ຂ່າວຫຼ້າສຸດ

ເວທີມວຍຕະຫຼາດຫ້ວຍຫົງ ສົ່ງເສີມ-ພັດທະນານັກກີລາສູ່ອາຊີບ

299 18 ກ.ຍ. 2018 ວົງຈອນກີລາ
ເວທີມວຍຕະຫຼາດຫ້ວຍຫົງ ສົ່ງເສີມ-ພັດທະນານັກກີລາສູ່ອາຊີບ

    ເວ­ທີ​ມວຍ​ຕະ­ຫຼາດ​ຫ້ວຍ​ຫົງ ເປັນ​ສະ­ໜາມ​ກີ­ລາ​ມວຍ​ແຫ່ງ​ໃໝ່​ໃນ​ນະ­ຄອນ­ຫຼວງ​ວຽງ​ຈັນ (ນວ) ກຽມ­ພ້ອມ​ຈະ​ສ້າງ​ສີ­ສັນ ສົ່ງ­ເສີມ ແລະ ພັດ­ທະ­ນາ​ວົງ​ການ​ກີ­ລາ​ມວຍ​ລາວ ພາຍ­ຫຼັງ​ໄດ້​ເປີດ​ນຳ​ໃຊ້​ແຕ່​ວັນ​ທີ 1 ກັນ­ຍາ 2018 ຢູ່​ຕະ­ຫຼາດ​ຫ້ວຍ​ຫົງ ເມືອງ​ຈັນ­ທະ​ບູ​ລີ ນວ ພ້ອມ​ທັງ​ຈະ​ຈັດ​ແຂ່ງ­ຂັນ​ຢ່າງ​ຕໍ່​ເນື່ອງ ເພື່ອ​ສ້າງ​ນັກ​ມວຍ​ໃຫ້​ກາຍ­ເປັນ​ນັກ­ກີ­ລາ​ອາ­ຊີບ.

    ທ່ານ ສຸ​ລີ ມີ​ລະ​ໄພ ເຈົ້າ​ຂອງ​ເວ­ທີ​ມວຍ​ຕະ­ຫຼາດ​ຫ້ວຍ​ຫົງ ກ່າວ​ວ່າ: ມວຍ​ເປັນ​ວັດ­ທະ­ນະ­ທຳ​ປະ­ເພ­ນີ​ຕັ້ງ­ແຕ່​ສະ­ໄໝ​ບູ­ຮານ ເປັນ​ສິ­ລະ​ປະ​ປ້ອງ​ກັນ​ຕົວ​ຂອງ​ຄົນ​ລາວ ການ​ຫຼິ້ນ​ກີ­ລາ​ມວຍ​ຍັງ​ເປັນ​ການ​ອອກ­ກຳ­ລັງ​ກາຍ ເມື່ອ​ເຫັນ​ໄດ້​ຄວາມ​ສຳ­ຄັນ​ດັ່ງ­ກ່າວ ພວກ​ເຮົາ​ຈຶ່ງ​ໄດ້​ສ້າງ­ຕັ້ງ​ເວ­ທີ​ມວຍ​ແຫ່ງ​ນີ້​ຂຶ້ນ​ມາ ໂດຍ​ໄດ້​ຈັດ​ແຂ່ງ­ຂັນ 1 ຄັ້ງ​ຕໍ່​ອາ­ທິດ ເພື່ອ​ເຮັດ​ໃຫ້​ນັກ­ກີ­ລາ​ມວຍ​ໄດ້​ເຝິກ­ຊ້ອມ ແລະ ແຂ່ງ­ຂັນ​ຢ່າງ​ຕໍ່​ເນື່ອງ ກ້າວ​ໄປ​ສູ່​ການ​ພັດ­ທະ­ນາ​ທີ່​ດີ​ໃນ​ອະ­ນາ­ຄົດ ນອກ​ນີ້​ຍັງ​ເປັນ​ສະ­ຖານ­ທີ່​ເພື່ອ​ທົດ​ສອບ​ຄວາມ​ພ້ອມ​ຂອງ​ນັກ­ກີ­ລາ ນວ ເພື່ອ​ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຢູ່​ແຂວງ​ຊຽງ​ຂວາງ ທ້າຍ​ປີ​ນີ້.

    ທ່ານ ວັນ­ນະ​ເດດ ແກ້ວ​ວຽງ​ຄຳ ຜູ້­ອຳ­ນວຍ­ການ​ບໍ­ລິ­ສັດ ລາວ​ວິ​ຊັນ ຈຳ­ກັດ ປະ­ທານ​ສະ­ໂມ­ສອນ​ມວຍ​ລາວ​ອາ­ຊີບ ນວ ກ່າວ​ວ່າ: ສະ­ໂມ­ສອນ​ມວຍ​ອາ­ຊີບ ນວ ໄດ້​ຮັບ​ອະ­ນຸ­ຍາດ​ສ້າງ­ຕັ້ງ​ຂຶ້ນ​ແຕ່​ປີ 2014 ເປັນ­ຕົ້ນ​ມາ ພາຍ​ໃຕ້​ການ​ຊີ້​ນຳ​ຂອງ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ໄດ້​ມີ​ການ­ເຄື່ອນ­ໄຫວ​ໃນ​ຂອບ​ເຂດ ນວ ເຖິງ​ປັດ­ຈຸ­ບັນ ເພື່ອ​ເປັນ​ການ​ຕໍ່​ຍອດ​ໃນ​ການ​ສ້າງ​ນັກ­ກີ­ລາ​ມວຍ​ໃຫ້​ມີ​ບາດ­ກ້າວ​ຂະ­ຫຍາຍ­ຕົວ​ທຽບ​ເທົ່າ​ກັບ​ປະ­ເທດ​ອື່ນ ທັງ​ເຮັດ​ໃຫ້​ນັກ­ກີ­ລາ​ລາວ​ໄດ້​ຫຼຽນ​ໃດ​ຫຼຽນ​ໜຶ່ງ ໃນ​ມະ​ຫະ​ກຳ​ກີ­ລາ​ນາໆຊາດ ເປັນ­ຕົ້ນ ຊີ­ເກມ ເອ​ຊຽນ​ເກມ ຫຼື ໂອ​ແລມ​ປິກ.

    ພວກ​ເຮົາ​ຫວັງ​ວ່າ​ເວ­ທີ​ມວຍ​ແຫ່ງ​ນີ້ ຈະ​ເປັນ​ແມ່​ແບບ ຫຼື ຈຸດ​ລິ​ເລີ່ມ​ໃຫ້​ຜູ້​ທີ່​ມີ​ຄວາມ​ມັກ​ຮັກ​ວົງ​ການ​ກີ­ລາ​ມວຍ​ລາວ ຫຼື ຜູ້​ທີ່​ມີ​ທ່າ­ແຮງ​ພຽງ­ພໍ​ໃນ​ການ​ສ້າງ​ສະ­ໜາມ​ມວຍ​ໃນ​ຂອບ​ເຂດ​ທົ່ວ​ປະ­ເທດ ແນ່­ນອນ ອະ­ນາ­ຄົດ​ວົງ​ການ​ກີ­ລາ​ມວຍ​ລາວ ຈະ​ມີ​ນັກ­ກີ­ລາ​ທີ່​ມີ​ພອນ​ສະ­ຫວັນ​ໂດດ​ເດັ່ນ​ຫຼາຍ​ຂຶ້ນ ມີ​ນັກ­ກີ­ລາ​ໃໝ່ໆ​ເກີດ​ຂຶ້ນ ເພື່ອ​ກ້າວ​ໄປ​ສູ່​ການ​ເປັນ​ນັກ­ກີ­ລາ​ອາ­ຊີບ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ