ຍ່າງເພື່ອສຸຂະພາບ ສະຫຼອງວັນທ່ອງທ່ຽວໂລກ

596 02 ຕ.ລ. 2018 ວົງຈອນກີລາ
ຍ່າງເພື່ອສຸຂະພາບ ສະຫຼອງວັນທ່ອງທ່ຽວໂລກ

    ກິດ­ຈະ­ກຳ​ຍ່າງ​ເພື່ອ​ສຸ­ຂະ­ພາບ ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ​ທ່ອງ​ທ່ຽວ​ໂລກ ຄຽງ​ຄູ່​ກັບ​ປີ​ທ່ອງ​ທ່ຽວ​ລາວ 2018 ຈັດ​ຂຶ້ນ​ວັນ​ທີ 29 ກັນ­ຍາ 2018 ທີ່​ສວນ​ປະ­ຕູ​ໄຊ ມີ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ​ຮອງ​ລັດ­ຖະ­ມົນ­ຕີ ພະ­ນັກ­ງານ​ຂະ­ແໜງ­ການ​ອ້ອມ​ຂ້າງ ແລະ ປະ­ຊາ­ຊົນ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ບໍ່​ແສງ​ຄຳ ວົງ​ດາ­ລາ ກ່າວ​ວ່າ: ພາຍ­ຫຼັງ​ອົງ​ການ­ທ່ອງ­ທ່ຽວ​ໂລກ (UN WTO) ໄດ້​ສ້າງ­ຕັ້ງ​ຂຶ້ນ​ໃນ​ວັນ​ທີ 27 ກັນ­ຍາ 1970 ປັດ­ຈຸ­ບັນ ມີ​ສະ­ມາ­ຊິກ​ທັງ​ໝົດ 158 ປະ­ເທດ ໄດ້​ເລີ່ມ​ຕົ້ນ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ​ນັບ​ແຕ່​ປີ 1980 ເປັນ­ຕົ້ນ​ມາ ເຊິ່ງ​ກຳ­ນົດ​ເອົາ​ວັນ​ທີ 27 ກັນ­ຍາ​ຂອງ​ທຸກ​ປີ ໃຫ້​ບັນ­ດາ​ສະ­ມາ­ຊິກ​ພ້ອມ​ກັນ​ຈັດ​ກິດ­ຈະ­ກຳ​ຫຼາຍ​ຮູບ​ແບບ ໂດຍ​ຈະ​ມີ​ການ​ກຳ­ນົດ​ຫົວ­ຂໍ້​ແຕກ​ຕ່າງ​ກັນ​ໄປ​ໃນ​ແຕ່​ລະ​ປີ ສະ­ເພາະ​ປີ 2018 ໄດ້​ຕົກ­ລົງ​ກຳ­ນົດ​ຫົວ­ຂໍ້​ການ­ທ່ອງ­ທ່ຽວ ແລະ ການ​ຫັນ­ປ່ຽນ​ໄປ​ສູ່​ດີ​ຈີ​ຕອນ.

    ເພື່ອ​ເປັນ​ການ­ສະ­ແດງ​ເຖິງ​ຄວາມ​ຮັບ­ຜິດ­ຊອບ​ໃນ​ການ​ໃຫ້​ຄວາມ​ສຳ­ຄັນ ແລະ ທັງ​ເປັນ​ການ​ປະ­ກອບ­ສ່ວນ​ຢ່າງ​ຕັ້ງ­ໜ້າ​ໃຫ້​ແກ່​ການ​ພັດ­ທະ­ນາ ແລະ ສົ່ງ­ເສີມ​ການ­ທ່ອງ­ທ່ຽວ​ລາວ​ເຮົາ​ທັງ​ຢູ່​ພາຍ​ໃນ ແລະ ຕ່າງ­ປະ­ເທດ​ໃຫ້​ນັບ​ມື້​ເຕີບ​ໃຫຍ່​ຂະ­ຫຍາຍ­ຕົວ​ຍິ່ງ​ຂຶ້ນ​ນັ້ນ ລາວ​ເຮົາ​ໃນ​ນາມ​ເປັນ​ສະ­ມາ­ຊິກ​ອົງ​ການ­ທ່ອງ­ທ່ຽວ​ໂລກ ຈຶ່ງ​ໄດ້​ຈັດ​ພິ­ທີ​ຍ່າງ​ເພື່ອ​ສຸ­ຂະ­ພາບ ເພື່ອ​ເປັນ​ການ​ສະ­ຫຼອງ​ວັນ​ດັ່ງ­ກ່າວ ໄປ​ຄຽງ​ຄູ່​ກັບ​ການ​ຊຸກ­ຍູ້​ໂຄ­ສະ­ນາ​ສົ່ງ­ເສີມ​ປີ​ທ່ອງ​ທ່ຽວ​ລາວ 2018 ໃຫ້​ກວ້າງ­ຂວາງ ແລະ ມີ​ບັນ­ຍາ­ກາດ​ຄຶກ­ຄື້ນ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ