ຟີ​ລິບ​ປິນ ເປີດ​ກວ້າງ​ການ​ນຳ​ເຂົ້າ​ເຂົ້າ

63 11 ຕ.ລ. 2018 ຂ່າວຕ່າງປະເທດ
ຟີ​ລິບ​ປິນ ເປີດ​ກວ້າງ​ການ​ນຳ​ເຂົ້າ​ເຂົ້າ

     ປະທານາທິບໍດີ​ຟີ​ລິບ​ປິນ ໂຣດ​ຣີ​ໂກ ດູ​ເຕີ​ເຕ ໄດ້​ຕົກລົງ​ດັດແກ້​ນະໂຍບາຍ​ຊື້​ເຂົ້າ (ເຂົ້າສານ) ຈາກ​ຕ່າງປະເທດ ໄປ​ໃນ​ທິດ​ເປີດ​ປະຕູ ເພື່ອ​ຫຼຸດຜ່ອນ​ຄວາມ “ຮ້ອນ​ແຮງ” ຂອງ​ລາຄາ​ເຂົ້າ​ຢູ່​ພາຍ​ໃນ ປະເທດ ທີ່​ເພີ່ມ​ຂຶ້ນ​ຢ່າງ​ບໍ່​ຢຸດ​ຢັ້ງ​ໃນ​ໄລຍະ​ຫຼັງໆ​ມາ​ນີ້. ທ່ານ ຮາ​ຣີ ໂຣ​ເກ ໂຄສົກ​ຂອງ​ປະ​ທາ ນາ​ທິ​ບໍດີ​ຟີ​ລິບ​ປິນ ເວົ້າ​ວ່າ ປະທານາທິບໍດີ ດູ​ເຕີ​ເຕ ໄດ້​ອະນຸຍາດ​ໃຫ້​ການເຄື່ອນໄຫວ​ນຳ​ເຂົ້າ​ເຂົ້າ​ຢ່າງ “ບໍ່​ມີ​ຮົ້ວ​ກີດ​ກັນ” ຄື​ກັບ​ວ່າ​ເປັນ​ວິທີ​ການ​ແກ້​ໄຂ ເພື່ອ​ເຮັດ​ໃຫ້​ລາຄາ​ເຂົ້າ​ມີ​ຄວາມ​ໝັ້ນຄົງ​ຢູ່​ໃນ​ຟີ​ລິບ​ປິນ.

   ເງິນ​ເຟີ້​ຢູ່​ໃນ​ຟີ​ລິບ​ປິນ ໄດ້​ເພີ່ມ​ຂຶ້ນ​ຈາກ 6,4% ໃນ​ເດືອນ​ສິງຫາ ປີ 2018 ຂຶ້ນ​ເປັນ 6,7% ໃນ​ເດືອນ​ກັນຍາ ຊຶ່ງ​ເປັນ​ຍ້ອນ​ລາຄາ​ເຂົ້າ​ເພີ່ມ​ສູງ​ຂຶ້ນ. ສະເພາະ​ແຕ່​ເງິນ​ເຟີ້​ຍ້ອນ​ລາຄາ​ເຂົ້າ ໃນ​ເດືອນ​ກັນຍາ 2018 ໄດ້​ເພີ່ມ​ຂຶ້ນ​ສູ່​ຫຼັກ​ສອງ​ຕົວ​ເລກ ຍ້ອນ​ວ່າ​ແຫຼ່ງ​ສະໜອງ​ຢູ່​ພາຍ​ໃນ​ປະເທດ ຖືກ​ຮັດ​ແຄບ ທ່າມກາງ​ສະພາບ​ການ​ຜະລິດ​ບໍ່​ໄດ້ຜົນ​ດີ​ສືບຕໍ່​ເກີດ​ຂຶ້ນ ແລະ​ສະພາບ​ອາກາດ ບໍ່​ອຳນວຍ ຄວາມ​ສະດວກ​ໃຫ້​ແກ່​ການ​ຜະລິດ.

    ທ່ານ ໂຣ​ເກ ເວົ້າ​ວ່າ ຈາກ​ການ​ດັດແກ້​ນະໂຍບາຍ​ດັ່ງກ່າວ ປະທານາທິບໍດີ ດູ​ເຕີ​ເຕ ຫວັງ​ວ່າ​ປະຊາຊົນ​ຈະ​ໄດ້​ຊື້​ເຂົ້າ​ໃນ​ລາຄາ​ທີ່​ເໝາະ​ສົມ ແມ້​ກະ​ທັ້ງ​ວ່າ​ລາຄາ​ນ້ຳມັນ​ດິບ ແລະ ​ນ້ຳມັນ​ອື່ນໆ ສືບຕໍ່​ສູງ​ຂຶ້ນ​ກໍ​ຕາມ.

 

ຂ່າວທີ່ກ່ຽວຂ້ອງ