ທຸລະກິດບໍລິການຂົນສົ່ງ ພົບຄວາມຫຍຸ້ງຍາກ ຍ້ອນເສັ້ນທາງເປ່ເພ-ລາຄານ້ຳມັນຂຶ້ນ

136 11 ຕ.ລ. 2018 ຂ່າວໜ້າ​ໜຶ່ງ
ທຸລະກິດບໍລິການຂົນສົ່ງ ພົບຄວາມຫຍຸ້ງຍາກ ຍ້ອນເສັ້ນທາງເປ່ເພ-ລາຄານ້ຳມັນຂຶ້ນ

    ຫຼາຍ​ຫົວ­ໜ່ວຍ​ທຸ­ລະ​ກິດ​ທີ່​ດຳ­ເນີນ​ກິດ­ຈະ­ການ​ບໍ­ລິ­ການ​ຂົນ­ສົ່ງ​ຜູ້­ໂດຍ­ສານ ໄດ້​ຮັບ​ຜົນ​ກະ­ທົບ​ສົມ­ຄວນ​ໃນ​ປັດ­ຈຸ­ບັນ ຍ້ອນ​ສະ­ພາບ​ໄພ­ພິ­ບັດ​ເກີດ​ຂຶ້ນ​ຢູ່​ປະ­ເທດ​ເຮົາ ເຮັດ​ໃຫ້​ທາງ​ຫຼາຍ​ເສັ້ນ​ເປ່​ເພ​ເສຍ​ຫາຍ ການ​ໄປ-ມາ​ພົບ​ຄວາມ​ຫຍຸ້ງ­ຍາກ ສິ້ນ​ເປືອງ​ຄ່າ​ຫຼຸ້ຍ​ຫ້ຽນ ໃຊ້​ເວ­ລາ​ໃນ​ການ​ເດີນ­ທາງ​ຈຶ່ງ​ໄປ​ຮອດ​ຈຸດ­ໝາຍ ເຊິ່ງ​ເຮັດ​ໃຫ້​ມີ​ການ​ໃຊ້​ນ້ຳ­ມັນ​ເພີ່ມ​ຂຶ້ນ ນອກ​ນີ້​ລາ­ຄາ​ນ້ຳ­ມັນ 2-3 ເດືອນ​ຜ່ານ​ມາ ກໍ່​ປັບ​ຂຶ້ນ​ເກືອບ 400 ກີບ​ຕໍ່​ລິດ ຍິ່ງ​ເຮັດ​ໃຫ້­ການ​ດຳ­ເນີນ​ກິດ­ຈະ­ການ​ບໍ­ລິ­ການ​ຂົນ­ສົ່ງ​ຜູ້­ໂດຍ­ສານ ພົບ​ຄວາມ​ຫຍຸ້ງ­ຍາກ​ໄປ​ອີກ

    ທ່ານ ສົມ​ໝາຍ ນໍ­ລະ​ສິນ ຮອງ​ປະ­ທານ​ບໍ­ລິ­ສັດ ພັນ​ຊະ­ນະ​ຂົນ­ສົ່ງ​ໂດຍ­ສານ-ທ່ອງ​ທ່ຽວ ໃຫ້​ສຳ­ພາດ​ວັນ​ທີ 9 ຕຸ­ລາ 2018 ວ່າ: ພວກ​ເຮົາ​ໄດ້​ດຳ­ເນີນ​ທຸ­ລະ​ກິດ​ບໍ­ລິ­ການ​ຂົນ­ສົ່ງ​ຜູ້­ໂດຍ­ສານ ດ້ວຍ​ລົດ​ຕູ້​ປະ­ຈຳ​ສາຍ​ທາງ ມີ​ສະ­ຖາ­ນີ​ຕັ້ງ​ຢູ່ 3 ແຍກ​ສີ​ໄຄ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ (ນວ) ມີ​ສາຍ​ແລ່ນ​ແຕ່ ນວ-ປາກ​ລາຍ ແຂວງ​ໄຊ​ຍະ​ບູ​ລີ ໂດຍ​ນຳ​ໃຊ້​ເສັ້ນ­ທາງ​ເລກ​ທີ 11 ແຄມ​ຂອງ ເຊິ່ງ​ມີ​ບໍ­ລິ­ສັດ​ຊາ​ກຸ­ລະ​ຂົນ­ສົ່ງ​ໂດຍ­ສານ-ທ່ອງ​ທ່ຽວ ເປັນ​ບໍ­ລິ­ສັດ​ຄູ່​ສັນ­ຍາ​ດຳ­ເນີນ​ທຸ­ລະ​ກິດ​ຂົນ­ສົ່ງ​ໂດຍ­ສານ (ລົດ​ຕູ້ 15 ບ່ອນ​ນັ່ງ) ໄດ້​ດຳ­ເນີນ​ທຸ­ລະ​ກິດ​ດັ່ງ­ກ່າວ​ມາ​ຫຼາຍ​ປີ ແຕ່​ຕົກ​ມາ​ປີ 2018 ໂດຍ​ສະ­ເພາະ ໄລ­ຍະ​ທີ່​ເກີດ​ມີ​ໄພ​ທຳ​ມະ​ຊາດ​ຝົນ­ຕົກ​ໜັກ​ເຮັດ​ໃຫ້​ເສັ້ນ­ທາງ​ເລກ​ທີ 11 ບາງ​ຈຸດ​ຊຸດ­ໂຊມ​ເປ່​ເພ ໂດຍ​ສະ­ເພາະ​ຂອບ​ເຂດ​ເມືອງ​ໝື່ນ ແຂວງ​ວຽງ​ຈັນ ບ້ານ​ວັງ-ປາກ​ຊາວ ແລະ ເຂດ​ເມືອງ​ພຽງ ແຂວງ​ໄລ­ຍະ​ບູ​ລີ ຄວາມ​ຍາວ​ຫຼາຍ​ກິ­ໂລ­ແມັດ ຈາກ​ເມື່ອ​ກ່ອນ​ໃຊ້​ເວ­ລາ​ເດີນ­ທາງ​ແຕ່ ນວ-ແຂວງ​ໄຊ​ຍະ​ບູ​ລີ 7 ຊົ່ວ­ໂມງ ປັດ­ຈຸ­ບັນ​ໄດ້​ເພີ່ມ​ຂຶ້ນ​ເປັນ 9-10 ຊົ່ວ­ໂມງ ເຮັດ​ໃຫ້​ມີ​ການ​ສິ້ນ​ເປືອງ​ຫຼາຍ​ຢ່າງ ນອກ​ນີ້​ລາ­ຄາ​ນ້ຳ­ມັນ​ຜັດ​ເພີ່ມ​ຂຶ້ນ​ເລື້ອຍໆ ແຕ່​ຄ່າ​ບໍ­ລິ­ການ​ໂດຍ­ສານ​ຍັງ​ຄື­ເກົ່າ ເຮັດ​ໃຫ້​ມີ​ຜົນ​ກະ­ທົບ​ຕໍ່​ທຸ­ລະ​ກິດ.

    ເພື່ອ​ເຮັດ​ໃຫ້​ທຸ­ລະ​ກິດ​ດຳ­ເນີນ​ໄປ​ເປັນ​ປົກ­ກະ­ຕິ ແລະ ມີ​ຜົນ​ກຳ­ໄລ ປະ­ກອບ­ສ່ວນ​ເສຍ​ພັນ­ທະ​ອາ­ກອນ​ໃຫ້​ລັດ ຈຶ່ງ​ສະ­ເໜີ​ມາ​ຍັງ​ພາກ​ລັດ ໂດຍ​ສະ­ເພາະ ພາກ­ສ່ວນ​ກ່ຽວ­ຂ້ອງ​ຊ່ວຍ​ແກ້​ໄຂ​ຄື: ໃຫ້​ຊ່ວຍ​ສ້ອມ­ແປງ​ເສັ້ນ­ທາງ​ຈຸດ​ທີ່​ເປ່​ເພ ເພື່ອ​ໃຫ້​ລົດ​ແລ່ນ​ໄປ-ມາ​ໄດ້​ສະ­ດວກ ແລະ ເປັນ​ປົກ­ກະ­ຕິ ການ​ຂຶ້ນ​ລາ­ຄາ​ນ້ຳ­ມັນ​ຂຶ້ນ​ແລ້ວ​ກໍ່​ໃຫ້​ມີ​ລົງ ແລະ ໃຫ້​ເບິ່ງ​ຄືນ​ການ​ເພີ່ມ​ຂຶ້ນ​ຂອງ​ພາ­ຫະ­ນະ​ທີ່​ບໍ­ລິ­ການ​ໂດຍ­ສານ​ຮ່ວມ​ສາຍ​ທາງ​ດຽວ​ກັນ ໂດຍ​ບາງ​ຫົວ­ໜ່ວຍ​ທຸ­ລະ​ກິດ​ບໍ່​ມີ​ໃບ​ອະ­ນຸ­ຍາດ​ໃຫ້​ດຳ­ເນີນ​ທຸ­ລະ​ກິດ ແລະ ບໍ່​ມີ​ຄູ່​ສັນ­ຍາ​ລະ­ຫວ່າງ​ປາຍ­ທາງ-ຕົ້ນ​ທາງ ຍາດ​ລູກ​ຄ້າ​ນຳ​ຜູ້​ໄດ້​ຮັບ​ອະ­ນຸ­ຍາດ ເຮັດ​ໃຫ້​ກະ­ທົບ​ຕໍ່​ທຸ­ລະ​ກິດ​ທີ່​ດຳ­ເນີນ​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ