ເກດຕິຍະ ຜ່ານການຄັດເລືອກເຂົ້າຮ່ວມແຂ່ງຂັນ ດອກປີກໄກ່ໂອແລມປິກເຍົາວະຊົນ

    ອີງ​ຕາມ​ຂໍ້​ມູນ​ສະ­ຫະ­ພັນ​ກີ­ລາ​ດອກ​ປີກ​ໄກ່​ແຫ່ງ​ຊາດ ໃຫ້​ຮູ້​ວ່າ: ທ້າວ ເກດ​ຕິ​ຍະ ແກ້ວ​ໄຊ ນັກ­ກີ­ລາ​ດອກ​ປີກ​ໄກ່ ຮຸ່ນ​ເຍົາ­ວະ​ຊົນ​ຊາຍ ມື​ອັນ​ດັບ 1 ທີມ​ຊາດ​ລາວ ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ​ສົມ​ລາ­ຄາ ຫຼັງ​ສາ­ມາດ​ສ້າງ​ຜົນ­ງານ​ຜ່ານ​ການ​ຄັດ​ເລືອກ ເພື່ອ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ໂອ​ແລມ​ປິກ​ເຍົາ­ວະ​ຊົນ ຄັ້ງ​ທີ 3 ທີ່​ປະ­ເທດ​ອາກ​ຊັງ​ຕິນ ຮັບ​ກຽດ​ເປັນ​ເຈົ້າ­ພາບ​ວັນ​ທີ 6-18 ຕຸ­ລາ 2018 ເຊິ່ງ​ການ​ແຂ່ງ­ຂັນ​ລາຍ­ການ​ນີ້ ມີ​ນັກ­ກີ­ລາ​ດອກ​ປີກ​ໄກ່​ເຍົາ­ວະ​ຊົນ​ລະ­ດັບ​ໂລກ​ຈາກ 45 ປະ­ເທດ ໃນ 5 ທະ­ວີບ​ທົ່ວ​ໂລກ ທີ່​ຜ່ານ​ການ​ຄັດ​ເລືອກ​ເຂົ້າ​ຮ່ວມ​ຢ່າງ​ຫຼວງ­ຫຼາຍ.

    ສຳ­ລັບ​ຜົນ­ງານ​ຫຼ້າ​ສຸດ​ຂອງ​ທ້າວ ເກດ​ຕິ​ຍະ ແກ້ວ​ໄຊ ໃນ​ການ​ແຂ່ງ­ຂັນ​ກີ­ລາ​ດອກ​ປີກ​ໄກ່​ທົ່ວ​ປະ­ເທດ ຄັ້ງ​ທີ 18 ຊີງ​ຂັນ​ທ່ານ​ປະ­ທານ​ສະ­ພາ​ແຫ່ງ​ຊາດ ປະ­ຈຳ​ປີ 2018 ຫຼື ລາຍ­ການ “Beer Lao Open 2018” ໃນ​ວັນ​ທີ 1-5 ສິງ­ຫາ 2018 ມີ​ນັກ­ກີ­ລາ​ເຂົ້າ​ຮ່ວມ​ທັງ​ໝົດ 320 ຄົນ ຈາກ 27 ພາກ­ສ່ວນ​ເຂົ້າ​ຮ່ວມ​ແຂ່ງ­ຂັນ​ທັງ​ໝົດ 12 ລາຍ­ການ ໃນ​ນີ້ ທ້າວ ເກດ​ຕິ​ຍະ ແກ້ວ​ໄຊ ໄດ້​ລົງ​ແຂ່ງ­ຂັນ​ໃນ​ລາຍ­ການ​ຄູ່​ປະ­ສົມ​ຮຸ່ນ​ທົ່ວ​ໄປ ຈັບ​ຄູ່​ກັບ​ນາງ ອອນ​ທູ​ລີ ພວງ­ມາ­ລາ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ ຄູ່​ຂອງ​ທ້າວ ເກດ​ຕິ​ຍະ ແລະ ນາງ ອອນ​ລີ​ທູ ສາ­ມາດ​ຍາດ​ໄດ້​ລາ­ງວັນ​ອັນ​ດັບ​ທີ 3 ມາ​ຄອງ​ໄດ້​ສຳ­ເລັດ ສ່ວນ​ອັນ​ດັບ​ທີ 1 ທ້າວ ນິ­ກອນ ແລະ ນາງ ທິ­ດາ​ຈັນ ສະ­ໂມ­ສອນ​ເຄ​ທີ ອັນ​ດັບ​ທີ 2 ທ້າວ ສຸ​ລິ​ສັກ ແລະ ນາງ ບຸບ­ຜາ​ເກ­ສອນ ສະ­ໂມ­ສອນ​ມັນ​ທາ­ຕຸ​ລາດ.