ຂ່າວຫຼ້າສຸດ

ເພື່ອສັນຕິພາບຂອງແຫຼມເກົາຫຼີ

503 03 ຕ.ລ. 2018 ນານາສາລະ

    ຄໍ​ລຳ​ເຮົາ​ມື້­ນີ້ ນຳ​ສະ­ເໜີ​ເຫດ­ການ​ໃນ​ໂລກ​ທີ່­ຢູ່​ໃກ້​ນັ້ນ ຄື: ສະ­ຖາ­ນະ​ການ​ແຫຼມ​ເກົາ­ຫຼີ.

    ນັບ​ແຕ່​ຕົ້ນ​ປີ​ນີ້​ມາ ຈະ​ເຫັນ​ວ່າ​ສະ­ຖາ­ນະ​ການ​ແຫຼມ​ເກົາ­ຫຼີ ປ່ຽນ­ແປງ​ຢ່າງ​ໄວ­ວາ ແລະ ເປັນ​ໄປ​ໃນ​ທາງ​ບວກ ການ​ພົບ​ປະ​ຂອງ​ການ​ນຳ​ຂັ້ນ​ສູງ ການ​ນຳ​ທະ­ຫານ​ຂອງ​ສອງ​ປະ­ເທດ​ເໜືອ-ໃຕ້ ພາ­ໃຫ້​ເກີດ​ມີ​ບັນ­ຍາ­ກາດ​ແຫ່ງ​ສັນ­ຕິ­ພາບ​ທີ່​ຫອມ​ຫວນ​ຂຶ້ນ​ນັບ​ມື້.

    ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ໃນ 3 ວັນ (18-20 ກັນ­ຍາ) ທີ່​ປະ­ທາ­ນາ­ທິ­ບໍ­ດີ ມຸນ​ແຈ​ອິນ ແຫ່ງ ສ ເກົາ­ຫຼີ ໄປ​ຢ້ຽມ­ຢາມ​ກຸງ​ພຽງ​ຢາງ ແຫ່ງ ສປປ ເກົາ­ຫຼີ ນັ້ນ ໄດ້​ຮັບ​ການ​ຕ້ອນ­ຮັບ​ຢ່າງ​ສົມ​ກຽດ​ຈາກ​ປະ­ທານ ກິມ​ຈອງ​ອຸນ ແຫ່ງ ສປປ ເກົາ­ຫຼີ ຖື​ເປັນ​ການ​ພົບ​ປະ​ສຸດ​ຍອດ​ຄັ້ງ​ທີ​ສາມ ເຊິ່ງ​ການ​ພົບ​ປະ​ຄັ້ງ​ນີ້ ກໍ່​ໄດ້​ມີ​ການ​ລົງ​ນາມ​ຂໍ້​ຕົກ­ລົງ​ຮ່ວມ​ກັນ ໂດຍ​ບາງ​ຈຸດ​ໄດ້​ລະ­ບຸ​ເຖິງ​ການ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ປະ­ລິນ­ຍາ ປັນ​ມູນ​ຈອນ ທີ່​ຜູ້­ນຳ​ທັງ​ສອງ​ລົງ​ນາມ​ໃນ​ເດືອນ​ເມ­ສາ​ຜ່ານ​ມາ ນອກ​ນັ້ນ ຍັງ​ມີ​ຂໍ​ຕົກ­ລົງ​ທາງ​ການ​ທະ­ຫານ​ນຳ​ອີກ.

    ໃນ​ເວ­ລາ​ຖະ­ແຫຼງ​ຕໍ່​ນັກ​ຂ່າວ ປະ­ທານ ກິມ ຈອງ​ອຸນ ໄດ້​ກ່າວ​ວ່າ: “ຂໍ້​ຕົກ­ລົງ​ທີ່​ບັນ­ລຸ​ໄດ້​ໃນ​ການ​ພົບ​ປະ​ທີ່​ພຽງ​ຢາງ ຈະ​ຊຸກ­ຍູ້​ໃຫ້​ເກີດ​ມີ​ສັນ­ຕິ­ພາບ​ວັດ­ທະ­ນາ​ຖາ­ວອນ​ໃນ​ຍຸກ​ໃໝ່”  ກໍ່​ຄື ກັນ​ກັບ​ຂໍ້​ຕົກ­ລົງ​ທາງ​ທະ­ຫານ​ຈະ​ຊ່ວຍ​ໃຫ້­ການ​ແກ້​ໄຂ​ບັນ­ຫາ​ນິວ​ເຄຼຍ ໃນ​ແຫຼມ​ເກົາ­ຫຼີ ແລະ ສ້າງ​ເງື່ອນ­ໄຂ​ໃນ​ການ​ສ້າງ​ສັນ­ຕິ­ພາບ​ຕະ­ຫຼອດ​ໄປ...” ອ້າງ​ອີງ​ຈາກ Vietnamnet ອອນ​ລາຍ ວັນ​ທີ 19/9/2018 ພາ­ສາ​ຫວຽດ­ນາມ.

    ຈາກ​ການ​ພົບ​ປະ​ຄັ້ງ​ນີ້ ຫາງ​ສຽງ​ໂລກ​ຕ່າງ​ກໍ່​ສະ­ແດງ​ຄວາມ​ປິ​ຕິ​ຊົມ­ຊື່ນ ແລະ ຖື​ວ່າ​ນີ້​ແມ່ນ​ບັນ­ຫາ​ພາຍ​ໃນ​ຂອງ​ສອງ​ເກົາ­ຫຼີ ໃນ​ການ​ແກ້​ໄຂ​ບັນ­ຫາ​ຕາມ​ແນວ­ທາງ​ຂອງ​ເກົາ­ຫຼີ​ເອງ ໃນ​ການ​ສ້າງ​ສັນ­ຕິ­ພາບ​ຄວາມ​ໝັ້ນ­ຄົງ​ຢ່າງ​ຖາ­ວອນ ແລະ ເຮັດ​ໃຫ້​ແຫຼມ​ເກົາ­ຫຼີ ເປັນ​ເຂດ​ປອດ​ອາ­ວຸດ​ນິວ​ເຄຼຍ.

    ຕໍ່​ເຫດ­ການ​ໃນ​ຄັ້ງ​ນີ້ ປະ­ເທດ​ເຮົາ​ໂດຍ​ກະ­ຊວງ​ການ​ຕ່າງ­ປະ­ເທດ ກໍ່​ໄດ້​ອອກ​ຖະ­ແຫຼງ­ການ​ຕໍ່​ຜົນ​ການ​ພົບ​ປະ​ສຸດ​ຍອດ​ຂອງ​ຜູ້­ນຳ​ສອງ​ເກົາ­ຫຼີ ຄັ້ງ​ທີ 3 ເຊິ່ງ​ສື່​ມວນ​ຊົນ​ລາວ​ເຮົາ ໄດ້​ລົງ​ພິມ​ໃນ​ວັນ​ທີ 24/9/2018 ຜ່ານ​ມາ ມີ​ເນື້ອ​ໃນ​ວ່າ: “... ສປປ ລາວ ສະ­ແດງ​ຄວາມ​ຍິນ​ດີ​ຕໍ່​ຜົນ­ສຳ­ເລັດ​ຂອງ​ການ​ພົບ​ປະ ຄັ້ງ​ທີ 3 ລະ­ຫວ່າງ​ປະ­ທານ ກິມ ຈອງ​ອຸນ ແຫ່ງ ສປປ ເກົາ­ຫຼີ ແລະ ປະ­ທາ­ນາ­ທິ­ບໍ­ດີ ມູນ​ແຈ​ອິນ ແຫ່ງ ສ ເກົາ­ຫຼີ ແຕ່​ວັນ​ທີ 18-20 ກັນ­ຍາ 2018 ທີ່​ນະ­ຄອນ­ຫຼວງ​ພຽງ​ຢາງ ສປປ ລາວ ເຫັນ​ວ່າ­ການ​ພົບ​ປະ​ຂອງ​ຜູ້­ນຳ​ສອງ​ເກົາ­ຫຼີ​ໃນ​ຄັ້ງ​ນີ້ ບໍ່​ພຽງ​ແຕ່​ເປັນ​ການ​ປະ­ກອບ­ສ່ວນ​ທີ່​ສຳ­ຄັນ ເຂົ້າ​ໃນ​ການ​ສືບ­ຕໍ່​ສົ່ງ­ເສີມ​ການ​ພົວ­ພັນ​ການ​ຮ່ວມ​ມື​ທີ່​ດີ ລະ­ຫວ່າງ​ສອງ​ເກົາ­ຫຼີ ໃຫ້​ດີ​ຍິ່ງໆ​ຂຶ້ນ ແຕ່​ຍັງ​ເປັນ​ການ​ຢ້ຳ​ຄືນ​ອີກ​ເທື່ອ​ໜຶ່ງ ເຖິງ​ຄວາມ​ພະ­ຍາ­ຍາມ​ຂອງ​ສອງ​ເກົາ­ຫຼີ ໃນ​ການ​ຮັກ­ສາ​ສັນ­ຕິ­ພາບ​ຄວາມ​ໝັ້ນ­ຄົງ​ຢ່າງ​ຖາ­ວອນ ແລະ ເຮັດ​ໃຫ້​ແຫຼມ​ເກົາ­ຫຼີ ເປັນ​ເຂດ​ປອດ​ອາ­ວຸດ​ນິວ​ເຄຼຍ.

    ສປປ ລາວ ມີ​ຄວາມ​ຍິນ​ດີ​ທີ່​ເຫັນ​ວ່າ​ສະ­ພາບ​ການ​ຢູ່​ແຫຼມ​ເກົາ­ຫຼີ ໄດ້​ຮັບ​ການ​ພັດ­ທະ­ນາ​ໄປ​ໃນ​ທາງ​ບວກ ແລະ ຫວັງ​ວ່າ​ທຸກ​ຝ່າຍ​ທີ່​ກ່ຽວ­ຂ້ອງ ຈະ​ສືບ­ຕໍ່​ຮ່ວມ​ກັນ​ຮັກ­ສາ​ບັນ­ຍາ­ກາດ​ທີ່​ດີ​ນີ້​ຕໍ່​ໄປ ສປປ ລາວ ຢືນ­ຢັນ​ຄືນ​ທັດ­ສະ­ນະ​ອັນ​ສະ­ເໝີ​ຕົ້ນ​ສະ­ເໝີ​ປາຍ​ຂອງ​ຕົນ ໃນ​ການ​ສະ­ໜັບ­ສະ­ໜູນ​ການ​ສ້າງ​ແຫຼມ​ເກົາ­ຫຼີ ໃຫ້​ປອດ​ອາ­ວຸດ​ນິວ​ເຄຼຍ ດ້ວຍ​ສັນ­ຕິ​ວິ­ທີ ເພື່ອ​ຜົນ​ປະ­ໂຫຍດ ກໍ່​ຄື ສັນ­ຕິ­ພາບ ສະ­ຖຽນ​ລະ​ພາບ ແລະ ການ​ຮ່ວມ​ມື​ໃນ​ແຫຼມ​ເກົາ­ຫຼີ ແລະ ໃນ​ໂລກ (ແຫຼ່ງ​ຂ່າວ​ຈາກ​ກະ­ຊວງ​ການ​ຕ່າງ­ປະ­ເທດ)...”.

    ໃນ​ຖາ­ນະ​ພົນ­ລະ­ເມືອງ​ຜູ້​ໜຶ່ງ​ທີ່​ເຄີຍ​ຜ່ານ​ແປວ­ໄຟ​ສົງ­ຄາມ ຜູ້​ຂຽນ​ຂໍ​ເປັນ​ແຮງ​ໃຈ​ໃຫ້​ສັນ­ຕິ­ພາບ​ເກີດ​ຂຶ້ນ​ຢ່າງ​ໝັ້ນ­ຄົງ ເຮັດ​ໃຫ້​ແຫຼມ​ເກົາ­ຫຼີ​ເປັນ​ເຂດ​ປອດ​ອາ­ວຸດ​ນິວ​ເຄຼຍ.

ແນວ​ລາວ

ຂ່າວທີ່ກ່ຽວຂ້ອງ