ກຳມະການໂກນບານລາວຄົນທຳອິດ ທີ່ສອບເສັງຜ່ານລະດັບສາກົນ

270 24 ກ.ຍ. 2018 ວົງຈອນກີລາ
ກຳມະການໂກນບານລາວຄົນທຳອິດ ທີ່ສອບເສັງຜ່ານລະດັບສາກົນ

    ອີງ​ຕາມ​ການ​ໃຫ້​ສຳ­ພາດ​ຂອງ​ທ່ານ​ນາງ ໂດນ ພົມ​ມະ​ວົງ ຜູ້​ຊ່ວຍ​ໂຄງ­ການ​ຄົນ​ພິ­ການ​ອາ­ຊີ​ເພື່ອ​ການ​ພັດ­ທະ­ນາ (ADDP: Asian Development with the Disabled persons) ສັງ­ກັດ​ຢູ່​ໜ່ວຍ​ງານ​ສົ່ງ­ເສີມ​ກີ­ລາ​ຄົນ​ພິ­ການ​ລາວ ໃນ​ອາ­ທິດ​ທີ່​ຜ່ານ​ມາ ໃຫ້​ຊາບ​ວ່າ: ໃນ​ລະ­ຫວ່າງ​ວັນ​ທີ 9-14 ກັນ­ຍາ ຜ່ານ​ມາ ທີ່​ທັບ​ນັກ­ກີ­ລາ​ຄົນ​ພິ­ການ​ໂກນ​ບານ​ລາວ ໄດ້​ເດີນ­ທາງ​ໄປ​ແຂ່ງ​ຮ່ວມ​ໃນ​ລາຍ­ການ​ອາ­ຊີ-ປາ​ຊີ​ຟິກ 2018 ທີ່​ນະ­ຄອນ­ຫຼວງ​ບາງ­ກອກ ປະ­ເທດ​ໄທ ຕົນ​ເອງ​ໃນ​ນາມ​ກຳ­ມະ­ການ​ໂກນ​ບານ​ຈາກ​ລາວ ກໍ່​ໄດ້​ເຂົ້າ​ຮ່ວມ​ການ​ເຝິກ­ອົບ­ຮົມ IBSA Goalball Level 1 and 2 Referee Clinic ໂດຍ​ມີ​ຜູ້​ເຂົ້າ​ຮ່ວມ​ຮຽນ ແລະ ສອບ­ເສັງ​ທັງ​ໝົດ 14 ທ່ານ ຈາກ 6 ປະ­ເທດ ຄື: ໄທ ລາວ ບຣາ​ຊິນ ອົດ ສະ​ຕຣາ​ລີ ມາ​ເລ​ເຊຍ ແລະ ກາ​ຕາ ທີ່​ເຂົ້າ​ຮ່ວມ​ການ​ແຂ່ງ­ຂັນ​ລາຍ­ການ​ອາ­ຊີ-ປາ​ຊີ​ຟິກ 2018.

    ການ​ເຝິກ­ອົບ­ຮົມ ແມ່ນ​ມີ​ຄວາມ​ລະ­ອຽດ​ສູງ ແລະ ມີ​ການ​ສອບ­ເສັງ​ພາກ​ທິດ​ສະ​ດີ ແລະ ລົງ​ຕົວ​ຈິງ​ຈາກ​ການ​ສອບ­ເສັງ​ຄັ້ງ​ນີ້ ປາ­ກົດ​ວ່າ​ສາ­ມາດ​ເສັງ​ຜ່ານ​ລະ­ດັບ​ສາ­ກົນ ທີ່​ໄດ້​ຂຶ້ນ​ທະ­ບຽນ​ສະ­ຫະ­ພັນ​ກີ­ລາ​ຄົນ​ພິ­ການ​ຕາ​ລະ­ດັບ​ນາໆຊາດ (International Blind Sports Federation) ແນ່­ນອນ ການ​ຮຽນ​ກຳ­ມະ­ການ​ຄັ້ງ​ນີ້ ເຮັດ​ໃຫ້​ໄດ້​ປະ­ສົບ​ການ​ຫຼາຍ​ຢ່າງ ເພາະ­ວ່າ​ຢູ່​ໃນ ສປປ ລາວ ເຄີຍ​ມີ​ງານ​ເຝິກ­ອົບ­ຮົມ​ຂັ້ນ​ພື້ນ­ຖານ ໂດຍ​ຜ່ານ​ອົງ­ການ ADDP ເຊິ່ງ​ງານ​ຄັ້ງ​ນີ້​ໄດ້​ຮູ້­ຈັກ​ກະ­ຕິ​ກາ​ລະ­ດັບ​ສາ­ກົນ ກະ­ຕິ​ກາ​ຂອງ​ກຳ­ມະ­ການ ແລະ ກົດ​ລະ­ບຽບ​ຂອງ​ກຳ­ມະ­ການ ສ່ວນ​ຜົນ­ສຳ­ເລັດ​ຄັ້ງ​ນີ້ ແມ່ນ​ຈະ​ນຳ​ເອົາ​ປະ­ສົບ​ການ​ໄປ​ຖ່າຍ​ທອດ ແລະ ນຳ​ໃຊ້​ໃນ​ລາວ ໃຫ້​ເກີດ​ດອກ​ອອກ​ຜົນ​ເປັນ​ທີ່​ສຸດ.

    ສຳ­ລັບ​ຜົນ­ງານ​ຂອງ “ໂດນ ພົມ​ມະ​ວົງ” ເປັນ​ສ່ວນ​ໜຶ່ງ​ຂອງ​ທີມ​ເຕະ­ບານ​ຄົນ​ພິ­ການ​ຕາ​ລາວ ແລະ ທີມ​ໂກນ​ບານ​ຍິງ ຍາດ​ໄດ້​ຫຼຽນ​ເງິນ ໃນ​ງານ​ມະ​ຫະ​ກຳ​ກີ­ລາ​ອາ​ຊຽນ​ພາ​ຣາ​ເກມ ຄັ້ງ​ທີ 9 ທີ່​ປະ­ເທດ​ມາ​ເລ​ເຊຍ​ເປັນ​ເຈົ້າ­ພາບ ເມື່ອ​ປີ 2017 ສົ່ງ​ຜົນ​ໃຫ້​ທັບ​ນັກ­ກີ­ລາ​ຄົນ​ພິ­ການ​ລາວ ທີ່​ສົ່ງ​ເຂົ້າ​ຮ່ວມ 100 ຄົນ ຈາກ​ກີ­ລາ 6 ປະ­ເພດ ສາ­ມາດ​ຍາດ​ໄດ້ 4 ຫຼຽນ​ເງິນ ແລະ 4 ຫຼຽນ​ທອງ ຈັດ​ຢູ່​ອັນ​ດັບ​ທີ 11 ຂອງ​ຕາ­ຕະ­ລາງ​ສະ­ຫຼຸບ​ຫຼຽນ​ລາ­ງວັນ ແລະ ປັດ­ຈຸ­ບັນ​ກໍ່​ເປັນ​ຜູ້​ຊ່ວຍ​ທີມ​ເຕະ­ບານ​ຄົນ​ພິ­ການ​ລາວ ແລະ ທີມ​ໂກນ​ບານ​ລາວ ທີ່​ກຽມ​ເຂົ້າ​ຮ່ວມ ເອ​ຊຽນ ພາ​ຣາ​ເກມ ຄັ້ງ​ທີ XII ທີ່​ປະ­ເທດ​ອິນ​ໂດ​ເນ​ເຊຍ ໃນ​ເດືອນ​ຕຸ­ລາ 2018 ນີ້.

ຂ່າວທີ່ກ່ຽວຂ້ອງ