ຫຼວງພະບາງຮາຟມາລາທອນ ຄັ້ງທີ 6 ຈະຈັດຂຶ້ນໃນເດືອນຕຸລານີ້

286 25 ກ.ຍ. 2018 ວົງຈອນກີລາ

    ງານ​ຫຼວງ​ພະ​ບາງ​ຮາ​ຟ​ມາ­ລາ​ທອນ ຄັ້ງ​ທີ 6 ເພື່ອ​ຫາ​ລາຍ​ໄດ້​ມອບ​ໃຫ້​ແກ່​ໂຮງ­ໝໍ​ມິດ­ຕະ­ພາບ​ລາວ ເພື່ອ​ເດັກ­ນ້ອຍ​ຫຼວງ​ພະ​ບາງ ໃນ​ປີ 2018 ຈະ​ຈັດ​ຂຶ້ນ​ແຕ່​ວັນ​ທີ 19-21 ຕຸ­ລາ ທີ່​ຈະ​ມາ​ເຖິງ ໂດຍ​ຈະ​ມີ ພະ​ອົງ​ຍິງ ບິ​ຕຣີ​ສ ແຫ່ງ ນິວ​ຢອກ ພະ​ເຈົ້າ​ຫຼານ​ຂອງ​ພະ​ລາ­ຊິ­ນີ ອາ​ລິ​ສ​ຊາ​ເບດ ທີ II ແຫ່ງ​ອັງ­ກິດ ເພື່ອ​ສະ­ແດງ​ເຖິງ​ການ​ສະ­ໜັບ­ສະ­ໜູນ​ຂອງ​ພະ​ອົງ ສຳ­ລັບ​ວຽກ​ງານ​ຂອງ​ໂຮງ­ໝໍ​ມິດ­ຕະ­ພາບ​ລາວ ເພື່ອ​ເດັກ­ນ້ອຍ ທ່ານ ເຮັນ​ຣິກ ຮູ​ເອວ ແອນ​ເດີ​ເຊັນ ຜູ້­ອຳ­ນວຍ­ການ​ຂອງ​ບໍ­ລິ­ສັດ ເບຍ​ລາວ ຈຳ­ກັດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ­ລັບ​ຜູ້​ທີ່​ສົນ­ໃຈ​ຈະ​ເຂົ້າ​ຮ່ວມ​ການ​ແຂ່ງ­ຂັນ ສາ­ມາດ​ເລືອກ​ລະ­ຫວ່າງ​ແລ່ນ 7 ກິ­ໂລ­ແມັດ 14 ກິ­ໂລ­ແມັດ ຫຼື 21 ກິ­ໂລ­ແມັດ ຕາມ​ເສັ້ນ­ທາງ​ຮອບ​ວົນ​ຂອງ​ການ​ແຂ່ງ­ຂັນ​ທີ່​ຈະ​ຜ່ານ​ວັດ​ຊຽງ​ທອງ ແລະ ທີ່­ຢູ່​ອາ­ໄສ​ຂອງ​ຄົນ​ທ້ອງ­ຖິ່ນ ຜ່ານ​ຝັ່ງ​ແມ່­ນ້ຳ​ຂອງ ແລະ ແມ່­ນ້ຳ​ຄານ ໄປ​ຈົນ​ຮອດ​ໃຈ​ກາງ­ຂອງ​ເມືອງ​ແຫ່ງ​ມໍ­ລະ­ດົກ​ໂລກ ກໍ່​ຄື ເມືອງ​ຫຼວງ​ພະ​ບາງ ເຊິ່ງ​ລາຍ​ຮັບ​ຈາກ​ງານ​ຄັ້ງ​ນີ້ ຈະ​ມອບ​ໃຫ້​ແກ່​ການ​ຮັກ­ສາ​ຜູ້​ປ່ວຍ​ທີ່​ໂຮງ­ໝໍ 100% ເຊິ່ງ​ເປັນ​ທີ່​ຮູ້​ກັນ​ດີ​ແລ້ວ​ວ່າ ເປັນ​ການ​ໃຫ້​ບໍ­ລິ­ການ​ຮັກ­ສາ​ຟຣີ ໃຫ້​ແກ່​ເດັກ­ນ້ອຍ​ທຸກ​ຄົນ.

    ການ​ແຂ່ງ­ຂັນ ຮາ​ຟ​ມາ­ລາ​ທອນ ຄັ້ງ​ທຳ​ອິດ​ແມ່ນ​ໄດ້​ຈັດ​ຂຶ້ນ​ໃນ​ປີ 2012 ຈຳ­ນວນ​ຜູ້​ເຂົ້າ​ຮ່ວມ​ການ​ແຂ່ງ­ຂັນ​ເພີ່ມ​ຂຶ້ນ​ເຖິງ 33% ໃນ​ແຕ່​ລະ​ປີ ແລະ ການ​ແລ່ນ​ແຂ່ງ­ຂັນ ເພື່ອ​ເດັກ­ນ້ອຍ​ໃນ​ປີ​ນີ້​ຄາດ​ວ່າ ຈະ​ມີ​ຜູ້​ເຂົ້າ​ຮ່ວມ​ການ​ແຂ່ງ­ຂັນ​ເຖິງ 1.600 ຄົນ ຈາກ​ນັກ​ແລ່ນ​ທົ່ວ​ໂລກ ທີ່​ບໍ່​ພຽງ​ແຕ່​ຮັກ​ການ​ແລ່ນ ແຕ່​ຍັງ​ມີ​ຈິດ​ສັດ­ທາ​ຢາກ​ຫາ​ລາຍ​ໄດ້ ເພື່ອ​ການ​ກຸ­ສົນ​ນຳ​ອີກ.

ຂ່າວທີ່ກ່ຽວຂ້ອງ