ຂ່າວຫຼ້າສຸດ

ສີສັດຕະນາກ ກຽມຈັດງານແຂ່ງຂັນຊ່ວງເຮືອ 12 ສີພາຍ

149 10 ຕ.ລ. 2018 ວົງຈອນກີລາ

    ຫ້ອງ­ການ​ຖະ​ແຫຼ່ງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໃຫ້​ຮູ້­ເມື່ອ​ບໍ່​ດົນ​ມາ​ນີ້​ວ່າ: ເມືອງ​ສີ​ສັດ­ຕະ​ນາກ​ກຽມ​ຈັດ­ການ​ແຂ່ງ­ຂັນ​ຊ່ວງ​ເຮືອ 12 ສີ­ພາຍ ຫຼື ກີ­ລາ​ຊ່ວງ​ເຮືອ​ປະ­ຈຳ​ປີ 2018 ຂຶ້ນ​ຢູ່​ບ້ານ​ຈອມ​ແຈ້ງ ວັນ​ທີ 14 ຕຸ­ລາ 2018 ເຊິ່ງ​ຄາດ​ວ່າ​ປີ​ນີ້ ຈະ​ມີ​ເຮືອ​ຊ່ວງ​ອ້ອມ​ຂ້າງ​ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ 20 ກວ່າ​ລຳ.

    ການ​ຈັດ​ງານ​ແຂ່ງ­ຂັນ​ດັ່ງ­ກ່າວ ແມ່ນ​ເພື່ອ​ເປັນ​ການ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ທີ່​ມາ​ແຕ່​ດົນ​ນານ​ໃຫ້​ຄຽງ​ຄູ່​ກັບ​ປະ­ຊາ­ຊົນ​ລາວ​ບັນ­ດາ­ເຜົ່າ ຕະ­ຫຼອດ​ໄປ ການ​ຈັດ​ງານ​ແຂ່ງ­ຂັນ​ຊ່ວງ​ເຮືອ​ຄັ້ງ​ນີ້ ຈະ​ມີ​ການ​ຄົບ­ງັນ​ຕາມ​ປະ­ເພ­ນີ ພ້ອມ​ທັງ​ຂາຍ​ສິນ­ຄ້າ ຜະ­ລິດ​ຕະ​ພັນ​ຕ່າງໆ​ຢ່າງ​ຫຼວງ­ຫຼາຍ ສຳ­ລັບ​ໄລ­ຍະ​ການ​ແຂ່ງ­ຂັນ​ຈະ​ປ່ອຍ​ເຮືອ​ແຕ່​ບ້ານ​ວັດ​ສົບ-ບ້ານ​ຈອມ​ແຈ້ງ ຍາວ 800 ແມັດ ໃນ​ນີ້​ເຮືອ​ທີ່​ຮັບ​ລາ­ງວັນ​ຊະ­ນະ​ເລີດ ຈະ​ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 4 ລ້ານ​ກີບ ຮອງ​ຊະ­ນະ​ເລີດ ໄດ້​ຮັບ​ຂັນ 1 ໜ່ວຍ ເງິນ​ລາ­ງວັນ 2 ລ້ານ​ກີບ ທີ 3 ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 1,5 ລ້ານ​ກີບ ນອກ​ນີ້​ຍັງ​ມີ​ລາ­ງວັນ​ອື່ນໆ​ອີກ ໂດຍ​ພາກ­ສ່ວນ​ໃດ​ມີ​ຄວາມ​ສົນ­ໃຈ​ຢາກ​ເຂົ້າ​ຮ່ວມ ສາ­ມາດ​ສະ­ໝັກ​ໄດ້​ບໍ່​ໃຫ້​ກາຍ​ວັນ​ທີ 11 ຕຸ­ລາ 2018 ເວ­ລາ 9:00 ໂມງ ຢູ່​ວັດ​ຈອມ​ແຈ້ງ ຄ່າ​ສະ­ໝັກ 100.000 ກີບ​ຕໍ່​ລຳ.

ຂ່າວທີ່ກ່ຽວຂ້ອງ