ຢູ-19 ສາວລາວ ກຽມຮ່ວມບານເຕະ ເອເອັຟຊີ ຮອບຄັດເລືອກ

297 19 ກ.ຍ. 2018 ວົງຈອນກີລາ
ຢູ-19 ສາວລາວ ກຽມຮ່ວມບານເຕະ ເອເອັຟຊີ ຮອບຄັດເລືອກ

    ອີງ​ຕາມ​ຂໍ້​ມູນ​ຈາກ​ເວັບ​ໄຊ ສະ­ຫະ­ພັນ​ກີ­ລາ​ບານ­ເຕະ​ອາ­ຊີ ລະ­ບຸ​ໃຫ້​ຊາບ​ວ່າ: ການ​ແຂ່ງ­ຂັນ​ບານ­ເຕະ​ຍິງ ຮຸ່ນ​ອາ­ຍຸ​ບໍ່​ເກີນ 19 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ (AFC U-19 WOMEN’S CHAMPIONSHIP 2019) ໂດຍ​ຮອບ​ທຳ​ອິດ​ມີ​ທັງ​ໝົດ 27 ປະ­ເທດ ທີ່​ຜ່ານ​ການ​ຄັດ​ເລືອກ​ມາ​ໃນ​ປີ 2017 ໄດ້​ຖືກ​ຈັບ​ສະ­ຫຼາກ​ແບ່ງ​ອອກ​ເປັນ 6 ກຸ່ມ​ເປັນ​ທີ່​ຮຽບ​ຮ້ອຍ​ແລ້ວ ໃນ​ນັ້ນ ທີມ​ຊາດ​ລາວ​ຮຸ່ນ​ອາ­ຍຸ​ບໍ່​ເກີນ 16 ປີ ທີ່​ສາ­ມາດ​ສ້າງ​ຜົນ­ງານ​ຜ່ານ​ສູ່​ຮອບ 2 ໄດ້​ໃນ​ການ​ແຂ່ງ­ຂັນ​ເຕະ­ບານ​ຍິງ ຮຸ່ນ​ອາ­ຍຸ​ບໍ່​ເກີນ 16 ປີ ຊີງ​ແຊັມ​ອາ­ຊີ 2017 ທີ່​ປະ­ເທດ​ໄທ​ເປັນ​ເຈົ້າ­ພາບ​ຜ່ານ​ມາ ດ້ວຍ​ການ​ຄວ້າ​ອັນ​ດັບ 2 ຂອງ​ກຸ່ມ​ເອ ຖືກ​ຈັບ​ສະ­ຫຼາກ​ຢູ່​ກຸ່ມ​ເອັຟ ຮ່ວມ​ກັບ​ເຈົ້າ­ພາບ​ທີມ​ຊາດ​ມຽນ​ມາ ທີມ​ຊາດ​ອີ​ຣານ ແລະ ທີມ​ຊາດ​ປາ​ແລັດ​ສະ​ຕິນ ໂດຍ​ຮອບ​ຄັດ​ເລືອກ​ຂອງ​ກຸ່ມ​ເອັຟ ຈະ​ຈັດ​ຂຶ້ນ​ທີ່​ປະ­ເທດ​ມຽນ​ມາ ໃນ​ວັນ​ທີ 24-28 ຕຸ­ລາ 2018.

    ການ​ແຂ່ງ­ຂັນ​ບານ­ເຕະ​ຍິງ​ຮຸ່ນ ອາ­ຍຸ​ບໍ່​ເກີນ 19 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ ທີ່​ປະ­ເທດ​ມຽນ​ມາ​ເປັນ​ເຈົ້າ­ພາບ ສະ­ຫະ­ພັນ​ກີ­ລາ​ບານ­ເຕະ​ແຫ່ງ​ຊາດ​ລາວ ຕົກ­ລົງ​ແຕ່ງ­ຕັ້ງ​ທ່ານ ວົງ​ມີ​ໄຊ ສຸ​ບົວ​ຄຳ ຄູ​ເຝິກ​ໃຫຍ່​ທີມ​ບານ­ເຕະ​ຍິງ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 16 ປີ ໃນ​ປີ 2017 ທີ່​ສາ­ມາດ​ພາ​ທີມ​ເຂົ້າ​ມາ­ສູ່​ຮອບ​ນີ້​ໄດ້ ໃຫ້​ສືບ­ຕໍ່​ສ້າງ​ຜົນ­ງານ​ຕໍ່​ໄປ ໂດຍ​ທ່ານ ວົງ​ມີ​ໄຊ ສຸ​ບົວ​ຄຳ ໄດ້​ນຳ­ພາ​ນັກ­ກີ­ລາ​ເຝິກ­ຊ້ອມ​ມາ​ແຕ່​ຕົ້ນ​ເດືອນ​ສິງ­ຫາ 2018 ເຊິ່ງ​ທີມ​ຊຸດ​ນີ້ ທາງ​ຄູ​ເຝິກ​ໃຫຍ່​ແມ່ນ​ໄດ້​ເນັ້ນ​ນັກ­ກີ­ລາ​ຮຸ່ນ​ອາ­ຍຸ​ບໍ່​ເກີນ 16 ປີ ໃນ​ປີ 2017 ປະ­ສົມ​ປະ­ສານ​ກັບ​ນັກ​ເຕະ​ໜ້າ​ໃໝ່​ຈຳ­ນວນ​ໜຶ່ງ ເຂົ້າ​ຮ່ວມ​ການ​ແຂ່ງ­ຂັນ.

ຂ່າວທີ່ກ່ຽວຂ້ອງ