ເທດ​ຊາດ.

ຂ່າວທີ່ກ່ຽວຂ້ອງ