ຂ່າວຫຼ້າສຸດ

ຄາຣາເຕໂດ ກຳນົດຊີງ 12 ຫຼຽນຄຳ ໃນຊຽງຂວາງ ເກມ

333 17 ກ.ຍ. 2018 ວົງຈອນກີລາ
ຄາຣາເຕໂດ ກຳນົດຊີງ 12 ຫຼຽນຄຳ ໃນຊຽງຂວາງ ເກມ

    ທ່ານ ຄອນ​ຄຳ ພິ​ທັກ​ສູນ​ທຳ ຮອງ​ເລ­ຂາ​ສະ­ຫະ­ພັນ​ຄາ​ຣາ​ເຕ​ໂດ​ແຫ່ງ​ຊາດ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ການ​ແຂ່ງ­ຂັນ​ກີ­ລາ​ຄາ​ຣາ​ເຕ​ໂດ ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ເກມ ຢູ່​ແຂວງ​ຊຽງ​ຂວາງ ທ້າຍ​ປີ​ນີ້ ສະ­ຫະ­ພັນ​ຄາ​ຣາ​ເຕ​ໂດ​ແຫ່ງ​ຊາດ​ລາວ ໃນ​ນາມ​ເປັນ​ເຈົ້າ​ການ​ຈັດ­ການ​ແຂ່ງ­ຂັນ ໄດ້​ມີ​ການ​ຈັດ​ກອງ​ປະ­ຊຸມ​ປືກ​ສາ​ຫາ­ລື ແລະ ວາງ​ແຜນ​ຕ່າງໆ​ສະ­ເພາະ​ພາຍ​ໃນ​ສະ­ຫະ­ພັນ​ມາ​ຫຼາຍ​ຄັ້ງ ເພື່ອ​ເຮັດ​ໃຫ້­ການ​ແຂ່ງ­ຂັນ​ດຳ­ເນີນ​ດ້ວຍ​ຜົນ­ສຳ­ເລັດ​ຈົບ­ງາມ ໂດຍ​ສະ­ເພາະ ຈະ​ໄດ້​ນຳ​ໃຊ້​ກຳ­ມະ­ການ​ຕັດ­ສິນ​ການ​ແຂ່ງ­ຂັນ 12 ຄົນ ໃນ​ນີ້ ຕ່າງ­ປະ­ເທດ 6 ຄົນ ກຳ­ມະ­ການ​ລາວ 6 ຄົນ ຄາດ​ວ່າ​ຈະ​ມີ​ນັກ­ກີ­ລາ​ຈາກ​ແຂວງ​ວຽງ​ຈັນ ຊຽງ​ຂວາງ ສະ­ຫວັນ​ນະ​ເຂດ ຄຳ​ມ່ວນ ຫຼວງ​ພະ​ບາງ ກະ­ຊວງ​ປ້ອງ​ກັນ​ປະ­ເທດ ກະ­ຊວງ​ປ້ອງ​ກັນ​ຄວາມ​ສະ­ຫງົບ ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ 100 ກວ່າ​ຄົນ.

    ການ​ແຂ່ງ­ຂັນ​ກີ­ລາ​ດັ່ງ­ກ່າວ ຈະ​ຈັດ​ຂຶ້ນ​ວັນ​ທີ 18-20 ພະ­ຈິກ 2018 ຢູ່​ສະ­ໂມ­ສອນ B ຂອງ​ວິ­ທະ­ຍາ­ໄລ​ຄູ​ຄັງ​ໄຂ ເມືອງ​ແປກ ໂດຍ​ທ້າຍ​ເດືອນ​ກັນ­ຍາ-ຕົ້ນ​ເດືອນ​ຕຸ­ລາ 2018 ຄະ­ນະ​ຮັບ­ຜິດ­ຊອບ​ຈັດ­ການ​ແຂ່ງ­ຂັນ ຈະ​ເດີນ­ທາງ​ໄປ​ກວດ­ກາ​ຄວາມ​ພ້ອມ​ສະ­ໜາມ​ທີ່​ຈະ​ຈັດ­ການ​ແຂ່ງ­ຂັນ.

    ການ​ແຂ່ງ­ຂັນ​ກີ­ລາ​ຄາ​ຣາ​ເຕ​ໂດ ໃນ​ຊຽງ​ຂວາງ ເກມ 2018 ໄດ້​ກຳ­ນົດ​ເງື່ອນ­ໄຂ​ນັກ­ກີ­ລາ​ທີມ​ຊາດ​ລາວ ອະ­ນຸ­ຍາດ​ໃຫ້​ລົງ​ແຂ່ງ­ຂັນ​ໄດ້ 1 ລາຍ­ການ ແລະ ສາ­ມາດ​ຕາງ­ໜ້າ​ໃຫ້ 6 ແຂວງ 2 ກະ­ຊວງ ແລະ ນະ­ຄອນ­ຫຼວງ​ວຽງ​ຈັນ ໄດ້ 2 ຄົນ ຍິງ 1 ຄົນ ໃນ​ນີ້​ຈະ​ມີ​ການ​ຊີງ​ໄຊ 12 ຫຼຽນ ຄື: ປະ­ເພດ​ຕໍ່­ສູ້ 10 ລາຍ­ການ ຊາຍ 6 ຮຸ່ນ ແລະ ຍິງ 4 ຮຸ່ນ ສ່ວນ​ປະ­ເພດ​ຟ້ອນ​ມີ 2 ລາຍ­ການ ປະ­ເພດ​ດ່ຽວ​ຍິງ ແລະ ປະ­ເພດ​ດ່ຽວ​ຊາຍ.

ຂ່າວທີ່ກ່ຽວຂ້ອງ