ກະຕໍ້ລາວ ເຂົ້າຮ່ວມຊີງແຊັມໂລກ ທີ່ປະເທດໄທ

248 25 ກ.ຍ. 2018 ວົງຈອນກີລາ

    ທ່ານ ຈັນ​ໄດ ເພຍ​ເທບ ຫົວ­ໜ້າ​ຄູ​ເຝິກ​ທີມ​ຊາດ​ກະ­ຕໍ້​ລາວ ຊຸດ​ເອ​ຊຽນ​ເກມ 2018 ແຈ້ງ​ໃຫ້​ຊາບ​ໃນ​ວັນ​ທີ 20 ກັນ­ຍາ 2018 ວ່າ: ເພື່ອ​ເປັນ​ການ​ພັດ­ທະ­ນາ​ທັກ​ສະ ແລະ ໃຫ້​ນັກ­ກີ­ລາ​ໄດ້​ມີ​ການ­ເຄື່ອນ­ໄຫວ​ຢ່າງ​ຕໍ່​ເນື່ອງ ພວກ​ເຮົາ​ຈຶ່ງ​ກຽມ​ແຜນ​ຈະ​ໄປ​ແຂ່ງ­ຂັນ​ລາຍ­ການ​ຊີງ​ແຊັມ​ໂລກ​ທີ່​ແຂວງ​ໂຄ​ລາດ ປະ­ເທດ​ໄທ ເປັນ​ເຈົ້າ­ພາບ ໃນ​ວັນ​ທີ 23–30 ກັນ­ຍາ 2018 ໂດຍ​ຈະ​ເອົາ​ຊຸດ​ເອ​ຊຽນ​ເກມ 2018 ເຂົ້າ​ຮ່ວມ​ເປັນ​ຫຼັກ ສົ່ງ​ປະ­ເພດ​ກະ­ຕໍ້​ລອດ​ບ້ວງ​ທີມ​ຊຸດ​ຍິງ-ຊາຍ ທີມ​ດ່ຽວ​ຍິງ ທີມ​ຄູ່​ຊາຍ ແລະ ທີມ​ດ່ຽວ 4 ຄົນ ທັງ​ຍິງ ແລະ ຊາຍ ເຊິ່ງ​ລາຍ­ການ​ນີ້​ເປັນ​ລາຍ­ການ​ໃຫຍ່​ທີ່​ສຸດ ແນ່­ນອນ​ຈະ​ເປັນ​ເວ­ທີ​ສຳ­ຄັນ​ໃຫ້​ກັບ​ທັບ​ນັກ­ກີ­ລາ​ກະ­ຕໍ້​ທີມ​ຊາດ​ລາວ ໃນ​ການ​ທົດ​ສອບ ແລະ ພັດ­ທະ­ນາ​ສີ­ມື​ຄັ້ງ​ສຳ­ຄັນ.

    ສຳ­ລັບ​ການ​ແຂ່ງ­ຂັນ​ມີ​ທັງ​ໝົດ 10 ລາຍ­ການ ປະ­ກອບ​ມີ: ທີມ​ຊຸດ​ຊາຍ-ຍິງ ປະ­ເພດ​ຄູ່​ຊາຍ-ຍິງ ທີມ​ດ່ຽວ​ຊາຍ-ຍິງ ກະ­ຕໍ້​ທີມ 4 ຄົນ​ຊາຍ-ຍິງ ແລະ ກະ­ຕໍ້​ລອດ ບ້ວງ​ສາ­ກົນ​ຍິງ-ຊາຍ ຂະ­ນະ​ທີ່​ລາວ​ສ້າງ​ຜົນ­ງານ​ດີ​ທີ່​ສຸດ​ໃນ​ລາຍ­ການ​ນີ້ ດ້ວຍ​ການ​ຍາດ​ໄດ້ 1 ຫຼຽນ​ທອງ ຈາກ​ປະ­ເພດ​ທີມ ຄູ່​ຊາຍ​ປີ 2011.

ຂ່າວທີ່ກ່ຽວຂ້ອງ