ຂ່າວຫຼ້າສຸດ

ເຊີນທ່ຽວງານປະເພນີແຂ່ງເຮືອຍາວ ງານຕະຫຼາດນັດ ຢູ່ສວນນ້ຳອິນແປງ

380 27 ກ.ຍ. 2018 ວົງຈອນກີລາ
ເຊີນທ່ຽວງານປະເພນີແຂ່ງເຮືອຍາວ ງານຕະຫຼາດນັດ ຢູ່ສວນນ້ຳອິນແປງ

    ບໍ­ລິ­ສັດ ອິນ​ແປງ​ກຣຸບ ຈຳ­ກັດ ຮ່ວມ​ກັບ​ສະ­ຫະ­ພັນ​ກີ­ລາ​ເຮືອ​ຊ່ວງ ນະ­ຄອນ­ຫຼວງ​ວຽງ​ຈັນ (ນວ) ຈະ​ຈັດ​ງານ​ປະ­ເພ­ນີ​ແຂ່ງ­ຂັນ​ຊ່ວງ​ເຮືອ​ສູດ​ຍາວ ປະ­ເພດ 55 ສີ­ພາຍ ແລະ ງານ​ວາງ­ສະ­ແດງ​ສິນ­ຄ້າ (ຕະ­ຫຼາດ­ນັດ) ເພື່ອ​ອະ­ນຸ​ຮັກ ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ຂຶ້ນ​ວັນ​ທີ 24- 30 ກັນ­ຍາ 2018 ຢູ່​ສວນ​ນ້ຳ​ອິນ​ແປງ​ຣີ​ເວີ​ໄຊ ບ້ານ​ດົງ​ໂພ​ສີ ເມືອງ​ຫາດ​ຊາຍ​ຟອງ ນວ.

    ພິ­ທີ​ຈັບ​ສະ­ຫຼາກ​ແບ່ງ​ກຸ່ມ​ງານ​ແຂ່ງ­ຂັນ​ຄັ້ງ​ນີ້ ຈັດ​ຂຶ້ນ​ວັນ​ທີ 26 ກັນ­ຍາ 2018 ຢູ່​ສວນ​ນ້ຳ​ອິນ​ແປງ ໂດຍ​ມີ​ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ ທ່ານ ພິມ​ມະ​ສອນ ຈັນ­ທະ​ວົງ ຫົວ­ໜ້າ​ຫ້ອງ­ການ​ບໍ­ລິ­ສັດ ອິນ​ແປງ​ກຣຸບ ຈຳ­ກັດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ແຂ່ງ­ຂັນ​ເຮືອ​ສູດ​ຍາວ​ຄັ້ງ​ນີ້ ມີ 8 ລຳ ແບ່ງ​ເປັນ 2 ກຸ່ມ​ຄື: ກຸ່ມ​ກໍ ມີ​ບ້ານ​ແສນ​ດິນ ບ້ານ​ຊາຍ​ຟອງ​ເໜືອ (ຫຼາວ​ຄຳ) ສາຍ­ຟ້າ (ບ້ານ​ທ່າ​ພະ) ແລະ ພອນ​ພະ­ແກ້ວ 2 (ບ້ານ​ສີ​ຖານ​ໃຕ້) ກຸ່ມ​ຂໍ ມີ​ບໍ­ລິ­ສັດ ແສງ​ເພັດ​ກໍ່­ສ້າງ-ເກັບ​ກູ້​ລະ­ເບີດ ຈຳ­ກັດ (ສີ­ພາຍ​ນາ­ວາ​ສັກ­ສິດ) ຄອນ​ສະ­ຫວັນ 99 (ບ້ານ​ທ່າ​ກະ) ພອນ​ພະ­ແກ້ວ 1 (ບ້ານ​ສີ​ຖານ​ໃຕ້) ແລະ ເທບ​ປະ­ມານ​ພອນ (ບ້ານ​ຊຽງ​ຄວນ).

    ຜູ້​ຊະ­ນະ​ເລີດ​ຈະ​ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 13 ລ້ານ​ກີບ ຮອງ​ຊະ­ນະ​ເລີດ​ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 11 ລ້ານ​ກີບ ທີ 3 ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 9 ລ້ານ​ກີບ ທີ 4 ໄດ້​ຮັບ​ລາ­ງວັນ​ເງິນ 7 ລ້ານ​ກີບ ນອກ​ນີ້ ເຮືອ​ທີ່​ເຂົ້າ​ຮ່ວມ ຍັງ​ຈະ​ໄດ້​ຮັບ​ລາ­ງວັນ​ນອນ​ທ່າ ຫຼື ຄ່າ​ລາກ​ແກ່ 5 ລ້ານ​ກີບ.

ຂ່າວທີ່ກ່ຽວຂ້ອງ