ຂ່າວຫຼ້າສຸດ

ຄູ ແລະ ຈັນຍາບັນ

691 08 ຕ.ລ. 2018 ນານາສາລະ

    ວັນ​ທີ 7 ຕຸ­ລາ ຄື​ວັນ​ຄູ​ແຫ່ງ​ຊາດ ເຊິ່ງ​ບັນ­ດາ​ຄູ​ທັງ­ຫຼາຍ​ຮູ້­ສຶກ​ພາກ­ພູມ​ໃຈ ເມື່ອ​ໄດ້​ເລືອກ​ອາ­ຊີບ​ຄູ ເປັນ​ທາງ​ເດີນ​ຂອງ​ຊີ­ວິດ ແຕ່​ອາດ​ມີ​ຄູ​ຈຳ­ນວນ​ໜຶ່ງ​ທີ່​ໜ້າ​ເປັນ​ຫ່ວງ​ນັ້ນ​ຄື ພວກ​ຄູ​ອາ­ສາ​ທີ່​ຮຽນ​ຈົບ​ຄູ​ອອກ​ໄປ​ສອນ​ຕາມ​ໂຮງ­ຮຽນ​ຕ່າງ​ແຂວງ ເພື່ອ​ລໍ​ເຂົ້າ​ເປັນ​ລັດ­ຖະ­ກອນ​ຄູ ເພາະ​ຄູ​ບາງ​ທ່ານ ໄດ້​ສອນ​ຫຼາຍ​ປີ​ຍັງ​ບໍ່​ມີ​ວີ່​ແວວ​ໂຄ​ຕ້າ​ລັດ­ຖະ­ກອນ ຈຶ່ງ​ຖອດ​ໃຈ​ເລີກ­ລາ​ຄວາມ​ຝັນ​ໄປ​ຫຼາຍ​ທ່ານ...!.

    ວັນ​ທີ  7 ຕຸ­ລາ​ທຸກ​ປີ ພວກ​ເຮົາ​ຈັດ​ວັນ​ຄູ​ເພື່ອ​ລະ­ນຶກ​ເຖິງ​ບຸນ­ຄຸນ​ຂອງ​ຄູ​ທີ່​ມີ​ຕໍ່​ພາ­ລະ­ກິດ​ການ​ສ້າງ​ຊາດ ເຊິ່ງ​ໃນ​ຂະ­ນະ​ດຽວ​ກັນ ຄູ​ເອງ​ກໍ່​ຄວນ​ທົບ​ທວນ​ຂະ​ບວນ​ການ​ສິດ­ສອນ​ຂອງ​ຕົນ​ເອງ​ຄືນ ເພື່ອ​ປັບ­ປຸງ​ພັດ­ທະ­ນາ​ຄວາມ​ຮູ້ ວິ­ຊາ​ສະ­ເພາະ​ທີ່​ຕົນ​ຮັບ­ຜິດ­ຊອບ​ສິດ­ສອນ ກົດ­ໝາຍ​ການ​ສຶກ​ສາ​ສະ­ບັບ​ປັບ­ປຸງ ປີ 2008 ມາດ­ຕາ 42 ໄດ້​ກຳ­ນົດ​ມາດ­ຖານ​ຂອງ​ຄູ ດັ່ງ​ລຸ່ມ​ນີ້: (1) ຄູ ຕ້ອງ​ມີ​ຫຼັກ​ໝັ້ນ​ທັດ­ສະ­ນະ​ການ­ເມືອງ​ທີ່​ຖືກ­ຕ້ອງ (2) ມີ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ ມີ​ຈັນ​ຍາ​ບັນ ຮັກ​ອາ­ຊີບ​ຄູ ມີ​ມະ­ນຸດ​ສຳ­ພັນ​ດີ ເປັນ​ແບບ­ຢ່າງ​ໃຫ້​ແກ່​ນັກ­ຮຽນ (3) ມີ​ຄວາມ​ຮູ້ ຄວາມ​ສາ­ມາດ​ວິ­ຊາ​ສະ­ເພາະ... ມາດ­ຕາ 45 ໄດ້​ກຳ­ນົດ​ພັນ­ທະ​ຂອງ​ຄູ​ດັ່ງ­ນີ້: ສອນ​ຄົ້ນ­ຄວ້າ​ຫຼັກ­ສູດ ແລະ ບໍ­ລິ­ການ​ວິ­ຊາ​ການ​ແກ່​ສັງ­ຄົມ ສອນ​ຕາມ​ຫຼັກ­ສູດ ຄວາມ​ຮູ້ ວິ­ຊາ​ສະ­ເພາະ ຫຼື ຄວາມ​ຊຳ­ນານ​ຂອງ​ຕົນ... ຜູ້​ຂຽນ​ຈຶ່ງ​ຄິດ​ສ່ວນ​ຕົວ​ວ່າ: ການ​ຈະ​ກ້າວ​ສູ່​ຄວາມ​ເປັນ​ຄູ​ທີ່​ໄດ້​ມາດ­ຕະ­ຖານ ແລະ ເປັນ​ຄູ​ຄຸ­ນະ­ພາບ​ຄູ ຕ້ອງ​ໄດ້​ເອົາ­ໃຈ­ໃສ່​ຝຶກ​ຝົນ​ຄົ້ນ­ຄວ້າ​ພັດ­ທະ­ນາ​ຕົນ​ເອງ ສຳ­ຄັນ ບໍ່​ເປັນ​ຄູ​ຫຼົງ​ຕົວ​ເອງ.

    ຄວາມ​ເປັນ​ຄູ​ນັ້ນ ມີ​ຫຼາຍ​ອົງ​ປະ­ກອບ​ເພື່ອ​ຢຶດ​ໝັ້ນ​ໃນ​ອາ­ຊີບ​ຂອງ​ຕົນ​ໃຫ້​ກ້າວ­ໜ້າ ແລະ ສຳ­ຄັນ​ກໍ່​ແມ່ນ​ໜ້າ­ທີ່​ອົບ­ຮົມ​ສັ່ງ­ສອນ​ນັກ­ຮຽນ​ໃຫ້​ໄດ້​ຄວາມ​ຮູ້ ຕາມ​ພັນ­ທະ ແລະ ໜ້າ­ທີ່​ສ່ວນ​ຕົວ​ຜູ້​ຂຽນ​ຍັງ​ຄິດ​ອີ​ກວ່າ: ການ​ຮຽນ​ຈົບ​ຄູ ແລະ ຖືກ​ບັນ­ຈຸ​ຄູ​ນັ້ນ ເປັນ​ພຽງ​ຂັ້ນ​ຕອນ​ໜຶ່ງ​ຂອງ​ອາ­ຊີບ​ຄູ ແຕ່​ບໍ່​ທັນ​ສົມ­ບູນ ເພາະ​ຂະ​ບວນ​ການ​ຮຽນ-ການ​ສອນ ຍຸກ​ປັດ­ຈຸ­ບັນ​ນີ້ ຕ້ອງ​ໄດ້​ພັດ­ທະ­ນາ​ຄວາມ​ຮູ້​ວິ­ຊາ​ການ​ທີ່​ຈົບ​ມາ​ຢູ່​ຕະ­ຫຼອດ​ເວ­ລາ ພະ­ພຸດ­ທະ­ເຈົ້າ​ໄດ້​ສອນ­ໜ້າ​ທີ່​ຂອງ​ຄູ​ໄວ້​ດັ່ງ­ນີ້:

    (1) ຄູ ຕ້ອງ​ເຝິກ­ຝົນ​ແນະ­ນຳ​ລູກ­ສິດ​ໃຫ້​ເປັນ​ຄົນ​ດີ.

    (2) ຄູ ຕ້ອງ​ສອນ​ໃຫ້​ແຈ່ມ​ແຈ້ງ​ບໍ່​ປິດ​ບັງ.

    (3) ຄູ ຕ້ອງ​ສອນ​ວິ­ຊາ​ຄວາມ​ຮູ້​ໃຫ້​ຈົບ.

    (4) ຄູ ຕ້ອງ​ຍົກ­ຍ້ອງ​ລູກ­ສິດ​ຕາມ​ສົມ­ຄວນ.

    (5) ຄູ ຕ້ອງ​ສອນ​ລູກ­ສິດ​ໃຫ້​ຮູ້­ຈັກ​ປະ­ກອບ​ອາ­ຊີບ​ລ້ຽງ​ຕົນ​ເອງ.

    ສະ­ຫຼຸບ​ວ່າ: ວັນ​ທີ 7 ຕຸ­ລາ ທັງ​ເປັນ​ການ​ສະ­ຫຼອງ​ວັນ​ຄູ ເພື່ອ​ນຶກ​ເຖິງ​ບຸນ­ຄຸນ​ຂອງ​ຄູ ຜູ້​ເຮັດ​ໜ້າ­ທີ່​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ຂອງ​ຊາດ ຂະ­ນະ​ດຽວ​ກັນ ຄູ​ທັງ­ຫຼາຍ ກໍ່​ບໍ່​ຄວນ​ຫຼົງ​ຕົວ​ເອງ​ວ່າ ຮຽນ​ຈົບ​ແລ້ວ ໄດ້​ເປັນ​ຄູ​ແລ້ວ ບໍ່​ຕ້ອງ​ຄົ້ນ­ຄວ້າ​ສຶກ​ສາ​ຕື່ມ​ອີກ ພ້ອມ​ນີ້ ຜູ້​ບໍ­ລິ­ຫານ​ການ​ສຶກ​ສາ​ກໍ່​ຕ້ອງ​ຂຸ້ນ­ຂ້ຽວ​ຕາມ​ທີ່​ຜູ້​ໃຫຍ່​ເພິ່ນ​ແນະ­ນຳ.

ຂ່າວທີ່ກ່ຽວຂ້ອງ