ຂ່າວຫຼ້າສຸດ

ໂກນບານຍິງລາວ ຫວັງຫຼຽນທອງໃນເອຊຽນ ພາຣາເກມ

244 24 ກ.ຍ. 2018 ວົງຈອນກີລາ

    ທ່ານ ລອນ​ຄຳ ອິນ​ທອງ​ໄຊ ຄູ​ເຝິກ​ກີ­ລາ​ໂກນ​ບານ​ຍິງ​ທີມ​ຊາດ​ລາວ ໃຫ້​ສຳ­ພາດ​ເມື່ອ​ວັນ​ທີ 20 ກັນ­ຍາ 2018 ວ່າ: ຜ່ານ​ການ​ເກັບ​ຕົວ​ເຝິກ­ແອບ​ເປັນ​ເວ­ລາ​ເກືອບ 60 ວັນ ຢູ່​ສະ­ໂມ­ສອນ​ກີ­ລາ​ສູນ​ຟື້ນ​ຟູ​ໜ້າ­ທີ່​ການ ເຫັນ​ວ່າ​ນັກ­ກີ­ລາ​ມີ​ຄວາມ​ພ້ອມ​ເຕັມ 100% ສຳ­ລັບ​ນັກ­ກີ­ລາ​ທີ່​ຈະ​ເດີນ­ທາງ​ໄປ​ຮ່ວມ​ແຂ່ງ­ຂັນ​ກີ­ລາ​ເອ​ຊຽນ ພາ​ຣາ​ເກມ ຄັ້ງ​ທີ 12 ທີ່​ອິນ​ໂດ​ເນ​ເຊຍ ຄັ້ງ​ນີ້ ສ່ວນ​ຫຼາຍ​ເປັນ​ນັກ­ກີ­ລາ​ຊຸດ​ຍາດ​ໄດ້​ຫຼຽນ​ເງິນ ໃນ​ອາ​ຊຽນ ພາ​ຣາ​ເກມ ຄັ້ງ​ທີ 9 ທີ່​ມາ​ເລ​ເຊຍ ໃນ​ປີ 2017 ຜ່ານ​ມາ ຂະ­ນະ​ທີ່​ເປົ້າ​ໝາຍ​ກໍ່​ຫວັງ​ວ່າ​ນັກ­ກີ­ລາ​ຈະ​ສາ­ມາດ​ຄວ້າ​ຫຼຽນ​ທອງ​ໄດ້ ແຕ່​ເຖິງ​ແນວ­ໃດ​ກໍ່​ຕາມ ລາຍ­ການ​ນີ້ ເປັນ​ລາຍ­ການ​ໃຫຍ່​ກວ່າ​ອາ​ຊຽນ ພາ​ຣາ​ເກມ ແຕ່​ກໍ່​ຈະ​ພະ­ຍາ­ຍາມ​ປຸກ­ລະ­ດົມ​ໃຫ້​ນັກ­ກີ­ລາ ເຮັດ​ໃຫ້​ດີ​ທີ່​ສຸດ.

    ຂະ­ນະ​ທີ່​ນາງ ຫຼ້າ ດາ­ລາ​ວົງ ໜຶ່ງ​ໃນ​ນັກ­ກີ­ລາ​ໂກນ​ບານ​ຍິງ ທີມ​ຊາດ​ລາວ ບອກ​ວ່າ: ປັດ­ຈຸ­ບັນ ສະ­ພາບ​ຮ່າງ­ກາຍ ແລະ ຈິດ­ໃຈ ແມ່ນ​ມີ​ຄວາມ​ພ້ອບ​ແລ້ວ​ເກືອບ 100% ພ້ອມ​ທີ່​ຈະ​ເອົາ​ຫຼຽນ​ໃດ​ຫຼຽນ​ໜຶ່ງ​ມາ​ຝາກ​ພີ່­ນ້ອງ​ຊາວ​ລາວ ແນວ­ໃດ​ກໍ່​ຕາມ ຫຼ້າ ດາ­ລາ​ວົງ ຍັງ​ຝາກ​ເຖິງ​ໝູ່​ເພື່ອນ ແລະ ພີ່­ນ້ອງ​ຮ່ວມ​ຊາດ​ລາວ ຊ່ວຍ​ສົ່ງ​ກຳ­ລັງ​ໃຈ​ໃຫ້​ທັບ​ນັກ­ກີ­ລາ​ພິ­ການ​ທີມ​ຊາດ​ລາວ ເວົ້າ​ລວມ ເວົ້າ​ສະ­ເພາະ ກໍ່​ຄື​ທີມ​ກີ­ລາ​ໂກນ​ບານ​ຍິງ​ທີມ​ຊາດ​ລາວ ໃນ​ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ເພື່ອ​ຄວ້າ​ຫຼຽນ​ໃດ​ຫຼຽນ​ໜຶ່ງ​ໃຫ້​ໄດ້​ຕາມ​ເປົ້າ​ໝາຍ.

    ການ​ແຂ່ງ­ຂັນ​ກີ­ລາ​ຄົນ​ພິ­ການ​ລະ­ດັບ​ອາ­ຊີ ຫຼື ເອ​ຊຽນ ພາ​ຣາ​ເກມ ຄັ້ງ​ທີ 12 ຈະ​ຈັດ​ຂຶ້ນ​ລະ­ຫວ່າງ​ວັນ​ທີ 6-13 ຕຸ­ລາ 2018 ທີ່​ນະ­ຄອນ­ຫຼວງ​ຈາ​ກາ​ຕາ ປະ­ເທດ​ອິນ​ໂດ​ເນ​ເຊຍ ໃນ​ຈຳ­ນວນ 18 ປະ­ເພດ​ກີ­ລາ ຂະ­ນະ​ທີ່ ສປປ ລາວ ຈະ​ສົ່ງ 4 ປະ­ເພດ ຄື: ກີ­ລາ​ລອຍ­ນ້ຳ ກີ­ລາ​ແລ່ນ-ລານ ກີ­ລາ​ຍົກ​ນ້ຳ­ໜັກ ແລະ ກີ­ລາ​ໂກນ​ບານ​ຍິງ.

ຂ່າວທີ່ກ່ຽວຂ້ອງ