ຂ່າວຫຼ້າສຸດ

ກະຕໍ້ລາວ ຍາດໄດ້ 2 ຫຼຽນຄໍາ ຊີງແຊັມໂລກ 2018

349 01 ຕ.ລ. 2018 ວົງຈອນກີລາ
ກະຕໍ້ລາວ ຍາດໄດ້ 2 ຫຼຽນຄໍາ ຊີງແຊັມໂລກ 2018

    ທັບ​ນັກ­ກີ­ລາ​ກະ­ຕໍ້​ລາວ ສ້າງ​ຜົນ­ງານ​ເດັ່ນ​ຕໍ່​ເນື່ອງ ໃນ​ການ​ລົງ​ແຂ່ງ­ຂັນ​ວັນ​ທີ 27 ກັນ­ຍາ 2018 ໂດຍ​ສາ­ມາດ​ຍາດ​ໄດ້ 2 ຫຼຽນ​ຄຳ ຈາກ​ປະ­ເພດ​ທີມ​ຄູ່​ຍິງ ຫຼັງ​ຈາກ​ຮອບ​ຊີງ​ຊະ­ນະ​ເລີດ ແຊງ​ຊະ­ນະ​ທີມ​ຊາດ ສ ເກົາ­ຫຼີ 2-1 ເຊັດ: 12-21 21-18 ແລະ 21-10 ເຊິ່ງ​ເປັນ​ຫຼຽນ​ຄຳ​ປະ­ຫວັດ­ສາດ​ໃນ​ການ​ແຂ່ງ­ຂັນ​ກະ­ຕໍ້​ຊີງ​ແຊັມ​ໂລກ 2018 ຊີງ​ຂັນ​ພະ​ຣາດ​ຊະ​ທານ​ເຈົ້າ​ຊີ­ວິດ​ໄທ ຄັ້ງ​ທີ 33 ຢູ່​ນະ­ຄອນ​ຣາດ​ຊະ​ສີ­ມາ ປະ­ເທດ​ໄທ ວັນ​ທີ 23-30 ກັນ­ຍາ 2018.

    ສ່ວນ​ອີກ 1 ຫຼຽນ​ຄຳ ໄດ້​ມາ​ຈາກ​ປະ­ເພດ​ທີມ​ຄູ່​ຊາຍ​ລາວ ທີ່​ແຂ່ງ­ຂັນ​ກ່ອນ​ທີມ​ຍິງ ກໍ່​ສາ­ມາດ​ແຊງ​ຊະ­ນະ​ທີມ​ຊາດ​ອິນ​ເດຍ ໃນ​ຮອບ​ຊີງ​ຊະ­ນະ​ເລີດ 2-1 ເຊັດ: 20-22 21-16 ແລະ 21-19 ຄວ້າ​ແຊັມ​ໂລກ​ມາ​ຄອງ​ເປັນ​ຄັ້ງ​ປະ­ຫວັດ­ສາດ​ເໝືອນ​ກັບ​ທີມ​ຄູ່​ຍິງ.

    ນອກ​ນີ້ ວັນ​ທີ 26 ກັນ­ຍາ 2018 ທີມ​ຊາດ​ລາວ​ໄດ້ 1 ຫຼຽນ​ທອງ ຈາກ​ປະ­ເພດ​ທີມ​ດ່ຽວ​ຍິງ ເປັນ​ຫຼຽນ​ທອງ​ທຳ​ອິດ​ຂອງ​ລາວ ໃນ​ລະ­ດັບ​ຊີງ​ແຊັມ​ໂລກ ເຊິ່ງ​ປີ 2011 ທັບ​ກະ­ຕໍ້​ລາວ​ເຂົ້າ​ຮ່ວມ​ຊີງ​ແຊັມ​ໂລກ ໄດ້​ພຽງ 1 ຫຼຽນ​ທອງ ຈາກ​ປະ­ເພດ​ທີມ​ຄູ່​ຊາຍ.

ຂ່າວທີ່ກ່ຽວຂ້ອງ