ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 10-10-2018

199 10 ຕ.ລ. 2018 ຫົວຂໍ້ຂ່າວອື່ນໆ

       ມື້ນີ້​ມີ​ເລື່ອງ​ກ່ຽວ​ກັບ​ການ​ກຳນົດ​ເສັ້ນ​ຄວາມ​ອິດເມື່ອຍ​ຂອງ​ນັກ​ບິນ​ໃນ​ການ​ປະຕິບັດ​ງານ ແລະ ປິດ​ທ້າຍ​ກັບ​ເລື່ອງ​ນະໂຍບາຍ​ຫຼຸດຜ່ອນ​ຄວາມ​ຄຽດ​ຂອງ​ນັກ​ສຶກ​ສາ ອົດ​ສະ​ຕຣາ​ລີ.

     ທີ່​ຍີ່ປຸ່ນ: ໜັງສືພິມ​ວຽງ​ຈັນ​ທາມ ສະບັບ​ວັນ​ທີ 25 ເດືອນ​ສິງຫາ​ປີ​ນີ້ ໄດ້​ລົງ​ບົດ​ກ່ຽວ​ກັບ​ມາດ​ຕະການ​ຂອງ​ທາງ​ການ​ຍີ່ປຸ່ນ ເພື່ອ​ແກ້​ໄຂ​ສະພາບ​ນັກ​ບິນ​ອິດເມື່ອຍ ໂດຍ​ໄດ້​ໃຫ້​ລາຍ​ລະອຽດ​ວ່າ ທາງ​ກະຊວງ​ຂົນສົ່ງ​ໃນ​ປະເທດ​ນີ້​ພວມ​ຄົ້ນຄວ້າ​ໃຫ້​ເຫັນ​ວ່າ​ໃຊ້​ເວລາ​ບັນຊາ​ເຄື່ອງ​ບິນ​ຫຼາຍ​ປານໃດ ແລະ ມີ​ປັດ​ໄຈ​ແນວໃດ​ແດ່​ທີ່​ເຮັດ​ໃຫ້​ນັກ​ບິນ​ອິດເມື່ອຍ ທັງ​ນີ້ ກໍ່​ເພື່ອ​ກຳນົດ​ລະດັບ​ຄວາມ​ອິດເມື່ອຍ ຂອງ​ນັກ​ບິນ​ຍີ່ປຸ່ນ ໃຫ້​ຢູ່​ໃນ​ຂັ້ນ​ດຽວ​ກັບ​ຂອງ ສະຫະລັດ​ອາ​ເມ​ຣິ​ກາ ແລະ ເອີ​ຣົບ ອີກ​ດ້ານ​ໜຶ່ງ​ການ​ຄົ້ນຄວ້າ​ນີ້​ກໍ່​ມີ​ຈຸດປະສົງ​ເພື່ອ​ປ້ອງ​ກັນ​ບໍ່​ໃຫ້​ນັກ​ບິນ​ແບກ​ຫາບ​ວຽກ​ເກີນ​ກຳລັງ ເຊິ່ງ​ຈະ​ນຳໄປ​ສູ່​ບັນຫາ​ທີ່​ເປັນ​ອັນຕະລາຍ​ຈາກ​ສະພາບ​ອິດເມື່ອຍ ໃນ​ປີ 1992 ຍີ່່​ປຸ່ນ​ໄດ້​ກຳນົດ​ເສັ້ນ​ສະພາບ​ອິດເມື່ອຍ​ຂອງ​ນັກ​ບິນ​ໄວ້​ດັ່ງນີ້: ນັກ​ບິນ​ຄູ່​ສາຍພາຍ​ໃນ​ປະເທດ​ມີ​ກຳນົດ​ບິນ​ບໍ່​ເກີນ 8 ຊົວ​ໂມງ​ຕິດຕໍ່​ກັນ ສ່ວນ​ສາຍ​ການບິນ​ຕ່າງປະເທດ​ນັ້ນ​ແມ່ນ​ບໍ່​ໃຫ້​ເກີນ 12 ຊົ່ວໂມງ​ຕິດຕໍ່​ກັນ ຖ້າ​ກາຍ​ຈະ​ຕົກ​ຢູ່​ໃນ​ສະພາບ​ອິດເມື່ອຍ ຢູ່​ສະຫະລັດ​ອາ​ເມ​ຣິ​ກາ ແລະ ເອີ​ຣົບ ການ​ກຳນົດ​ເສັ້ນ​ຄວາມ​ອິດເມື່ອຍ​ຂອງ​ນັກ​ບິນ​ນັ້ນ​ເຄັ່ງ​ຄັດ ຮັດກຸມ​ກວ່າ​ຂອງ​ຍີ່ປຸ່ນ​ຫຼາຍ ພາຍຫຼັງ​ເຄື່ອງ​ບິນ​ບໍລິສັດ​ໂຄ່ນ​ແກນ​ແອ(Colgan Air) ຂອງ​ສະຫະລັດ ເກີດ​ອຸບັດ​ຕິ​ເຫດ​ຕົກ​ໃນ​ປີ 2009 ເຮັດ​ໃຫ້​ທັງ​ໝົດ 49 ຄົນ ເສຍ​ຊີວິດ ກ່ອງ​ດຳ​ຂອງ​ຍົນ​ຄັນ​ນັ້ນ​ໄດ້​ບັນທຶກ​ສຽງ​ຫາວ​ນອນ​ຂອງ​ນັກ​ບິນ​ແບບ​ຕິດຕໍ່​ກັນ ດັ່ງນັ້ນ ຈຶ່ງ​ສາມາດ​ຢັ້ງຢືນ​ໄດ້​ວ່າ ຍົນ​ລຳ​ນັ້ນ​ຕົກ​ຍ້ອນ​ນັກ​ບິນ​ອິດເມື່ອຍ ຢູ່​ສະຫະລັດ​ອາ​ເມ​ຣິ​ກາ ແລະ ເອີ​ຣົບ​ນັ້ນ ສາຍ​ການບິນ​ຕ້ອງ​ກຳນົດ​ເສັ້ນ​ເວລາ​ຄວາມ​ອິດເມື່ອຍ​ສຳລັບ​ນັກ​ບິນ​ທີ່​ບິນ​ໃນ​ເວລາ​ຂ້ອນ​ຄືນ ຫຼື ໃນ​ເວລາ​ແຕ່​ເຊົ້າ​ມືດ ເວົ້າ​ສະເພາະ  ການ​ທີ່​ຍີ່ປຸ່ນ​ຕ້ອງ​ໄດ້​ກຳນົດ​ເສັ້ນ​ອິດເມື່ອຍ​ສຳລັບ​ນັກ​ບິນ​ນັ້ນ​ກໍ່​ເພາະວ່າ​ສາຍ​ການບິນ​ຍີ່ປຸ່ນ ມີ​ພັນທະ​ພາບ​ກັບ​ຫຼາຍ​ສາຍ​ການບິນ​ຂອງ​ສະຫະລັດ ແລະ ເອີ​ຣົບ ດັ່ງນັ້ນ ກຳນົດ​ເລື່ອງ​ນີ້້​ຕ້ອງ​ເປັນ​ເອກະ​ພາບ​ກັນ.

     ທີ່​ອົດ​ສະ​ຕຣາ​ລີ:  ໃນ​ປັດຈຸບັນ​ຫຼາຍ​ປະເທດ​ໄດ້​ລິ​ເລີ່ມ​ນະໂຍບາຍ​ດີໆ ເພື່ອ​ຫຼຸດຜ່ອນ​ຄວາມ​ຄຽດ​ຂອງ​ນັກ ຮຽນ ນັກ​ສຶກ​ສາ​ໃນ​ເວລາ​ກຽມ​ສອບເສັງ​ຈົບ​ຊັ້ນ ຫຼື ຂຶ້ນ​ຊັ້ນ ສຳລັບ​ຢູ່​ອົດ​ສະ​ຕຣາ​ລີ ນັ້ນ​ກໍ່​ມີ​ສະຖິຕິ​ສຳ​ຫຼວດ​ໂດຍ​ອົງການ​ໂອ​ອີ​ຊີ​ດີ (OECD-ອົງການ​ປະເທດ​ການ​ຮ່ວມ​ມື​ທາງ​ເສດຖະກິດ ແລະ ການ​ພັດທະນາ) ທີ່​ຊີ້​ອອກ​ວ່າ ນັກ​ສຶກ​ສາ ມະຫາວິທະຍາໄລ ອົດ​ສະ​ຕຣາ​ລີ ປະ​ເຊີນ​ກັບ​ສະພາບ​ຄວາມ​ຄຽດ ຈາກ​ການ​ກະກຽມ​ສອບເສັງ ສ່ຽງ​ທີ່​ສຸດ​ໃນ​ໂລກ (Vientiane times 4/11/2017) ໃນ​ນັ້ນ ເພດ​ຊາຍ​ກວມ 50% ແລະ ເພດ​ຍິງ 75% ຂອງ​ຜູ້​ໃຫ້​ຂໍ້​ມູນ​ສຳ​ຫຼວດ​ນີ້​ໄດ້​ດຳເນີນ​ຢູ່ 72 ປະເທດ​ໃນ​ທົ່ວ​ໂລກ ເພື່ອ​ແກ້​ໄຂ​ບັນຫາ​ຄວາມ​ຄຽດ ຈາກ​ການ​ກະກຽມ​ການ​ສອບເສັງ​ນີ້ ທາງ​ມະຫາວິທະຍາໄລ ແຄນ​ເບີ​ຮາ ໄດ້​ສ້າງ​ສວນສັດ​ໄວ້​ໃນ​ຂອບ​ຮົ້ວ​ມະຫາ ວິທະຍາໄລ ເພື່ອ​ໃຫ້​ນັກ​ສຶກ​ສາ​ໄດ້​ໃຊ້​ເປັນ​ບ່ອນ​ພັກຜ່ອນ ລະບາຍ​ອາລົມ  ທ່ານ ໂທ​ມັດ ນຽນ​ເຊັນ (Thomas Nielsen ) ຊ່ຽວຊານ​ປະຈຳ​ມະຫາວິທະຍາໄລ​ມີ​ຄຳ​ເຫັນ​ວ່າ ການ​ພົວພັນ​ລະຫວ່າງ​ນັກ​ສຶກ​ສາ​ກັບ​ສັດ​ນັ້ນ ແມ່ນ​ປັດ​ໄຈ​ສຳຄັນ​ໃນ​ການ​ຫຼຸດຜ່ອນ​ຄວາມ​ຄຽດ ພຽງ​ແຕ່​ມີ​ໂອກາດ​ໄດ້​ລູບຄຳ​ສັດ ກໍ່​ຈະ​ເປັນ​ການ​ພັກຜ່ອນ​ທີ່​ດີ​ໄດ້ ທ່ານ​ກ່າວ​ຕື່ມ​ວ່າ: ເມື່ອ​ໄດ້​ເຮັດ​ວຽກ​ໜັກ​ກໍ່​ຕ້ອງ​ມີ​ໂອກາດ​ເຄື່ອນ​ໄຫວ ການ​ໄດ້​ມີ​ໂອກາດ​ພັກຜ່ອນ ແມ່ນ​ຂໍ​ກຸນແຈ ສູ່​ການ​ຜ່ອນຄາຍ​ຈາກ​ຄວາມ​ຄຽດ ສຳລັບ​ຢູ່ ຍີ່ປຸ່ນ ກໍ່​ມີ​ວິທີ​ການ​ຫຼຸດຜ່ອນ ຄວາມ​ຄຽດ​ຂອງ​ເດັກ​ນັກຮຽນ​ໃນ​ມື້​ເລີ່ມ​ຕົ້ນ​ເຂົ້າ​ຮຽນ​ໃໝ່​ຂອງ​ທຸກໆ​ປີ ເພາະ​ໃນ​ໂອກາດ​ນີ້​ນັກຮຽນ​ມັກ​ຈະ​ມີ​ຄວາມ​ຄຽດ​ຫຼາຍ​ຫຼັງ​ໄດ້​ພັກຜ່ອນ​ເປັນ​ເວລາ​ຍາວ ດັ່ງນັ້ນ ໃນ​ມື້​ນິ​​ີ້​ບັນດາ​ດາລາ​ນັກສະແດງ ກໍ່​ຄື ຄົນ​ດັງ​ໃນ​ດວງ​ໃຈ​ຂອງ​ເດັກ​ຕ່າງ​ກໍ່​ໄດ້​ອອກ​ມາ​ພົບ​ປະ ນຳພາ​ເດັກ​ນັກຮຽນ ເລີ່ນ​ເລິງ ຫຼຸດຜ່ອນ​ຄວາມ​ກັງວົນ​ໃຈ​ເກີນ​ໄປ​ກ່ຽວ​ກັບ​ອະນາຄົດ​ຂອງ​ການ​ຮ່ຳຮຽນ ນອກຈາກ​ນັ້ນ ພາຍ​ໃນ​ຂອບ​ຮົ້ວ​ຂອງ​ໂຮງຮຽນ ກໍ່​ໄດ້​ຈັດ​ໃຫ້​ມີ​ບ່ອນ​ພັກຜ່ອນ ບ່ອນ​ພົບ​ປະ​ໝູ່ຄູ່​ນັກຮຽນ​ຍີ່ປຸ່ນ​ນັ້ນ​ມີ​ລະດັບ​ຄວາມ​ກັງວົນ​ສ່ຽງ​ກ່ຽວ​ກັບ​ການ​ຮ່ຳຮຽນ ແລະ ມີ​ເວລາ​ພັກຜ່ອນ​ໜ້ອຍ. 

ຂ່າວທີ່ກ່ຽວຂ້ອງ