ຂ່າວຫຼ້າສຸດ

ພາບມາຍາ

753 26 ກ.ຍ. 2018 ນານາສາລະ

    ຄຳ​ວ່າ​ມາ­ຍາ​ສາ­ໄຖ ຄົນ​ລາວ​ເຮົາ​ມັກ​ເນັ້ນ​ໃສ່​ການ​ຫຼອງ​ລວງ​ຄື: ພຶດ­ຕິ​ກຳ​ທີ່​ຫ່າງ​ເຫີນ​ຈາກ​ຊີ­ວິດ​ຄວາມ​ເປັນ​ຈິງ ເຊິ່ງ​ເທົ່າ​ທີ່​ສັງ­ເກດ​ໄດ້​ພາບ​ມາ­ຍາ​ດັ່ງ­ກ່າວ ສ່ວນ​ໃຫຍ່​ກໍ່​ແມ່ນ​ຖືກ​ອວດ​ອ້າງ ອວດ​ໂຊ ກັນ​ເທິງ​ໜ້າ​ສື່​ອອນ​ລາຍ (FB) ຜູ້​ຂຽນ​ຈຶ່ງ​ສົງ­ໄສ​ວ່າ ຖ້າ​ຄົນ​ສ່ວນ​ໃຫຍ່​ຫຼົງ​ຕິດ​ກັບ​ມາ­ຍາ ແລະ ສ້າງ​ພາບ​ມາ­ຍາ​ອວດ​ໂອ້​ໂຊ​ກັນ​ແບບ​ດັດ​ຈະ​ຫຼິດ​ໃສ່​ກັນ ມັນ​ຈະ​ເກີດ​ຜົນ​ເສຍ​ຫຍັງ​ແນ່​ຕາມ​ມາ ? ຄຳ​ຕອບ​ຂອງ​ຜູ້​ຂຽນ ກໍ່​ຄື ສັງ­ຄົມ​ຫຼອກ​ລວງ​ເພາະ​ບໍ່​ງາມ​ກໍ່​ເຮັດ​ໃຫ້​ງາມ ບໍ່​ລວຍ​ກໍ່​ເຮັດ​ໃຫ້​ລວຍ.

    ການ​ຫຼິ້ນ​ເຟດ​ບຸກ​ຂອງ​ກຸ່ມ​ຄົນ​ໃນ​ສັງ­ຄົມ​ມີ​ຫຼາຍ​ແບບ​ບາງ​ຄົນ​ໃຊ້ FB ຊອກ​ຫາ​ຂໍ້​ມູນ​ຕິດ­ຕໍ່​ລົມ​ວຽກ​ກັບ​ໝູ່­ຄູ່ ຫຼື ກັບ​ຄູ່​ຄ້າ​ທຸ­ລະ​ກິດ ເພື່ອ​ປະ­ຢັດ​ເວ­ລາ​ໃນ​ການ​ຕິດ­ຕໍ່​ສື່­ສານ ບາງ​ຄົນ​ຫຼີ້ນ FB ເພື່ອ​ຄວາມ​ບັນ​ເທິງ ບາງ​ຄົນ​ອາດ​ຫຼີ້ນ​ເພື່ອ​ສ້າງ​ພາບ​ໃຫ້​ດູ​ດີ ເຖິງ​ຈະ​ມີ​ຄວາມ​ດີ​ພຽງ 10% ແຕ່​ອາ­ໄສ​ສ້າງ​ພາບ​ມາ­ຍາ​ເທິງ​ໜ້າ​ເຟດ​ຂອງ​ຕົນ​ຕື່ມ​ເຂົ້າ​ໄປ ເພື່ອ​ສ້າງ​ຄວາມ​ນິ­ຍົມ​ເທິງ​ຄ່າ​ນິ­ຍົມ​ທີ່​ມີ​ທ່າ​ອ່ຽງ​ໄປ​ທາງ​ລັກ­ສະ­ນະ​ພາບ​ມາ­ຍາ​ນີ້ ກໍ່​ແມ່ນ​ວັດ­ທະ­ນະ­ທຳ​ຂອງ​ໂລກ ໂລ­ກາ​ພິ​ວັດ ໃນ​ໂລກ​ຂອງ​ທຶນ​ນິ­ຍົມ ເຂົາ​ຖື​ການ​ສ້າງ​ພາບ ແລະ ການ​ໂຄ­ສະ­ນາ​ເປັນ​ປັດ​ໄຈ​ນຳ​ໃນ​ການ​ສ້າງ​ຄວາມ​ໜ້າ​ເຊື່ອ​ຖື ເຊິ່ງ​ພາ­ສາ​ທຸ­ລະ​ກິດ​ເອີ້ນ​ວ່າ Credit ຜູ້​ຂຽນ​ຍົກ​ຂຶ້ນ​ມາ​ແລກ­ປ່ຽນ​ບໍ່​ແມ່ນ​ເພື່ອ​ຕໍ່­ຕ້ານ ແຕ່​ເພື່ອ​ຂໍ​ເປັນ​ເບກ ແລະ ແກ​ໃຫ້​ສັງ­ຄົມ​ໄດ້​ຢຸດ​ຄິດ​ທົບ​ທວນ.

    ພາບ​ມາ­ຍາ​ຈຶ່ງ​ເບິ່ງ​ຄື​ວ່າ​ຈະ​ເປັນ​ຄົນ​ດີ ຕ້ອງ​ໄດ້​ອວດ​ໂຊ​ລົງ​ໜ້າ​ເຟດ​ບຸກ ເພື່ອ​ໃຫ້​ເຈົ້າ​ຂອງ​ເຟດ​ໄດ້​ໜ້າ ການ​ຈະ​ເປັນ​ຄົນ​ເກ່ງ​ຈຶ່ງ​ຕ້ອງ​ໄດ້ ອ້າງ​ໂຊ​ລົງ​ໜ້າ​ເຟດ​ບຸກ ຢ່າ​ລືມ​ວ່າ​ບາງ­ເທື່ອ​ການ​ອວດ​ການ​ອ້າງ ອາດ​ເຮັດ​ໃຫ້​ຄົນ​ດີ​ເປັນ​ຄົນ​ແກ້ງ​ດີ ຈາກ​ຄົນ​ເກ່ງ​ກາຍ ເປັນ​ຄົນ​ອວດ​ເກ່ງ ເຊິ່ງ​ຈະ​ເອີ້ນ​ວ່າ ຜົນ​ຂອງ​ໂລ­ກາ​ພິ​ວັດ ກໍ່​ແລ້ວ­ແຕ່​ໃຜ​ຈະ​ເອີ້ນ ແຕ່​ຜູ້​ຂຽນ​ຂໍ​ບອກ​ວ່າ ພາບ​ມາ­ຍາ​ດັ່ງ­ກ່າວ​ອາດ​ເຮັດ​ໃຫ້​ຜູ້­ກ່ຽວ​ບໍ່​ຮູ້­ຈັກ​ຕົນ​ເອງ ຫຼື ຫຼົງ​ລືມ​ສ້າງ​ຕົນ​ເອງ ຈົນ​ຂາດ​ເປົ້າ​ໝາຍ​ໃນ​ຊີ­ວິດ ເພາະ​ຊີ­ວິດ​ຫຼົງ​ເຫີ່​ແຕ່​ນຳ​ຄົນ​ອື່ນ ຢ່າ​ລືມ​ຕົນ​ເອງ​ຈົນ​ວ່າ​ສັງ­ຄົມ​ຮູ້­ຈັກ​ເຮົາ​ແຕ່​ເຮົາ​ກັບ​ບໍ່​ຮູ້­ຈັກ​ຕົນ​ເອງ.

    ພາບ​ມາ­ຍາ​ຈຶ່ງ​ຢາກ​ຝາກ​ທ່ານ​ຜູ້​ອ່ານ​ແລກ­ປ່ຽນ​ທັດ­ສະ­ນະ​ນຳ​ກັນ ໝາຍ​ຄວາມ​ວ່າ​ຄິດ​ເພື່ອ​ສ່ວນ​ລວມ ຄິດ​ເພື່ອ​ປ້ອງ​ກັນ​ປາ­ກົດ­ການ​ຫຍໍ້­ທໍ້ ທີ່​ເບິ່ງ​ຄື​ວ່າ​ກຳ­ລັງ​ເປັນ​ທ່າ​ອ່ຽງ​ຫຼາຍ​ຂຶ້ນ ເຊິ່ງ​ບາງ​ຄົນ​ອາດ​ບອກ​ວ່າ­ການ​ອວດ​ໂຊ​ດັ່ງ­ກ່າວ ບໍ່​ແມ່ນ​ເພື່ອ​ສ້າງ​ຊື່​ສຽງ​ແຕ່​ຖ້າ​ຫຼັກ​ຈິດ­ຕະ­ວິ­ທະ­ຍາ ກໍ່​ຈະ​ບອກ​ທັນ­ທີ​ໂລດ​ວ່າ​ຜູ້​ທີ່​ພະ­ຍາ­ຍາມ​ເຮັດ​ສິ່ງ​ໃດ​ຢູ່​ຄົນ​ຜູ້​ນັ້ນ ເຂົາ​ກໍ່​ຫິວ​ສິ່ງ​ນັ້ນ ເຊິ່ງ​ຈະ​ຕົວະ​ໄດ້​ແຕ່​ເດັກ­ນ້ອຍ ການ​ຮັບ​ເອົາ​ກະ­ແສ​ໂລ­ກາ​ພິ​ວັດ​ຄວນ​ຂຶ້ນ​ກັບ​ສະ­ຕິ​ປັນ­ຍາ​ຫຼາຍ​ຂຶ້ນ ບໍ່​ແມ່ນ​ຮັບ​ເອົາ​ແບບ​ຍອມ​ຕາມ​ເຂົາ​ທຸກ​ຢ່າງ

ໂດຍ: ດັ້ນ​ກີບ​ເມກ

ຂ່າວທີ່ກ່ຽວຂ້ອງ