ຂ່າວຫຼ້າສຸດ

ຈັດແຂ່ງຂັນກີລາລົດຖີບຊີງຂັນເຈົ້າຄອງ ນວ ຄັ້ງທີ I

146 11 ຕ.ລ. 2018 ວົງຈອນກີລາ
ຈັດແຂ່ງຂັນກີລາລົດຖີບຊີງຂັນເຈົ້າຄອງ ນວ ຄັ້ງທີ I

    ສະ­ຫະ­ພັນ​ກີ­ລາ​ລົດ­ຖີບ ນະ­ຄອນ­ຫຼວງ​ວຽງ​ຈັນ (ນວ) ຈັດ­ການ​ແຂ່ງ­ຂັນ​ລົດ­ຖີບ​ຊີງ​ຂັນ​ທ່ານ​ເຈົ້າ​ຄອງ ນວ ຄັ້ງ​ທີ I ເພື່ອ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ​ລາວ 2018 ໃນ​ວັນ​ທີ 6 ຕຸ­ລາ 2018 ຢູ່​ສະ­ໜາມ​ຫຼວງ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ທ່ານ ຊົມ​ພູ ແກ້ວ​ເປັນ​ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສີ​ຫຸນ ສິດ­ທິ​ລື​ໄຊ ກ່າວ​ວ່າ: ການ​ຈັດ​ແຂ່ງ​ຂັ້ນ​ຄັ້ງ​ນີ້ ເພື່ອ​ເປັນ​ການ​ສ້າງ​ເງື່ອນ­ໄຂ​ໃຫ້​ນັກ​ຂີ່​ລົດ­ຖີບ​ໃນ​ພາກ​ພື້ນ ແລະ ສາ­ກົນ ໄດ້​ພົບ​ປະ​ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ທັງ​ເປັນ​ການ​ຮັດ​ແໜ້ນ​ຄວາມ​ສາ­ມັກ­ຄີ ນຳ​ເອົາ​ນັກ​ທ່ອງ​ທ່ຽວ​ມາ​ທ່ຽວ​ຊົມ​ຊົມ​ອະ­ລິ­ຍະ​ທຳ ວັດ­ທະ­ນະ­ທຳ​ອັນ​ດີ­ງາມ​ຂອງ ນວ ແລະ ສ້າງ​ຂະ​ບວນ​ການ​ຕ້ອນ­ຮັບ​ວັນ​ສຳ­ຄັນ​ຂອງ​ຊາດ ເປັນ­ຕົ້ນ ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ສະ­ເຫຼີມ​ສະ​ລອງ​ວັນ​ຄູ​ແຫ່ງ​ຊາດ ຄົບ­ຮອບ 24 ປີ ໃຫ້​ມີ​ບັນ­ຍາ­ກາດ​ຟົດ­ຟື້ນ​ມ່ວນ­ຊື່ນ.

    ການ​ແຂ່ງ­ຂັນ​ດັ່ງ­ກ່າວ ໄດ້​ແບ່ງ​ເປັນ 2 ຈຸດ​ຄື: ຈຸດ​ຖະ­ໜົນ 450 ປີ ແລະ ເຂດ​ກວມ​ລວມ​ເມືອງ​ໄຊ​ເຊດ​ຖາ ໄລ­ຍະ​ທາງ 108 ກິ­ໂລ­ແມັດ ໂດຍ​ມີ​ຮຸ່ນ​ທົ່ວ​ໄປ​ຊາຍ ຮຸ່ນ​ອາ­ຍຸ 30-39 ປີ ຊາຍ​ຮຸ່ນ​ອາ­ຍຸ 40-49 ປີ ຊາຍ​ຮຸ່ນ​ອາ­ຍຸ 50 ປີ​ຂຶ້ນ​ໄປ ຮຸ່ນ​ທົ່ວ​ໄປ​ຍິງ​ຮຸ່ນ​ອາ­ຍຸ 30-39 ປີ ຍິງ​ຮຸ່ນ​ອາ­ຍຸ 40 ປີ​ຂຶ້ນ​ໄປ ຍິງ​ປະ­ເພດ​ລົດ­ຖີບ​ເສືອ​ພູ­ເຂົາ​ມີ​ຮຸ່ນ​ອາ­ຍຸ​ຕ່ຳ​ກວ່າ 40 ປີ ແລະ ຮຸ່ນ​ອາ­ຍຸ 40 ປີ​ຂຶ້ນ​ໄປ ໂດຍ​ແຕ່​ລະ​ຮຸ່ນ​ທີ່​ໄດ້​ຮັບ​ລາ­ງວັນ​ຊະ­ນະ​ເລີດ ຈະ​ໄດ້​ຮັບ​ຂັນ​ລາ­ງວັນ​ສີ­ເຫຼືອງ​ທີ່​ເປັນ​ສັນ­ຍະ­ລັກ​ແຊັມ ແລະ ເງິນ​ລາ­ງວັນ​ຈຳ­ນວນ​ໜຶ່ງ.

    ຜ່ານ​ການ​ແຂ່ງ­ຂັນ​ຮຸ່ນ​ທົ່ວ​ໄປ​ຊາຍ ທີ 1 ທ້າວ ເຈດ​ສະ​ດາ ຈັນ​ເລືອງ (ໄທ) ຮຸ່ນ​ອາ­ຍຸ 30-39 ປີ​ຊາຍ ທີ 1 ທ້າວ ທອງ​ມະ­ນີ ໄຊ​ຍະ​ລາດ ຮຸ່ນ​ອາ­ຍຸ 40-49 ປີ​ຊາຍ ທີ 1 ທ້າວ ສີ​ລິ​ພົງ ພົງ​ສຸ­ວັນ (ໄທ) ຮຸ່ນ​ອາ­ຍຸ 50 ປີ​ຂຶ້ນ​ໄປ ຊາຍ​ທີ 1 ທ້າວ ລຸ່ງ​ໂລດ ສະ​ຫວັດ​ລ່ຽມ​ສານ (ໄທ) ສ່ວນ​ຮຸ່ນ​ທົ່ວ​ໄປ​ຍິງ ທີ 1 ນາງ ສະ​ນິ​ດາ​ພາ ສຸ­ວັນ­ນະ​ໂຊດ (ໄທ) ຮຸ່ນ​ອາ­ຍຸ 30-39 ປີ ຍິງ ທີ 1 ນາງ ຊິ​ຕ້າ ແກ້ວ​ສະ​ຫວັດ (ໄທ) ຮຸ່ນ​ອາ­ຍຸ 40 ປີ​ຂຶ້ນ​ໄປ ຍິງ ທີ 1 ນາງ ສະ­ຫຼັກ​ໄທ ອິງ​ກິດ​ຕິ (ໄທ) ສຳ­ລັບ​ປະ­ເພດ​ເສືອ​ພູ­ເຂົາ ຮຸ່ນ​ອາ­ຍຸ​ຕ່ຳ​ກວ່າ 40 ປີ ທີ 1 ທ້າວ ເບນ​ພະ​ວົງ ພັນ​ນະ​ວົງ ແລະ ຮຸ່ນ​ອາ­ຍຸ 40 ປີ​ຂຶ້ນ​ໄປ ທີ 1 ທ້າວ ນັດ​ຖະ​ພົນ ຄຸ້ມ​ໃຫຍ່​ໂຕ (ໄທ).

ຂ່າວທີ່ກ່ຽວຂ້ອງ