ຍ່າງເພື່ອສຸຂະພາບ ສະຫຼອງວັນສາກົນຜູ້ອາຍຸສູງ

71 11 ຕ.ລ. 2018 ວົງຈອນກີລາ
ຍ່າງເພື່ອສຸຂະພາບ ສະຫຼອງວັນສາກົນຜູ້ອາຍຸສູງ

    ກິດຈະກຳ​ຍ່າງ​ເພື່ອ​ສຸຂະພາບ ໃນ​ໂອກາດ​ສະເຫຼີມສະຫຼອງ​ວັນ​ສາກົນ​ຜູ້​ອາຍຸ​ສູງ (1 ຕຸລາ) ຄົບຮອບ 28 ປີ ຈັດ​ຂຶ້ນ​ວັນ​ທີ 5 ຕຸລາ 2018 ຢູ່​ສວນ​ສຸຂະພາບ​ ທ່ານ ໜູ​ຮັກ ພູມ​ສະຫວັນ ແຂວງ​ສະຫວັນ​ນະ​ເຂດ ໂດຍ​ມີ​ທ່ານ ສັນຕິພາບ ພົມວິຫານ ເຈົ້າແຂວງ​ສະຫວັນ​ນະ​ເຂດ ພ້ອມ​ດ້ວຍ​ຮອງ​ເຈົ້າແຂວງ ພະນັກງານ​ອາວຸໂສ​ບຳນານ ຜູ້​ອາຍຸ​ສູງ​ເຂົ້າ​ຮ່ວມ.

    ທ່ານ ສິງ ໄຊ​ຍະ​ບົວ​ສີ ປະທານ​ສະມາຄົມ​ຜູ້​ອາຍຸ​ສູງ​ແຂວງ​ສະຫວັນ​ນະ​ເຂດ ກ່າວ​ວ່າ: ວັນ​ຜູ້​ອາຍຸ​ສູງ ໄດ້ໝູນວຽນ​ມາ​ບັນຈົບ​ຄົບຮອບ​ອີກ​ວາລະ​ໜຶ່ງ ເຊິ່ງ​ເປັນ​ວັນ​ທີ່​ມີ​ຄວາມ​ໝາຍສຳ​ຄົນ​ຕໍ່​ຜູ້​ອາຍຸ​ສູງໃນ​ທົ່ວໂລກ ເພາະ​ບັນດາ​ປະເທດ​ໃນ​ໂລກ​ລ້ວນ​ແຕ່​ໃຫ້​ຄວາມ​ສຳຄັນ ເອົາ​ໃຈ​ໃສ່ດູແລ ແລະ ເສີມຂະຫຍາຍກຳລັງ​ແຮງ​ທີ່​ບົ່ມ​ຊ້ອນຂອງ​ຜູ້​ອາຍຸ​ສູງ ເຂົ້າ​ໃນ​ການ​ພັດທະນາ​ປະເທດ​ຊາດ​ຂອງ​ຕົນ ສຳລັບ ສປປ ລາວ ລັດ​ຖະ​ທຳ​ມະນູນ​ໄດ້​ກຳນົດ​ວ່າ: ລັດ ແລະ ສັງຄົມ ໄດ້​ເອົາໃຈໃສ່​ປະຕິບັດ​ນະໂຍບາຍ ສະຫວັດ​ດີ​ການ​ສັງຄົມ​ເປັນ​ຢ່າງ​ດີ ເຊິ່ງແຕ່ໃດໆ​ມາ​ຜູ້​ອາຍຸ​ສູງ​ໃນ ສປປ ລາວ ເວົ້າ​ລວມ ແຂວງ​ສະຫວັນ​ນະ​ເຂດ​ ເວົ້າ​ສະເພາະ ໄດ້​ດຳລົງ​ຊີວິດ​ຢ່າງ​ມີ​ຄວາມ​ອົບ​ອຸ່ນ​ໃນຄອບຄົວ ໃຫ້ການ​ດູ​ແລ​ອົບຮົມ​ສັ່ງສອນ ຕັກເຕືອນ ແລະ ເປັນ​ຮົ່ມ​ໂພ​ຮົ່ມ​ໄຊ​ໃຫ້​ເຂົາເຈົ້າ ປະກອບສ່ວນ​ເຄື່ອນ​ໄຫວ​ວຽກ​ງານ​ຕ່າງໆ​ໃນ​ສັງຄົມ.

    ການ​ຈັດ​ກິດຈະກຳ​ຍ່າງ​ຄັ້ງ​ນີ້ ເພື່ອ​ສະແດງ​ຄວາມກະຕັນຍູ​ຮູ້ບຸນຄຸນ​ຂອງ​ຜູ້​ອາຍຸ​ສູງ ທັງ​ເປັນ​ການ​ສ້າງ​ເງື່ອນໄຂ​ໃຫ້​ບັນດາ​ຜູ້​ອາຍຸ​ສູງ​ ມີ​ໂອກາດ​ສ້າງ​ກິດຈະກຳ​ຕ່າງໆ ​ໃຫ້​ມີ​ຄວາມ​ເບີກບານ​ມ່ວນຊື່ນ ແລະ ມີ​ຄວາມສຸກ.

ຂ່າວທີ່ກ່ຽວຂ້ອງ