ຂ່າວຫຼ້າສຸດ

ຊົມເຊີຍ ຮົ້ວຂອງຊາດ

587 19 ກ.ຍ. 2018 ນານາສາລະ

    ຄຳ​ວ່າ​ຮົ້ວ​ຂອງ​ຊາດ​ເຂົ້າ­ໃຈ​ວ່າ​ປະ­ຊາ­ຊົນ​ທັງ​ປະ­ເທດ ປຽບ​ໃຫ້​ອ້າຍ​ນ້ອງ​ທະ­ຫານ​ເປັນ​ຮົ້ວ​ຂອງ​ຊາດ ເຊິ່ງ​ທັງ​ເຮັດ​ໜ້າ­ທີ່​ຕໍ່­ສູ້​ສັດ­ຕູ ແລະ ຊ່ວຍ­ເຫຼືອ​ປະ­ຊາ­ຊົນ ເຊັ່ນ ໃນ​ມິວ​ສິກ​ເພງ​ດັງ​ເພງ​ໜຶ່ງ... ຮ້ອງ​ວ່າ!! ກ່ຽວ​ໄວ ພວກ​ເຮົາ​ກ່ຽວ​ໄວ !! ກໍ່​ຈະ​ເຫັນ​ອ້າຍ​ນ້ອງ​ທະ­ຫານ​ກ່ຽວ​ເຂົ້າ​ຊ່ວຍ​ປະ­ຊາ­ຊົນ ເຊິ່ງ​ເບິ່ງ​ແລ້ວ​ກໍ່​ແມ່ນ​ພາບ​ປະ​ທັບ​ໃຈ ບອກ​ເຖິງ​ຄວາມ​ສາ­ມັກ­ຄີ ພ້ອມ​ກັນ​ສ້າງ­ສາ​ພັດ­ທະ­ນາ​ບ້ານ​ເມືອງ ດັ່ງ­ນັ້ນ ທະ­ຫານ​ບໍ່​ພຽງ​ແຕ່​ແມ່ນ​ຮົ້ວ​ຂອງ​ຊາດ ແຕ່​ຍັງ​ແມ່ນ​ຜູ້​ປົກ​ປ້ອງ​ຊ່ວຍ­ເຫຼືອ​ປະ­ຊາ­ຊົນ​ໃນ​ການ​ສ້າງ​ຢູ່​ທຳ​ກິນ.

    ສະ­ພາບ​ການ​ຜ່ານ​ມາ ແລະ ປັດ­ຈຸ­ບັນ ພວກ​ເຮົາ​ຈະ​ເຫັນ​ອ້າຍ​ນ້ອງ​ທະ­ຫານ​ບຸກ​ບືນ​ລົງ​ຊ່ວຍ­ເຫຼືອ​ປະ­ຊາ­ຊົນ​ຜູ້​ປະ­ສົບ​ໄພ​ນ້ຳ​ຖ້ວມ ຍິ່ງ​ເປັນ​ພາບ​ສະ­ທ້ອນ​ໃຫ້​ໝາກ​ຫົວ­ໃຈ​ຂອງ​ເຮົາ​ຮັບ​ຮູ້​ວ່າ ທະ­ຫານ​ບໍ່​ພຽງ​ເປັນ​ຮົ້ວ​ຂອງ​ຊາດ ແຕ່​ຍັງ​ແມ່ນ​ຮົ້ວ​ຂັນ​ອາ­ສາ​ຊ່ວຍ­ເຫຼືອ​ປະ­ຊາ­ຊົນ​ຍາມ​ປະ­ສົບ​ໄພ ແລະ ຍອມ​ເປັນ​ຮົ້ວ​ປ້ອງ​ກັນ​ໄພ​ໃຫ້​ປະ­ຊາ­ຊົນ​ໄດ້​ຮັບ​ຄວາມ​ອົບ​ອຸ່ນ​ມີ​ສຸກ ຜູ້​ຂຽນ​ເຄີຍ​ນັ່ງ​ລົດ​ໄປ​ເຮັດ​ວຽກ​ນຳ​ຍາ​ທ່ານ ຜ່ອງ ສະ​ມະ​ເລິກ ອາ​ດີດ​ປະ­ທານ ອພສ ສູນ​ກາງ ເວ­ລາ​ອອກ​ຕ່າງ​ແຂວງ ທັງ​ໄປ ແລະ ກັບ ເພີ່ນ​ມັກ​ຈະ​ຫໍ່​ເອົາ​ເຄື່ອງ​ຢູ່​ແນວ​ກິນ ທັງ​ແວະ​ຊື້​ເຂົ້າ­ໜົມ​ຢາ­ສູບ​ຂ້າງ​ທາງ ເພື່ອ​ໄປ​ຝາກ​ຕ້ອນ​ພວກ​ທະ­ຫານ​ທີ່­ຢູ່​ປ້ອມ​ຍາມ​ຂ້າງ​ທາງ ແລະ ເປີ້ນ­ພູ (ເວ­ລາ​ຂຶ້ນ​ເໜືອ) ຫຼັງ​ຈາກ​ມອບ​ເຄື່ອງ​ໃຫ້​ພວກ​ອ້າຍ​ນ້ອງ​ທະ­ຫານ​ແລ້ວ ເພີ່ນ​ມັກ​ຈະ​ອ່ວຍ​ໜ້າ​ມາ​ບອກ ພວກ​ເຮົາ​ວ່າ: ພວກ​ເຂົາ​ຄື​ຮົ້ວ​ຂອງ​ຊາດ ຮັກ­ສາ​ຄວາມ​ປອດ​ໄພ​ໃຫ້​ພວກ​ເຮົາ.

    ຜູ້​ຂຽນ​ໄດ້​ອ່ານ­ໜັງ­ສື​ພິມ​ກອງ­ທັບ​ຜ່ານ​ມາ ກໍ່​ໄດ້​ຮູ້​ຂ່າວ​ວ່າ: ກົມ​ໃຫຍ່​ການ­ເມືອງ​ກອງ­ທັບ ໄດ້​ອອກ​ຄຳ​ສັ່ງ​ເລກ​ທີ 380/ກມທ ລົງ​ວັນ​ທີ 27 ກໍ­ລະ­ກົດ 2018 ເຊິ່ງ​ບັນ­ດາ​ອົງ­ການ ກົມ​ໃຫຍ່ ກອງ​ບັນ­ຊາ​ການ​ທະ­ຫານ​ແຂວງ ນະ­ຄອນ­ຫຼວງ ກອງ​ພົນ​ກອງ­ພັນ​ໃຫຍ່ ໂຮງ­ຮຽນ... ບັນ­ດາ​ກົມ​ກອງ​ທຽບ​ເທົ່າ​ທົ່ວ​ປະ­ເທດ ວ່າ​ດ້ວຍ​ການ​ເພີ່ມ​ທະ­ວີ ການ​ສຶກ​ສາ​ອົບ­ຮົມ​ແນວ​ຄິດ ກຽມ­ພ້ອມ​ຕອບ​ຕ້ານ ແລະ ແກ້​ໄຂ​ຜົນ​ກະ­ທົບ​ຈາກ​ໄພ­ພິ­ບັດ​ທາງ​ທຳ​ມະ​ຊາດ... ພວກ​ເຮົາ​ຈະ​ເຫັນ​ວ່າ ຢູ່​ໃນ​ຫຼາຍ​ເຫດ­ການ​ໄພ­ພິ­ບັດ​ເກີດ​ຂຶ້ນ​ທັງ​ໃຕ້ ແລະ ເໜືອ ຈະ​ເຫັນ​ອ້າຍ​ນ້ອງ​ທະ­ຫານ​ຈາກ​ກົມ​ກອງ​ຕ່າງໆ ໄດ້​ມາ​ບຸກ​ບືນ​ຊ່ວຍ­ເຫຼືອ​ປະ­ຊາ­ຊົນ ດັ່ງ­ນັ້ນ ມູນ​ຄ່າ​ທີ່​ປະ​ເມີນ​ບໍ່​ໄດ້ ພ້ອມ​ກັບ​ພາບ​ປະ​ທັບ​ໃຈ​ດັ່ງ­ກ່າວ ກໍ່​ສາ­ມາດ​ເຮັດ​ໃຫ້​ເຮົາ​ປະ​ທັບ​ລົງ​ໃນ​ດວງ​ໃຈ​ໄປ​ຕະ­ຫຼອດ​ການ.

    ຄໍ​ລຳ​ພວກ​ເຮົາ​ຈຶ່ງ​ຂໍ​ຊົມ­ເຊີຍ​ອ້າຍ​ນ້ອງ​ທະ­ຫານ ແລະ ຂໍ​ໃຫ້​ທຸກ​ພາກ­ສ່ວນ​ໄດ້​ເຫັນ​ຄວາມ​ສຳ­ຄັນ ຮົ້ວ​ຂອງ​ຊາດ ຫາກ​ມີ​ໂອ­ກາດ​ກໍ່​ຄວນ​ໄດ້​ປະ­ຕິ­ບັດ​ແບບ​ຍາ​ທ່ານ ຜ່ອງ ສະ​ມະ​ເລິກ ເພິ່ນ​ເຮັດ​ເປັນ​ແບບ­ຢ່າງ​ໄວ້​ແລ້ວ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ