ທີມຊາດລາວ ເຂົ້າຮ່ວມເຕະບານ ບັງກາບັນດູ ໂກນ ຄັບ 2018

299 03 ຕ.ລ. 2018 ວົງຈອນກີລາ
ທີມຊາດລາວ ເຂົ້າຮ່ວມເຕະບານ ບັງກາບັນດູ ໂກນ ຄັບ 2018

    ວັນ​ທີ 28 ກັນ­ຍາ 2018 ທັບ​ນັກ­ກີ­ລາ​ເຕະ­ບານ​ຊາຍ​ທີມ​ຊາດ​ລາວ ຊຸດ​ໃຫຍ່ 24 ຄົນ ພ້ອມ​ດ້ວຍ​ຄະ­ນະ​ນຳ ແລະ ຄູ​ເຝິກ 7 ທ່ານ ເດີນ­ທາງ​ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ ລາຍ­ການ ບັງ​ກາ​ບັນ​ດູ ໂກນ ຄັບ 2018 ຫຼື (Bangabandhu Gold Cup 2018) ຢູ່​ປະ­ເທດ​ບັງ​ກລາ​ເທດ ວັນ​ທີ 1-12 ຕຸ­ລາ 2018 ເຊິ່ງ​ນຳ​ໂດຍ​ທ່ານ ຄຳ​ແພງ ວົງ​ຂັນ­ຕີ ຫົວ­ໜ້າ​ຄະ­ນະ ຜູ້​ຈັດ­ການ​ທີມ ແລະ ທ່ານ ໄມ​ວອງ ຫົວ­ໜ້າ​ຄູ​ເຝິກ​ຊາວ​ສິງ­ກະ­ໂປ.

    ການ​ແຂ່ງ­ຂັນ​ຄັ້ງ​ນີ້​ມີ 6 ປະ­ເທດ​ເຂົ້າ​ຮ່ວມ ໂດຍ​ແບ່ງ​ເປັນ 2 ກຸ່ມ​ຄື: ກຸ່ມ A ມີ ເນ​ປານ ປາ​ເລ​ສ​ຕາຍ ແລະ ທາ​ຈິ​ກິດ​ສະ­ຖານ ກຸ່ມ B ບັງ​ກະ­ລາ​ເທດ ລາວ ຟີ​ລິບ​ປິນ ສ່ວນ​ຕາ­ຕະ­ລາງ​ການ​ແຂ່ງ­ຂັນ​ວັນ​ທີ 1 ຕຸ­ລາ 2018 ເວ­ລາ 18:30 ໂມງ ທີມ​ຊາດ​ລາວ ພົບ​ກັບ ບັງ​ກລາ​ເທດ ວັນ​ທີ 3 ຕຸ­ລາ 2018 ເວ­ລາ 18:30 ໂມງ ທີມ​ຊາດ​ລາວ ພົບ​ກັບ ຟີ​ລິບ​ປິນ ທັງ 2 ນັດ ຈະ​ແຂ່ງ­ຂັນ​ຢູ່​ສະ­ໜາມ SYLHET ZILA STADIUM ເພື່ອ​ຈະ​ເອົາ​ອັນ​ດັບ 1 ແລະ ອັນ​ດັບ 2 ຜ່ານ​ເຂົ້າ​ສູ່​ຮອບ​ຮອງ​ຊະ­ນະ​ເລີດ ເຊິ່ງ​ຈະ​ແຂ່ງ­ຂັນ​ວັນ​ທີ 9-10 ຕຸ­ລາ 2018 ແລະ ນັດ​ຊີງ​ຊະ­ນະ​ເລີດ ວັນ​ທີ 12 ຕຸ­ລາ 2018.

    ພາຍ­ຫຼັງ​ຈົບ​ການ​ແຂ່ງ­ຂັນ​ລາຍ­ການ​ນີ້​ແລ້ວ ທີມ​ຊາດ​ລາວ​ຈະ​ເດີນ­ທາງ​ກັບ​ນະ­ຄອນ­ຫຼວງ​ວຽງ​ຈັນ ເພື່ອ​ລົງ​ແຂ່ງ­ຂັນ​ນັດ​ອຸ່ນ​ເຄື່ອງ 1 ນັດ ວັນ​ທີ 16 ຕຸ­ລາ 2018 ພົບ​ກັບ ທີມ​ຊາດ​ມົງ​ໂກ​ລີ ຢູ່​ສະ­ໜາມ​ກີ­ລາ​ແຫ່ງ​ຊາດ (ຫຼັກ 16).

ຂ່າວທີ່ກ່ຽວຂ້ອງ