ຂ່າວຫຼ້າສຸດ

ເຜີຍຂໍ້ມູນການຊື້-ຂາຍນັກເຕະພັກແລ້ງປີນີ້ ສູງສຸດເປັນສະຖິຕິໃໝ່

314 18 ກ.ຍ. 2018 ວົງຈອນກີລາ
ເຜີຍຂໍ້ມູນການຊື້-ຂາຍນັກເຕະພັກແລ້ງປີນີ້ ສູງສຸດເປັນສະຖິຕິໃໝ່

    ສະ­ຫະ­ພັນ​ບານ­ເຕະ​ນາໆຊາດ ຫຼື FIFA ໄດ້​ເປີດ­ເຜີຍ​ຂໍ້​ມູນ​ການ​ຊື້-ຂາຍ​ນັກ​ເຕະ​ໄລ­ຍະ​ພັກ­ແລ້ງ​ປີ​ນີ້ ລວມ​ທັງ​ໝົດ​ໃນ​ທົ່ວ​ໂລກ 5,44 ຕື້​ລ້ານ​ໂດ​ລາ​ສະ­ຫະ­ລັດ ສູງ​ສຸດ​ເປັນ​ສະ­ຖິ­ຕິ​ໃໝ່ ໃນ​ນີ້ 5 ລີກ​ຊັ້ນ​ນຳ​ຂອງ​ເອີ​ຣົບ (ອັງ­ກິດ ແອັສ​ປາຍ ເຢຍ​ລະ​ມັນ ອີ​ຕາ​ລີ ແລະ ຝຣັ່ງ) ໃຊ້​ຈ່າຍ​ຊື້-ຂາຍ​ນັກ​ເຕະ​ສູງ​ສຸດ 4,21 ຕື້​ລ້ານ​ໂດ​ລາ ໂດຍ​ສະ­ເພາະ ພຣີ​ເມຍ​ລີກ​ອັງ­ກິດ ສູງ​ກວ່າ​ໝູ່ 1,44 ຕື້​ລ້ານ​ໂດ​ລາ ໃນ​ນີ້ ພຣີ​ເມຍ​ລີກ​ສູງ​ສຸດ 1,26 ຕື້​ລ້ານ​ປອນ ລີ​ເວີ​ພູ​ລ ຈ່າຍ​ຫຼາຍ​ສຸດ 161,25 ລ້ານ​ປອນ.

   ຖື​ວ່າ​ເປັນ​ລະ­ດູ​ການ​ທີ 5 ທີ່​ທົ່ວ​ໂລກ​ມີ​ການ​ໃຊ້​ຈ່າຍ​ຊື້-ຂາຍ​ນັກ​ເຕະ​ບໍ່​ຫຼຸດ 1 ຕື້​ໂດ​ລາ ເມື່ອ​ປຽບ­ທຽບ​ໃສ່​ລະ­ດູ​ການ​ຜ່ານ​ມາ ເພີ່ມ​ຂຶ້ນ 6,6% ໂດຍ​ສະ­ເພາະ ສະ­ໂມ­ສອນ​ໃນ​ອີ​ຕາ​ລີ ເພີ່ມ​ຂຶ້ນ​ເຖິງ 74,7% ແລະ ແອັສ​ປາຍ (ສະ​ເປນ) ເພີ່ມ​ຂຶ້ນ 42,2%.

    FIFA ຍັງ​ເປີດ­ເຜີຍ​ຕື່ມ​ວ່າ: ມີ​ຊາດ​ສະ­ມາ­ຊິກ 182 ຈາກ 211 ໄດ້​ມີ​ການ​ຊື້-ຂາຍ​ນັກ​ເຕະ ລວມ 8.401 ຄົນ ໃນ​ນີ້ 59,1% ແມ່ນ​ຊື້-ຂາຍ​ແບບ​ຈີກ​ສັນ­ຍາ 15,7% ສັນ­ຍາ​ຊື້-ຂາຍ​ຊົ່ວ­ຄາວ 13,8% ຍືມ​ຕົວ 11,4% ຊື້-ຂາຍ​ກັບ​ຄືນ​ຈາກ​ການ​ຍືມ​ຕົວ ແລະ 18,2% ກ່ຽວ­ຂ້ອງ​ກັບ​ການ​ຊຳ­ລະ​ຄ່າ​ພາ­ສີ​ການ​ຍ້າຍ​ທິມ.

    ລາຍ​ງານ​ຍັງ​ລະ­ບຸ​ອີ​ກວ່າ: ສະ­ໂມ­ສອນ​ໃນ​ປະ­ເທດ​ຊາ​ອຸ​ດິ​ອາ​ຣາ​ບີ ເປັນ​ລີກ​ທີ່​ໃຊ້​ຈ່າຍ​ຊື່-ຂາຍ​ນັກ​ເຕະ​ສູງ​ຮອງ​ຈາກ 5 ລີກ​ຊັ້ນ​ນຳ​ຂອງ​ເອີ​ຣົບ ລວມ 152,1 ລ້ານ​ໂດ​ລາ ເພີ່ມ​ຂຶ້ນ 48,5% ຈາກ​ປີ 2017.

ຂ່າວທີ່ກ່ຽວຂ້ອງ