ຂ່າວຫຼ້າສຸດ

ເຊັກກ່ອນແຊ

1.092 17 ກ.ຍ. 2018 ນານາສາລະ

    ໜຶ່ງ​ປະເດັນ​ຮິດ ແລະ ຮ໋ອດ​ກັນ​ໃນ​ສັງຄົມ​ເວລາ​ນີ້​ກໍ່​ຄື ເລື່ອງ​ຄວາມ​ຫຍຸ້ງ​ເຫຍີງ ແລະ ສັບສົນ​ຂອງການ​ເສບ​ຂ່າວ​ທາງ​ສື່​ອອນ​ລາຍ ເຊິ່ງ​ບັນຫາ​ດັ່ງກ່າວ ​ເກີດ​ມາ​ຈາກ​ບາງ​ສາຍເຫດ​ເຊັ່ນ: ເກີດ​ຈາກ​ພວກ​ບໍ່​ຫວັງ​ດີຢາກ​ຕໍ່ຕ້ານ​ແນວທາງ​ເລີຍ​ສວຍ​ໃຊ້​ສື່​ອອນ​ລາຍ​ຍົ້ວ​ຍຸ ພວກ​ຫຼີ້ນ​ສື່​ອອນ​ລາຍ​ທີ່​ຮູ້​ບໍ່​ທັນ​ຫຼ່ຽມ​ເຂົາ ແລະ ຕໍ່​ມາ​ກໍ່​ແມ່ນ​ເກີດ​ຈາກພວກ​ໂລກ​ຈິດ ຄື ໂລກ​ຢາກ​ເດັ່ນ​ຢາກ​ດັງ ມີ​ເວລາ​ຫວ່າງ​ຫຼາຍ​ກໍ່​ຊອກ​ເອົາ​ຂ່າວຈາກ​ທີ່​ຕ່າງໆ​ມາ​ຕັດ​ຕໍ່​ແຕ່ງ​ເຕີມ Post ລົງ​ໃນເພດ (Page ຫຼື FB) ຂອງ​ຕົນ​ເອງ ​ເພື່ອ​ເຮັດ​ໃຫ້​ສັງຄົມ​ຮູ້​ວ່າ​ຕົນ​ເອງ​ເກ່ງ.

    ປັນຫາ​ທີ່​ເກີດ​ຈາກ​ສາຍເຫດ​ປະເພດ​ທີ​ສອງ​ນີ້ ຄວນ​ມີ​ກຳມະການ​ສະເພາະ​ກິດ ​ເອີ້ນ​ມາເຕືອນ ແລະ ໃຫ້​ປິດ​ສື່​ດັ່ງກ່າວ​ໄດ້ແລ້ວ ​ປະເພດ​ທີ​ສາມ​ຄື​ຊິ​ແມ່ນ​ພວກ​ຫຼີ້ນ​ສື່​ອອນ​ລາຍ​ທົ່ວ​ໄປ​ທີ່​ຮູ້​ບໍ່​ທັນ​ເຂົາ ແລະ ບໍ່​ມີ​ເວລາ​ກວດ​ສອບ​ແຫຼ່ງ​ຂ່າວ ຈຶ່ງ​ຫຼົງ​ເຊື່ອ​​ຕາມ​ຂ່າວ​ທີ່​ເຂົາ​ເອົາ​ລົງ​ສື່​ອອນ​ລາຍ ຖ້າ​ຈະ​ໃຫ້​ເວົ້າ​ພາສາ​ພະ​ກໍ່​ແມ່ນ​ພວກ​ສັດທາ​ສູງ​ແຕ່​ປັນຍາ​ຍັງ​ບໍ່​ສູງ​ຄື​ເຊື່ອ​ໂລດ ໂດຍ​ບໍ່​ໃຊ້​ປັນຍາ​ໄຕ່ຕອງ​ໃຫ້​ຖ້ວນ​ຖີ່.

    ພວກ​ເຮົາ​ຕ້ອງ​ໄດ້​ນັ່ງ​ຄິດ​ພິຈາລະນາ​ເບິ່ງ​ສາຍເຫດ​ຫຼັກໆ​ຂອງ​ບັນຫາ​ແລ້ວ ຄວນ​ແກ້​ໄຂ​ຢ່າງ​ຈິງ​ຈັງ ແບບ​ຕັດ​ໄຟ​ແຕ່​ຕົ້ນ​ລົມ ເພາະ​ປ້ອງ​ກັນ​ບໍ່​ໃຫ້​ເກີດ​ລັກສະນະ​ໄຟ​ລາມ​ທົ່ງ ຢ່າ​ປະໝາດ​ສື່​ອອນ​ລາຍ​ທີ່​ບໍ່​ມີ​ສຳນັກ​ສັງກັດ ຜູ້​ຂຽນຈິ່ງຝາກ​ທ່ານ​ຜູ້​ອ່ານ​ຢູ່​ແຕ່​ລະ​ສຳນັກງານ ອົງການ ​ຄວນ​ແຈ້ງ​ເຕືອນ​ພະນັກງານໃຫ້​ອ່ານ​ຂ່າວ​ຢ່າງ​ມີ​ສະຕິ ໂດຍ​ສະເພາະ​ກ່ອນ​ຈະ​ແຊ​ຕໍ່​ກັນ​ໄປ​ກໍ່​ຕ້ອງ​ກວດ​ສອບ​ໃຫ້​ລະອຽດ​ວ່າ ​ສິ່ງ​ທີ່​ເກີດ​ຂຶ້ນ​ມັນ​ຈິງ​ຫຼື​ປອມ.

    ການຈັດຕັ້ງ​ພາກ​ລັດ-ເອກະ​ຊົນ​ຄວນ​ເຜີຍແຜ່​ດຳລັດ ​ເລກ​ທີ 327/ລບ ຕື່ມ​ໃຫ້​ສັງຄົມ​ຮັບ​ຮູ້​ຢ່າງ​ທົ່ວ​ເຖິງ ດຳລັດ​ດັ່ງກ່າວ ວ່າ​ດ້ວຍ​ການ​ຄຸ້ມ​ຄອງ​ຂໍ້​ມູນ​ຂ່າວສານຜ່ານ​ອິນ​ເຕີ​ເນັດ ຢ່າ​ລືມ​ວ່າ ມາດຕາ 7 ບອກ​ແຈ້ງວ່າ ບຸກຄົນ ຫຼື ນິຕິບຸກຄົນ ແລະ ການຈັດຕັ້ງ​ໃດ​ໜຶ່ງ ​ສາມາດ​ເຜີຍແຜ່​ຂໍ້​ມູນ​ຂ່າວສານ​ຜ່ານ​ສື່​ສັງຄົມ ແຕ່​ຕ້ອງ​ລະບຸ​ແຫຼ່ງ​ທີ່​ມາ​ຂອງ​ຂໍ້​ມູນ​ຂ່າວສານ​ຢ່າງ​ຖືກຕ້ອງ... ເຈົ້າ​ຂອງ ຫຼື ຜູ້​ຄຸ້ມ​ຄອງ​ເວັບ​ໄຊ ຕ້ອງ​ມີ​ຄວາມ​ຮັບຜິດຊອບ​ໃນ​ການ​ກວດກາ​ເນື້ອ​ໃນ​ຂໍ້​ມູນ​ຂ່າວສານ​ຢ່າງ​ລະອຽດ ​ກ່ອນ​ຈະ​ອະນຸຍາດ​ໃຫ້​ຜູ້​ອື່ນ​ເຜີຍແຜ່​ຜ່ານ​ເວັບ​ໄຊ​ຂອງ​ຕົນ.

    ເຊັກ​ກ່ອນ​ແຊ ຫຼື ຕັ້ງ​ສະຕິ​ກ່ອນ​ເຊື່ອແບບ​ຟັງ​ເຫດ​ຟັງ​ຜົນ ຮູ້​ທີ່​ໄປ​ທີ່​ມາ​ຢ່າງ​ຊັດ​ເຈນ​ກ່ອນ​ຈະ​ເຊື່ອ ​ຈຶ່ງ​ປ້ອງ​ກັນ​ບໍ່​ໃຫ້​ສັງຄົມ​ສັບ​ສົນ​ວຸ້ນວາຍ ສຳຄັນ​ພວກ​ໂລກ​ຈິດ​ຢາກ​ດັງນັ້ນ ຄວນ​ຫາ​ມາດ​ຕະການ​ກວດ​ສອບ​ແກ້​ໄຂ ແລະ ອອກແຮງ​ເຜີຍແຜ່​ດຳລັດ​ດັ່ງກ່າວໃຫ້​ສັງຄົມ​ຮັບ​ຮູ້​ຕື່ມ ເພື່ອ​ຊ່ວຍ​ກັນ​ບໍ່​ໃຫ້​ຫຼາຍ​ຄົນ​ໄດ້​ຫົງ​ຜິດ ບໍ່​ດັ່ງນັ້ນ ​ຖ້າວ່າ​ບັນຫາ​ບານ​ປາຍ​ກວ່າ​ນີ້ ກໍ່​ຈະ​ແກ້​ໄຂ​ຍາກ ອ່ານ​ແລ້ວ​ຄິດ​ຊ່ວຍ​ກັນ​ລອງ​ເບິ່ງ !

ດັ້ນກີບເມກ

ຂ່າວທີ່ກ່ຽວຂ້ອງ