ຂ່າວຫຼ້າສຸດ

ເຢຍລະມັນ ໄດ້ຮັບສິດເປັນເຈົ້າພາບຈັດແຂ່ງຂັນບານເຕະ ຢູໂຣ 2024

338 02 ຕ.ລ. 2018 ວົງຈອນກີລາ
ເຢຍລະມັນ ໄດ້ຮັບສິດເປັນເຈົ້າພາບຈັດແຂ່ງຂັນບານເຕະ ຢູໂຣ 2024

    ຄະ­ນະ​ບໍ­ລິ­ຫານ​ສະ­ຫະ­ພັນ​ບານ­ເຕະ​ເອີ​ຣົບ (EUFA) ລົງ​ຄະ­ແນນ​ເລືອກ​ເຈົ້າ­ພາບ​ຈັດ­ການ​ແຂ່ງ­ຂັນ​ບານ­ເຕະ​ຊີງ​ແຊ້ມ​ທະ­ວີບ​ເອີ​ຣົບ EUFA ຄັ້ງ​ທີ 17 ປີ 2024 ວັນ​ທີ 27 ກັນ­ຍາ 2018 ຢູ່​ສຳ­ນັກ­ງານ​ໃຫຍ່ EUFA ເມືອງ​ນິ​ຢົງ ປະ­ເທດ​ສະ​ວິດ ໂດຍ​ມີ 2 ປະ­ເທດ​ສະ­ເໜີ​ຕົວ​ເປັນ​ເຈົ້າ­ພາບ​ຄື: ເຢຍ​ລະ​ມັນ ແລະ ຕວກ​ກີ.

    ທ່ານ Aleksander Ceferin ປະ­ທານ​ສະ­ຫະ­ພັນ​ບານ­ເຕະ​ເອີ​ຣົບ ປະ­ກາດ​ຄະ­ແນນ​ໂຫວດ​ເລືອກ​ເຈົ້າ­ພາບ​ຄັ້ງ​ນີ້ ເປັນ​ທາງ​ເຢຍ​ລະ​ມັນ ຊະ­ນະ ຕວກ​ກີ 12 ຕໍ່ 4 ສຽງ ເນື່ອງ​ຈາ​ກວ່າ ເຢຍ​ລະ​ມັນ ມີ​ຄວາມ​ພ້ອມ ແລະ ຄວາມ​ປອດ​ໄພ​ຫຼາຍ​ກວ່າ ເຢຍ​ລະ​ມັນ​ສະ­ເໜີ​ໃຊ້​ສະ­ໜາມ​ແຂ່ງ­ຂັນ​ຢູ່ 10 ເມືອງ​ຄື: ນະ­ຄອນ­ຫຼວງ​ແບັກ​ແລັງ ເປັນ​ເຈົ້າ­ພາບ​ນັດ​ຊີງ ໂຄ​ໂລນ ດອດ​ມູນ ດຸ​ສ​ເຊີດ​ອຟ ແຟັງ​ເຟິດ ເກວ​ເຊນ​ເຄຍ​ເຊນ ຮຳ​ບຸກ ໄລ​ຊິກ ມິວ​ນິກ ແລະ ສະ​ຕຸດ​ກາດ ເຊິ່ງ​ທຸກ​ສະ­ໜາມ​ບໍ່​ຈຳ­ເປັນ​ຕ້ອງ​ສ້າງ​ໃໝ່ ເຢຍ​ລະ​ມັນ ຈະ​ເປັນ​ເຈົ້າ­ພາບ​ຈັດ­ການ​ແຂ່ງ­ຂັນ​ລະ­ດັບ​ເມ​ເຈີ​ທີ 4 ຕໍ່​ຈາກ​ເຈົ້າ­ພາບ​ບານ​ໂລກ ປີ 1974 ຢູ​ໂຣ 1988 ແລະ ບານ​ໂລກ 2006 ລວມ​ເຖິງ​ເຈົ້າ­ພາບ​ບານ​ໂລກ​ຍິງ 2011.

    ສ່ວນ​ຕວກ​ກີ EUFA ເຫັນ​ວ່າ​ບໍ່​ມີ​ຄວາມ​ພ້ອມ​ທັງ 2 ດ້ານ​ຄື: ການ​ຂາດ​ແຜນ​ປະ­ຕິ­ບັດ​ດ້ານ​ສິດ­ທິ​ມະ­ນຸດ ເຊິ່ງ​ເປັນ​ຄັ້ງ​ທຳ​ອິດ​ທີ່​ຂໍ້​ກຳ­ນົດ​ນີ້ ໄດ້​ນຳ​ມາ​ພິ­ຈາ­ລະ­ນາ​ໃນ​ການ​ສະ­ເໜີ​ໂຕ​ເປັນ​ເຈົ້າ­ພາບ ການ​ຂະ­ຫຍາຍ​ໂຄງ​ສ້າງ​ພື້ນ­ຖານ​ດ້ານ​ການ​ຄົມ­ມະ­ນາ­ຄົມ ບາງ​ເມືອງ​ມີ​ທີ່​ພັກ​ສຳ­ລັບ​ກອງ​ເຊຍ​ຈຳ­ກັດ ເປັນ​ຄັ້ງ​ທີ 4 ທີ່​ຕວກ​ກີ ສະ­ເໜີ​ໂຕ​ເປັນ​ເຈົ້າ­ພາບ​ຈັດ­ການ​ແຂ່ງ­ຂັນ​ມະ​ຫະ​ກຳ​ກີ­ລາ​ໃຫຍ່ໆ ແຕ່​ບໍ່​ເຄີຍ​ສຳ­ເລັດ ຕໍ່​ຈາກ​ປີ 2012-2016 ແລະ ໂອ​ລິມ​ປີກ​ເກມ 2020.

ຂ່າວທີ່ກ່ຽວຂ້ອງ