ຂ່າວຫຼ້າສຸດ

ເປັນຫ່ວງ...ການປະຕິບັດ

539 10 ຕ.ລ. 2018 ນານາສາລະ

    ການ​ຕັ້ງ​ຫົວ­ຂໍ້​ບົດ​ນີ້ ອາດ​ແປກ​ຈັກ​ໜ່ອຍ ແຕ່​ຜູ້​ຂຽນ​ກໍ່​ມີ​ຈຸດ­ປະ­ສົງ​ຢາກ​ຊົມ­ເຊີຍ​ນະ­ໂຍ­ບາຍ​ລັດ­ຖະ­ບານ ຫຼັງ​ຈາກ​ທີ່​ໄດ້​ອ່ານ​ລາຍ​ງານ​ຜົນ​ຂອງ​ກອງ​ປະ­ຊຸມ​ເປີດ​ກວ້າງ​ລັດ­ຖະ­ບານ ເມື່ອ​ວັນ​ທີ 19/9/2018 ຜ່ານ​ມາ​ເຫັນ​ວ່າ ແຜນ­ການ ແລະ ຄາດ­ໝາຍ​ທີ່​ລັດ­ຖະ­ບານ​ວາງ​ເປັນ​ນະ­ໂຍ­ບາຍ​ຖື​ເປັນ​ທຸງ­ໄຊ​ຕໍ່​ການ​ພັດ­ທະ­ນາ​ຊາດ ເຊິ່ງ​ກໍ່​ຄື​ການ​ບຳ­ບັດ​ທຸກ ແລະ ບຳ­ລຸງ​ສຸກ​ໃຫ້​ແກ່​ປະ­ຊາ­ຊົນ ແຕ່​ທີ່​ຍັງ​ຄິດ​ເປັນ​ຫ່ວງ ກໍ່​ຄື ເລື່ອງ​ຈັດ​ຕັ້ງ​ປະ­ຕິ­ບັດ​ແຜນ​ໃຫ້​ເກີດ​ດອກ​ອອກ​ຜົນ (policy inplementation).

    ຜົນ​ການ​ປະ­ຊຸມ​ເປີດ​ກວ້າງ​ຂອງ​ລັດ­ຖະ­ບານ ໄດ້​ສະ­ຫຼຸບ​ອອກ​ມາ​ຫຼາຍ​ຂໍ້ ເຊິ່ງ​ໃນ​ຂໍ້​ທີ 2 ອ່ານ​ແລ້ວ​ກໍ່​ອົດ​ດີ­ໃຈ​ບໍ່​ໄດ້ ທີ່​ຝ່າຍ​ລັດ​ໄດ້​ເນັ້ນ​ໃຫ້​ກະ­ຊວງ​ກ່ຽວ­ຂ້ອງ​ຄົ້ນ­ຄວ້າ​ນະ­ໂຍ­ບາຍ ຫຼຸດ​ອັດ­ຕາ​ພາ­ສີ​ອາ­ກອນ ໃນ​ການ​ນຳ​ເຂົ້າ​ປັດ​ໄຈ​ການ​ຜະ­ລິດ ເຊັ່ນ: ຝຸ່ນ ປຸ໋ຍ ແນວ​ພັນ​ພືດ ແລະ ສັດ ການ​ສະ­ໜັບ­ສະ­ໜູນ​ສັດ­ຕະ­ວະ­ແພດ ການ​ປາບ​ປາມ​ສັດ­ຕູ​ພືດ ການ​ໃຫ້​ຄວາມ​ຮູ້​ທາງ​ດ້ານ​ເຕັກ­ນິກ​ວິ­ຊາ​ກາ​ນິ່ ຜູ້​ຂຽນ​ອ່ານ​ທົບ​ທວນ​ໄປ​ມາ​ຈຶ່ງ​ຄິດ​ເຫັນ​ວ່າ ມີ​ຄວາມ​ຄ້າຍ­ຄື​ວິ­ທີ​ການ​ທີ່​ພະ­ພຸດ­ທະ­ເຈົ້າ​ແນະ­ນຳ​ພວກ​ພາມ​ປ່ຽນ​ວິ­ທີ​ການ​ບູ­ຊາ­ຍັນ ດ້ວຍ​ການ​ຂ້າ​ສັດ​ສີ່​ຂາ ຫຼື ສອງ​ຂາ ຫັນ​ມາ​ປະ­ຕິ­ບັດ​ສິນ​ລະ​ທຳ​ແທນ ແລະ ແນະ­ນຳ​ເຈົ້າ​ຊີ­ວິດ​ຜູ້​ໜຶ່ງ​ໃຫ້​ປ່ຽນ​ວິ­ທີ​ປາບ​ປາມ​ໂຈນ ດ້ວຍ​ການ​ແຈກ​ແນວ​ພືດ​ພັນ​ທັນ​ຍາ​ຫານ​ໃຫ້​ພວກ​ເຂົາ ໄດ້​ມີ​ທີ່​ດິນ ແລະ ເຄື່ອງ​ປູກ­ຝັງ ລ້ຽງ​ຊີບ ເພາະ​ບາງ​ກໍ­ລະ­ນີ​ບັນ­ດາ ພວກ​ຂີ້­ລັກ ພວກ​ໂຈນ​ກໍ່​ເກີດ​ມາ​ຈາກ​ຄວາມ​ໂງ່​ຄວາມ​ບໍ່​ຮູ້ ແລະ ຄວາມ​ບໍ່​ມີ ເຊິ່ງ​ຄວາມ­ທຸກ​ຍາກ​ຂາດ­ເຂີນ​ຫຼາຍ​ປະ­ການ​ກໍ່​ຈູງ​ໃຈ ໃຫ້​ຄົນ​ກາຍ­ເປັນ​ຂີ້­ລັກ​ກາຍ­ເປັນ​ໂຈນ​ໄດ້.

    ຜົນ​ກອງ​ປະ­ຊຸມ​ດັ່ງ­ກ່າວ ອ່ານ​ແລ້ວ​ຍັງ​ເຫັນ​ວ່າ ຫຼາຍ​ກະ­ຊວງ​ຕ່າງ​ກໍ່​ໄດ້​ຮັບ​ນະ­ໂຍ­ບາຍ​ກັນ​ໄປ​ປະ­ຕິ­ບັດ ເພື່ອ​ບຳ­ບັດ​ທຸກ​ບຳ­ລຸງ​ສຸກ​ໃຫ້​ແກ່​ປະ­ຊາ­ຊົນ​ອ່ານ​ຮູ້​ນະ­ໂຍ­ບາຍ ແລະ ແຜນ​ລັດ­ຖະ­ບານ​ແລ້ວ ກໍ່​ຮູ້​ໂລດ​ວ່າ: ນັ້ນ​ຄື​ຄວາມ​ຫ່ວງ​ໃຍ​ຊີ­ວິດ​ຂອງ​ປະ­ຊາ­ຊົນ ໂດຍ​ສະ­ເພາະ ເຂດ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວ​ມິ່ ຂຽນ​ມາ​ຮອດ​ນີ້ ຍັງ​ມີ​ສິ່ງ​ໜຶ່ງ​ຢາກ​ນຳ​ສະ­ເໜີ ເພື່ອ​ເປັນ​ການ​ແລກ­ປ່ຽນ​ບໍ່​ວ່າ​ຢູ່​ສູນ​ກາງ ເຊັ່ນ: ນະ­ຄອນ­ຫຼວງ ແລະ ທ້ອງ­ຖິ່ນ​ນັ້ນ​ຄື​ເລື່ອງ ນຳ​ນະ­ໂຍ­ບາຍ​ໄປ​ປະ­ຕິ­ບັດ ເຊັ່ນ: ແຂວງ ເມືອງ ແລະ ບ້ານ ເພື່ອ​ຮັບ­ປະ­ກັນ​ປະ­ສິດ­ທິ­ພາບ ເຫັນ​ວ່າ​ຝ່າຍ​ກວດ­ກາ ແລະ ປະ​ເມີນ​ຜົນ​ຕິດ­ຕາມ​ໃຫ້​ລະ­ອຽດ​ທີ່​ຖ້ວນ​ເບິ່ງ ເພື່ອ​ຮັບ­ປະ­ກັນ​ໃຫ້​ບັນ­ລຸ​ຕາມ​ແຜນ­ທີ່​ວາງ​ໄວ້.

    ສັງ​ລວມ​ແລ້ວ​ຜ່ານ​ມາ​ພວກ​ເຮົາ ກໍ່​ມີ​ບົດ­ຮຽນ​ເລື່ອງ​ນຳ​ເອົາ​ນະ­ໂຍ­ບາຍ​ປະ​ໄວ້​ລີ້ນ­ຊັກ​ໂຕະ​ຈົນ ຫຼົງ​ລືມ ທັງໆ​ທີ່​ອອກ​ຈາກ​ສູນ​ກາງ ເມືອງ​ກໍ່​ບໍ່​ຮູ້ ບ້ານ​ກໍ່​ບໍ່​ເຫັນ ເຊິ່ງ​ໄປ​ຄ້າງ​ຄາ​ຢູ່​ຂອດ​ມ້າມ​ແປະ​ພຸງ​ຂອງ​ເຈົ້າ​ໜ້າ­ທີ່​ພະ­ນັກ­ງານ​ບາງ​ຄົນ ທີ່​ຖື​ເບົາ​ຕໍ່​ການ­ຈັດ­ຕັ້ງ​ນະ­ໂຍ­ບາຍ​ຂອງ​ພັກ-ລັດ ທີ່​ໄດ້​ວາງ​ອອກ​ດີ​ແລ້ວ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ