ລາວ-ຊັງມາຣິໂນ ສ້າງຕັ້ງສາຍພົວພັນການທູດນຳກັນ

110 09 ຕ.ລ. 2018 ຂ່າວໜ້າ​ໜຶ່ງ

    ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ແລະ ສາ­ທາ­ລະ­ນະ​ລັດ ຊັງ​ມາ​ຣິ​ໂນ ລົງ​ນາມ​ສັນ­ຍາ​ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ.

    ໃນ​ວັນ​ທີ 28 ກັນ­ຍາ 2018 ທີ່​ສຳ­ນັກ­ງານ​ໃຫຍ່​ຂອງ​ອົງ­ການ​ສະ­ຫະ​ປະ­ຊາ​ຊາດ (ສປຊ) ທີ່​ນິວ​ຢອກ ສະ­ຫະ­ລັດ​ອາ​ເມ​ຣິ​ກາ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ແລະ ທ່ານ ນິ​ໂກ​ລາ ເຣັນ​ຊີ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ການ­ເມືອງ ແຫ່ງ ສາ­ທາ­ລະ­ນະ​ລັດ ຊັງ​ມາ​ຣິ​ໂນ ໄດ້​ຮ່ວມ​ກັນ​ລົງ​ນາມ​ສັນ­ຍາ​ວ່າ​ດ້ວຍ​ການ​ສ້າງ­ຕັ້ງ​ສາຍ​ພົວ­ພັນ​ການ​ທູດ​ລະ­ຫວ່າງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ແລະ ສາ­ທາ­ລະ­ນະ​ລັດ ຊັງ​ມາ​ຣິ​ໂນ ໂດຍ​ມີ​ນັກ​ການ​ທູດ​ຂອງ​ທັງ​ສອງ​ຝ່າຍ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

    ຈຸດ­ປະ­ສົງ​ການ​ສ້າງ­ຕັ້ງ​ສາຍ​ພົວ­ພັນ​ການ​ທູດ​ດັ່ງ­ກ່າວ ແມ່ນ​ເພື່ອ​ພັດ­ທະ­ນາ ແລະ ເພີ່ມ​ທະ­ວີ​ມິດ­ຕະ­ພາບ ແລະ ການ​ຮ່ວມ​ມື​ດ້ານ​ການ­ເມືອງ​ເສດ­ຖະ­ກິດ-ສັງ­ຄົມ ແລະ ວັດ­ທະ­ນາ​ທຳ ລະ­ຫວ່າງ​ສອງ​ປະ­ເທດ ແລະ ປະ­ຊາ­ຊົນ​ສອງ​ຊາດ.

    ສັນ­ຍາ​ດັ່ງ­ກ່າວ ຈະ​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ ທີ່​ໄດ້​ຮັບ​ແຈ້ງ​ເປັນ​ລາຍ​ລັກ​ອັກ­ສອນ​ສະ­ບັບ​ສຸດ​ທ້າຍ​ຂອງ​ຄູ່​ສັນ­ຍາ ກ່ຽວ​ກັບ​ການ​ສຳ­ເລັດ​ຂັ້ນ​ຕອນ​ພາຍ​ໃນ​ຂອງ​ຕົນ ທີ່​ຈຳ­ເປັນ​ໃນ​ການ​ມີ​ຜົນ​ບັງ­ຄັບ​ໃຊ້ ເຊິ່ງ​ຈະ​ເຮັດ​ໃຫ້ ສປປ ລາວ ມີ​ສາຍ​ພົວ­ພັນ​ການ​ທູດ​ກັບ 141 ປະ­ເທດ ຈາກ​ຈຳ­ນວນ​ປະ­ເທດ​ສະ­ມາ­ຊິກ​ອົງ­ການ​ສະ­ຫະ​ປະ­ຊາ​ຊາດ​ທັງ​ໝົດ 193 ປະ­ເທດ​ໃນ​ທົ່ວ​ໂລກ.

    ປະ­ເທດ​ຊັງ​ມາ​ຣິ​ໂນ ເຂົ້າ​ເປັນ​ສະ­ມາ­ຊິກ​ຂອງ​ອົງ­ການ ສປຊ ໃນ​ວັນ​ທີ 2 ມີ­ນາ 1992 ແລະ ເປັນ​ປະ­ເທດ​ນ້ອຍ​ອັນ​ດັບ​ທີ​ສາມ​ໃນ​ທະ­ວີບ​ເອີ​ຣົບ ບໍ່​ມີ​ຊາຍ​ແດນ​ຕິດ​ກັບ​ທະ­ເລ ໂດຍ​ອ້ອມ​ຮອບ​ດ້ວຍ​ປະ­ເທດ​ອິ​ຕາ​ລີ ມີ​ເນື້ອ­ທີ່​ທັງ​ໝົດ 61,2 ກິ​ໂລ​ຕາ​ແມັດ ມີ​ປະ­ຊາ­ກອນ 33.562 ຄົນ ໃນ​ນັ້ນ 97% ນັບ­ຖື​ສາ­ສະ­ໜາ​ກາ­ໂຕ­ລິກ ພາ­ສາ​ທາງ​ການ ແມ່ນ​ພາ­ສາ​ອິ​ຕາ​ລີ ນະ­ຄອນ­ຫຼວງ​ແມ່ນ​ຊັງ​ມາ​ຣິ​ໂນ ໄດ້​ຮັບ​ເອ­ກະ­ລາດ​ຈາກ​ຈັກ­ກະ­ພັດ​ໂຣ​ມັນ ໃນ​ວັນ​ທີ 3 ກັນ­ຍາ ຄສ 301 ບໍ່​ໄດ້​ເປັນ​ສະ­ມາ­ຊິກ​ສະ­ຫະ­ພາບ​ເອີ​ຣົບ ແຕ່​ໃຊ້​ເງິນ​ສະ­ກຸນ​ເອີ​ໂຣ.

ຂ່າວທີ່ກ່ຽວຂ້ອງ