ລາວ ມອບເງິນປະກອບສ່ວນແກ້ໄຂຜົນກະທົບ ຈາກໄພພິບັດແຜ່ນດິນໄຫວຢູ່ອິນໂດເນເຊຍ

    ລັດ­ຖະ­ບານ​ລາວ ມອບ​ເງິນ​ຊ່ວຍ­ເຫຼືອ​ປະ­ເທດ​ອິນ​ໂດ​ເນ​ເຊຍ ມູນ​ຄ່າ 100.000 ໂດ​ລາ​ສະ­ຫະ­ລັດ ຫຼື ປະ­ມານ 851 ລ້ານ​ກີບ ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ແກ້​ໄຂ​ຜົນ​ກະ­ທົບ​ຈາກ​ໄພ­ພິ­ບັດ​ແຜ່ນ­ດິນ​ໄຫວ ແລະ ຄື້ນ​ຊຶ​ນາ​ມິ ທີ່​ເກີດ​ຂຶ້ນ​ວັນ​ທີ 28 ກັນ­ຍາ 2018 ຢູ່​ແຂວງ​ສຸ­ລາ​ເວ​ຊີ​ກາງ ປະ­ເທດ​ອິນ​ໂດ​ເນ​ເຊຍ ອັນ​ໄດ້​ສ້າງ​ຄວາມ​ເສຍ​ຫາຍ​ຢ່າງ​ຫຼວງ­ຫຼາຍ​ໃຫ້​ແກ່​ຊີ­ວິດ ແລະ ຊັບ​ສິນ​ຂອງ​ປະ­ຊາ­ຊົນ​ອິນ​ໂດ​ເນ​ເຊຍ ຢູ່​ເຂດ​ດັ່ງ­ກ່າວ ໃນ​ນີ້ ມີ​ຜູ້​ເສຍ​ຊີ­ວິດ​ຫຼາຍ​ກວ່າ 1.500 ຄົນ ບາດ­ເຈັບ 1.000 ກວ່າ​ຄົນ ແລະ ປະ­ຊາ­ຊົນ 70.000 ກວ່າ​ຄົນ ບໍ່​ມີ​ທີ່​ພັກ​ອາ­ໄສ ນອກ​ນີ້​ຍັງ​ຜູ້​ທີ່​ຍັງ​ຊອກ​ບໍ່​ເຫັນ​ຫຼາຍ​ກວ່າ 5.000 ຄົນ ເຮືອນ​ປະ­ຊາ­ຊົນ​ເສຍ​ຫາຍ​ຫຼາຍ​ກວ່າ 67.000 ຫຼັງ ສະ​ຖາ​ບັນ​ການ​ສຶກ​ສາ 2.736 ແຫ່ງ ແລະ ອື່ນໆ.

    ພິ­ທີ​ມອບ-ຮັບ​ເງິນ​ຊ່ວຍ­ເຫຼືອ​ດັ່ງ­ກ່າວ ຈັດ​ຂຶ້ນ​ວັນ​ທີ 8 ຕຸ­ລາ 2018 ຢູ່​ກະ­ຊວງ​ການ​ຕ່າງ­ປະ­ເທດ ເຊິ່ງ​ຕາງ­ໜ້າ​ໃຫ້​ລັດ­ຖະ­ບານ​ລາວ​ມອບ​ໂດຍ​ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຮັບ​ໂດຍ​ທ່ານ ປຣາ​ຕິ​ໂຕ ໂຊ​ຮາ​ໂຢ ເອກ​ອັກ​ຄະ​ລັດ​ຖະ​ທູດ​ອິນ​ໂດ​ເນ​ເຊຍ ປະ­ຈຳ​ລາວ ມີ​ພະ­ນັກ­ງານ​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

    ການ​ປະ­ກອບ­ສ່ວນ​ຊ່ວຍ­ເຫຼືອ​ແກ້​ໄຂ​ຜົນ​ກະ­ທົບ​ທາງ​ໄພ​ທຳ​ມະ​ຊາດ​ຂອງ​ລັດ­ຖະ­ບານ​ລາວ​ຄັ້ງ​ນີ້ ສະ­ແດງ​ເຖິງ​ນ້ຳ­ໃຈ ແລະ ຄວາມ​ສາ­ມັກ­ຄີ​ຮັກ­ແພງ​ຂອງ​ລັດ­ຖະ­ບານ ກໍ່​ຄື ປະ­ຊາ­ຊົນ​ລາວ​ທີ່​ມີ​ຕໍ່​ລັດ­ຖະ­ບານ ແລະ ປະ­ຊາ­ຊົນ​ອິນ​ໂດ​ເນ​ເຊຍ ໂດຍ​ສະ­ເພາະ ຄອບ­ຄົວ​ຜູ້​ເສຍ​ຊີ­ວິດ ແລະ ຜູ້​ໄດ້​ຮັບ​ຜົນ​ກະ­ທົບ ເພື່ອ​ພ້ອມ​ກັນ​ກ້າວ​ຜ່ານ​ວິ​ກິດ​ໄພ­ພິ­ບັດ​ທາງ​ທຳ​ມະ​ຊາດ ແລະ ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ຂອງ​ປະ­ເທດ ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ.

    ທ່ານ​ເອກ​ອັກ​ຄະ​ລັດ​ຖະ​ທູດ​ອິນ​ໂດ​ເນ​ເຊຍ ໄດ້​ຕາງ­ໜ້າ​ໃຫ້​ລັດ­ຖະ­ບານ ແລະ ປະ­ຊາ­ຊົນ​ອິນ​ໂດ​ເນ​ເຊຍ ສະ­ແດງ​ຄວາມ​ຂອບ­ໃຈ​ຕໍ່​ການ​ປະ­ກອບ­ສ່ວນ​ຊ່ວຍ­ເຫຼືອ​ຂອງ​ລັດ­ຖະ­ບານ​ລາວ ພ້ອມ​ທັງ​ຢືນ­ຢັນ​ຈະ​ນຳ​ເງິນ​ຈຳ­ນວນ​ດັ່ງ­ກ່າວ ໄປ​ໝູນ​ໃຊ້​ໃຫ້​ເກີດ​ປະ­ໂຫຍດ​ສູງ​ສູດ​ແກ່​ປະ­ຊາ­ຊົນ​ຊາວ​ອິນ​ໂດ​ເນ​ເຊຍ.