ຂ່າວຫຼ້າສຸດ

ຄະນະສັນຕິພາບ ແລະ ສາມັກຄີລາວ ປະກອບສ່ວນສຳຄັນໃນການແກ້ໄຂບັນຫາຂອງສາກົນ

275 21 ກ.ຍ. 2018 ຂ່າວໜ້າ​ໜຶ່ງ
ຄະນະສັນຕິພາບ ແລະ ສາມັກຄີລາວ ປະກອບສ່ວນສຳຄັນໃນການແກ້ໄຂບັນຫາຂອງສາກົນ

    ທ່ານ ສົມ​ພັນ ແພງ​ຄຳ​ມີ ຮອງ​ປະ­ທານ​ສະ­ພາ​ແຫ່ງ​ຊາດ ປະ­ທານ​ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ໃຫ້​ສຳ­ພາດ​ກ່ຽວ​ກັບ​ວັນ​ສ້າງ­ຕັ້ງ​ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ຄົບ­ຮອບ 35 ປີ (1/8/1983-1/8/2018) ແລະ ວັນ​ສາ­ກົນ​ເພື່ອ​ສັນ­ຕິ­ພາບ 21 ກັນ­ຍາ ໃນ​ວັນ​ທີ 20 ກັນ­ຍາ 2018 ຢູ່​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ໂດຍ​ມີ​ທ່ານ​ນາງ ຄຳ​ຈັນ ພົມ​ແສງ​ສະ­ຫວັນ ຮອງ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ກຳ­ມະ­ການ​ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ໄດ້​ຈັດ​ຕັ້ງ ແລະ ເຄື່ອນ​ໄຫວ​ຜ່ານ 3 ໄລ­ຍະ​ຄື: ກ່ອນ​ປີ 1983 ປີ 1983-1999 ແລະ ປີ 1999-ປັດ­ຈຸ­ບັນ ເຊິ່ງ 35 ປີ­ຜ່ານ­ມາ ໄດ້​ເປີດ​ກວ້າງ​ການ​ພົວ­ພັນ ແລະ ຮ່ວມ​ມື​ແບບ​ສອງ​ຝ່າຍ​ຫຼາຍ​ຝ່າຍ ແລະ ບັນ­ດາ​ອົງ​ການ­ຈັດ­ຕັ້ງ​ສັນ­ຕິ­ພາບ ສາ­ມັກ­ຄີ ແລະ ມິດ­ຕະ­ພາບ ແລະ ອົງ​ການ­ຈັດ­ຕັ້ງ​ອື່ນ​ໃນ​ຕ່າງ­ປະ­ເທດ ເພື່ອ​ສົ່ງ­ເສີມ​ສັນ­ຕິ­ພາບ ມິດ­ຕະ­ພາບ ແລະ ຄວາມ​ເຂົ້າ­ໃຈ​ເຊິ່ງ​ກັນ ແລະ ກັນ ນອກ​ນີ້​ຍັງ​ໄດ້​ເຄື່ອນ​ໄຫວ​ປະ­ກອບ­ສ່ວນ​ຕໍ່­ສູ້​ເພື່ອ​ເສີມ​ສ້າງ​ສັນ­ຕິ­ພາບ ສາ­ມັກ­ຄີ ມິດ­ຕະ­ພາບ​ກັບ​ປະ­ຊາ​ຊາດ ແລະ ສະ­ໜັບ­ສະ­ໜູນ​ການ​ຕໍ່­ສູ້​ອັນ​ເປັນ​ທຳ​ຂອງ​ບັນ­ດາ​ປະ­ຊາ​ຊາດ ເພື່ອ​ສັນ­ຕິ­ພາບ ເອ­ກະ­ລາດ​ແຫ່ງ​ຊາດ ອະ­ທິ­ປະ​ໄຕ ແລະ ການ​ຮ່ວມ​ມື ເພື່ອ​ການ​ພັດ­ທະ­ນາ​ຄວາມ​ກ້າວ­ໜ້າ​ທາງ​ສັງ­ຄົມ ແນ­ໃສ່​ສ້າງ​ລະ­ບຽບ​ການ​ສາ­ກົນ​ໃໝ່​ທີ່​ຖືກ­ຕ້ອງ ແລະ ເປັນ​ທຳ ບົນ​ພື້ນ­ຖານ​ຫຼັກ­ການ​ຢູ່​ຮ່ວມ​ກັນ​ໂດຍ​ສັນ­ຕິ ແລະ ຄັດ­ຄ້ານ​ການ​ຊ່ວງ​ເສັງ​ປະ­ກອບ​ອາ­ວຸດ​ທຸກ​ຮູບ​ແບບ ການ​ໃຊ້​ກຳ­ລັງ​ຮຸນ​ແຮງ​ແກ້​ໄຂ​ບັນ­ຫາ​ລວມ​ທັງ​ກໍ­ລະ­ນີ​ພິ­ພາດ​ຕ່າງໆ ເຊິ່ງ​ເປັນ​ການ​ນາບ​ຂູ່​ຕໍ່​ສັນ­ຕິ­ພາບ ແລະ ຄວາມ​ໝັ້ນ­ຄົງ​ໃນ​ພາກ​ພື້ນ ແລະ ໃນ​ໂລກ.

    ວັນ​ສ້າງ­ຕັ້ງ​ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ (1 ສິງ­ຫາ) ແລະ ວັນ​ສາ­ກົນ​ເພື່ອ​ສັນ­ຕິ­ພາບ (21 ກັນ­ຍາ) ໂດຍ​ຈັດ​ປາ­ຖະ­ກະ­ຖາ​ເລົ່າ​ມູນ­ເຊື້ອ​ກ່ຽວ​ກັບ​ສັນ­ຕິ­ພາບ​ຈັດ​ຍ່າງ​ສັນ­ຕິ­ພາບ ຈັດ​ແຂ່ງ­ຂັນ​ແຕ້ມ​ຮູບ​ກ່ຽວ​ກັບ​ສັນ­ຕິ­ພາບ ເຜີຍ­ແຜ່​ວຽກ​ງານ​ສັນ­ຕິ­ພາບ​ໃຫ້​ຊາວ​ໜຸ່ມ​ເຍົາ­ວະ​ຊົນ ພະ­ນັກ­ງານ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ​ໄດ້​ຮັບ​ຮູ້​ເຂົ້າ­ໃຈ ແລະ ເຫັນ​ໄດ້​ເຖິງ​ຄວາມ​ສຳ­ຄັນ​ຂອງ​ວຽກ​ງານ​ສັນ­ຕິ­ພາບ ເຊິ່ງ​ຍາມ​ໃດ​ກໍ່​ຕິດ​ພັນ​ກັບ​ການ​ພັດ­ທະ­ນາ ນອກ​ນີ້​ຍັງ​ໄດ້​ຈັດ​ກິດ­ຈະ­ກຳ​ລະ­ດົມ​ປັດ​ໄຈ ເພື່ອ​ຊ່ວຍ­ເຫຼືອ​ຜູ້​ປະ­ສົບ​ໄພ​ທຳ​ມະ​ຊາດ​ຢູ່​ພາຍ​ໃນ ແລະ ຕ່າງ­ປະ­ເທດ ເຊັ່ນ: ສະ­ແດງ​ສິ­ລະ​ປະ​ຊ່ວຍ­ເຫຼືອ​ປະ­ຊາ­ຊົນ 3 ແຂວງ​ພາກ​ໃຕ້ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ປີ 2009 ຊ່ວຍ­ເຫຼືອ​ປະ­ຊາ­ຊົນ​ປະ­ເທດ​ໄຮ​ຕິ ທີ່​ປະ­ສົບ​ແຜ່ນ­ດິນ​ໄຫວ​ປີ 2010 ແລະ ຊ່ວຍ­ເຫຼືອ​ປະ­ຊາ­ຊົນ​ຍີ່­ປຸ່ນ ທີ່​ປະ­ສົບ​ໄພ​ສຶ​ນາ​ມິ ປີ 2011.

    ຍ້ອນ​ການ­ເຄື່ອນ­ໄຫວ​ຢ່າງ​ຫ້າວ­ຫັນ ແລະ ປະ­ກອບ­ສ່ວນ​ສຳ­ຄັນ​ໃນ​ການ​ແກ້​ໄຂ​ບັນ­ຫາ​ຂອງ​ສາ­ກົນ ແລະ ເຫັນ​ໄດ້​ນິ­ໄສ​ໃຈ­ຄໍ​ຂອງ​ປະ­ຊາ­ຊົນ​ລາວ ທີ່​ມີ​ຈິດ­ໃຈ​ໂອບ​ເອື້ອ​ອາ­ລີ ມັກ​ຄວາມ​ສະ­ຫງົບ ແລະ ຄວາມ​ເປັນ​ທຳ ຄະ­ນະ​ສັນ­ຕິ­ພາບ​ໂລກ ອິນ​ໂດ​ເນ​ເຊຍ ຈຶ່ງ​ໄດ້​ມອບ “ຄ້ອງ​ສັນ­ຕິ­ພາບ​ໂລກ” ໃຫ້ ສປປ ລາວ ປີ 2008 ເຊິ່ງ​ເປັນ​ປະ­ເທດ​ທຳ​ອິດ​ໃນ​ປະ­ເທດ​ສະ­ມາ­ຊິກ​ອາ​ຊຽນ ແລະ ເປັນ​ປະ­ເທດ​ທີ 4 ໃນ​ໂລກ​ທີ່​ໄດ້​ຮັບ​ລາ­ງວັນ​ອັນ​ຊົງ​ກຽດ​ດັ່ງ­ກ່າວ ຈາກ​ຄະ­ນະ​ກຳ­ມະ­ການ​ສັນ­ຕິ­ພາບ​ໂລກ​ອິນ​ໂດ​ເນ​ເຊຍ ປັດ­ຈຸ­ບັນ ຄ້ອງ​ດັ່ງ­ກ່າວ​ປະ­ດິດ­ສະ­ຖານ​ໄວ້​ຢູ່​ສວນ​ປະ­ຕູ​ໄຊ.

    ວັນ​ສາ­ກົນ​ເພື່ອ​ສັນ­ຕິ­ພາບ 21 ກັນ­ຍາ ໃນ​ຊຸມ​ປີ​ທ້າຍ​ສະ­ຕະ­ວັດ​ທີ 20 ແລະ ຕົ້ນ​ສະ­ຕະ­ວັດ​ທີ 21 ຂະ​ບວນ​ການ​ຕໍ່­ສູ້​ຕ້ານ​ສົງ­ຄາມ ສະ­ແຫວງ­ຫາ​ສັນ­ຕິ­ພາບ​ຂອງ​ປະ­ຊາ­ຊົນ​ຜູ້​ຮັກ­ຫອມ​ສັນ­ຕິ­ພາບ ໃຕ້​ການ​ປຸກ­ລະ­ດົມ​ຊຸກ­ຍູ້​ຂອງ​ສະ­ພາ​ສັນ­ຕິ­ພາບ​ໂລກ ໄດ້​ກາຍ­ເປັນ​ກະ­ແສ​ຟອງ​ປະ­ຕິ­ວັດ​ທີ່​ຟົດ­ຟື້ນ​ແຂງ­ແຮງ​ໃນ​ທົ່ວ​ໂລກ ກອງ​ປະ­ຊຸມ​ສະ­ມັດ­ຊາ​ໃຫຍ່​ຂອງ​ອົງ­ການ​ສະ­ຫະ​ປະ­ຊາ​ຊາດ ຄັ້ງ​ທີ 55 ຢູ່​ນິວ​ຢອກ ສ ອາ​ເມ​ຣິ​ກາ ບັນ­ດາ​ລັດ​ສະ­ມາ­ຊິກ​ຂອງ​ອົງ­ການ​ສະ­ຫະ​ປະ­ຊາ​ຊາດ ໃນ​ນີ້​ມີ ສປປ ລາວ ໄດ້​ຕົກ­ລົງ​ຮັບ­ຮອງ​ເອົາ​ມະ­ຕິ ເລກ​ທີ 55/282 ມີ​ເນື້ອ​ໃນ​ຕົ້ນ­ຕໍ​ດັ່ງ­ນີ້: ຕົກ­ລົງ​ຮັບ­ຮອງ​ເອົາ​ວັນ​ທີ 21 ກັນ­ຍາ​ຂອງ​ແຕ່​ລະ​ປີ ເປັນ​ວັນ​ສະ­ເຫຼີມ­ສະ­ຫຼອງ​ວັນ​ສັນ­ຕິ­ພາບ​ໂລກ ໂດຍ​ປະ­ຕິ­ບັດ​ຕາມ​ມະ­ຕິ​ກອງ​ປະ­ຊຸມ​ສະ­ມັດ­ຊາ​ໃຫຍ່ ອົງ­ການ​ສະ­ຫະ​ປະ­ຊາ​ຊາດ ເພື່ອ​ຈັດ​ຕັ້ງ​ການ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ປະ­ກາດ​ເອົາ​ວັນ​ສັນ­ຕິ­ພາບ​ໂລກ (21 ກັນ­ຍາ) ເປັນ​ວັນ​ຢຸດ­ຕິ​ການ​ສູ້​ຮົບ​ທົ່ວ​ໂລກ ແລະ ບໍ່​ໃຊ້​ຄວາມ​ຮຸນ​ແຮງ ຄຽງ​ຄູ່​ກັນ​ນັ້ນ ຍັງ​ເຊີນ­ຊວນ​ໃຫ້​ບັນ­ດາ​ປະ­ຊາ​ຊາດ ແລະ ປະ­ຊາ­ຊົນ​ທົ່ວ​ໂລກ​ໃຫ້​ຢຸດ­ຕິ​ຄວາມ​ເປັນ​ສັດ­ຕູ​ຕໍ່​ກັນ​ຕະ­ຫຼອດ​ວັນ ເຊື້ອ​ເຊີນ​ໃຫ້​ບັນ­ດາ​ປະ­ເທດ​ສະ­ມາ­ຊິກ ບັນ­ດາ​ອົງ​ການ­ຈັດ­ຕັ້ງ​ຂອງ​ສະ­ຫະ​ປະ­ຊາ​ຊາດ​ປະ­ຈຳ​ຂົງ­ເຂດ ແລະ ອົງ​ການ­ຈັດ­ຕັ້ງ​ທີ່​ບໍ່​ຂຶ້ນ​ກັບ​ລັດ­ຖະ­ບານ​ລວມ​ທັງ​ພາກ​ເອ­ກະ​ຊົນ ຈັດ​ຕັ້ງ​ການ​ສະ­ເຫຼີມ­ສະ­ຫຼອງ​ວັນ​ສັນ­ຕິ­ພາບ​ໂລກ​ດ້ວຍ​ວິ­ທີ​ການ ແລະ ຮູບ​ການ​ທີ່​ເໝາະ​ສົມ ໂດຍ​ຜ່ານ​ການ​ໂຄ­ສະ­ນາ​ສຶກ​ສາ​ອົບ­ຮົມ​ເຜີຍ­ແຜ່​ໃຫ້​ສາ​ຊະ­ນະ​ຊົນ​ຮັບ​ຮູ້ ແລະ ຮ່ວມ​ມື​ກັບ​ອົງ­ການ​ສະ­ຫະ​ປະ­ຊາ​ຊາດ.

    ໃນ​ຖາ­ນະ​ທີ່​ເປັນ​ສະ­ມາ­ຊິກ​ຂອງ​ສະ­ພາ​ສັນ­ຕິ­ພາບ​ໂລກ ແລະ ເປັນ​ສະ­ມາ­ຊິກ​ຂອງ​ອົງ­ການ​ສະ­ຫະ​ປະ­ຊາ​ຊາດ ຜ່ານ​ມາ​ທຸກໆ​ປີ ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ກໍ່​ໄດ້​ປະ­ຕິ­ບັດ​ຕາມ​ມະ­ຕິ​ຂອງ​ອົງ­ການ​ສະ­ຫະ​ປະ­ຊາ​ຊາດ ຈັດ​ຕັ້ງ​ການ​ສະ­ເຫຼີມ­ສະ­ຫຼອງ ວັນ​ທີ 21 ກັນ­ຍາ ວັນ​ສັນ­ຕິ­ພາບ​ໂລກ ຕາມ​ຄວາມ​ເໝາະ​ສົມ.

ຂ່າວທີ່ກ່ຽວຂ້ອງ