ຂ່າວຫຼ້າສຸດ

ອິນ​ໂດ​ເນ​ເຊຍ ກ້າວ​ເຂົ້າ​ສູ່​ການ​ບູລະນະ​ສ້າງສາ​ຄືນໃໝ່ ຫຼັງ​ແຜ່ນດິນ​ໄຫວ ແລະ ສຶ​ນາ​ມິ

143 11 ຕ.ລ. 2018 ຂ່າວຕ່າງປະເທດ
ອິນ​ໂດ​ເນ​ເຊຍ ກ້າວ​ເຂົ້າ​ສູ່​ການ​ບູລະນະ​ສ້າງສາ​ຄືນໃໝ່ ຫຼັງ​ແຜ່ນດິນ​ໄຫວ ແລະ ສຶ​ນາ​ມິ

     ລັດຖະບານ​ອິນ​ໂດ​ເນ​ເຊຍ ຕົກລົງ​ວ່າ​ຈະ​ເຊົາ​ຄົ້ນ​ຫາ​ຜູ້​ໄດ້​ຮັບ​ເຄາະ​ຮ້າຍ ຈາກ​ເຫດການ ແຜ່ນດິນ​ໄຫວ ແລະ​ສຶ​ນາ​ມິ ຊຶ່ງ​ເກີດ​ຂຶ້ນ​ຢູ່​ໃນ​ແຂວງ ສຸລາ​ເວລີ​ກາງ ເມື່ອ​ວັນ​ທີ 28 ກັນຍາ ທີ່​ຜ່ານ​ມາ​ນັ້ນ ນັບ​ແຕ່​ວັນ​ທີ 11 ຕຸລາ​ນີ້ ເປັນຕົ້ນ​ໄປ ຫຼັງ​ຈາກ​ທີ່​ໄດ້​ດຳເນີນ​ການ​ຄົ້ນ​ຫາ​ມາ​ເປັນ​ເວລາ 14 ວັນ ແລະ ຫຼັງ​ຈາກ​ນີ້​ກໍ​ຈະ​ສຸມ​ໃສ່​ຂະ​ບວນ​ການ​ຟື້ນ​ຟູ ແລະ​ບູລະນະ​ສ້າງສາ​ຄືນໃໝ່.

    ຕາມ​ການ​ກຳນົດ​ແລ້ວ ອົງການ​ຄົ້ນ​ຫາ​ກູ້​ໄພ​ແຫ່ງ​ຊາດ (Basarnas) ຂອງ​ອິນ​ໂດ​ເນ​ເຊຍ ປະຕິບັດ​ການ​ຄົ້ນ​ຫາ​ຜູ້​ເຄາະ​ຮ້າຍ ເປັນ​ເວລາ 7 ວັນ ເທົ່າ​ນັ້ນ ແຕ່​ວ່າ​ຜົນ​ກະທົບ​ທີ່​ໜັກໜ່ວງ ຈາກ​ໄພ​ທຳ​ມະ​ຊາດ​ດັ່ງກ່າວ ໄດ້​ເຮັດ​ໃຫ້ການ​ກູ້​ໄພ​ແກ່ຍາວ​ເປັນ​ເວລາ 14 ວັນ.

   ເຈົ້າ​ໜ້າທີ່​ຈາກ​ພາກສ່ວນ​ຂໍ້​ມູນ​ຂ່າວສານ ແລະ ປະຊາສຳພັນ ທີ່​ຂຶ້ນ​ກັບ​ອົງການ​ຄຸ້ມ​ຄອງ ໄພ​ທຳ​ມະ​ຊາດ​ແຫ່ງ​ຊາດ (BNBP) ຂອງ​ອິນ​ໂດ​ເນ​ເຊຍ ໃຫ້​ຮູ້​ວ່າ ໄລ່​ມາ​ຮອດ​ຕອນ​ບ່າຍ​ວັນ​ທີ 9 ຕຸລາ​ນີ້ ຈຳນວນ​ຜູ້​ເສຍ​ຊີວິດ​ຈາກ​ເຫດການ​ດິນ​ໄຫວ ແລະ ​ສຶ​ນາ​ມິ​ດັ່ງກ່າວ ຢູ່​ທີ່ 2.010 ຄົນ ໃນ​ຂະນະ​ທີ່​ຈຳນວນ​ຜູ້​ບາດເຈັບ​ມີ 10.679 ຄົນ. ໃນ​ຂະນະ​ດຽວ​ກັນ ຈຳນວນ​ຜູ້​ທີ່​ຍັງ​ຢູ່​ໃນ ບັນຊີ​ຫາຍ​ສາບ​ສູນ ຢູ່​ທີ່ 671 ຄົນ; ເຮືອນ​ຊານ​ເປ່​ເພ 67.310 ຫຼັງ; ແລະ​ມີ ຜູ້​ອົບ​ພະ​ຍົບ​ໜີ​ໄພ 82.775 ຄົນ.

    ເຈົ້າ​ໜ້າທີ່​ດັ່ງກ່າວ ໃຫ້​ຮູ້​ວ່າ ເພື່ອ​ຄຸ້ມ​ຄອງ ແລະ ​ແຈກ​ຈ່າຍ​ແຫຼ່ງ​ຄວາມ​ຊ່ວຍເຫຼືອ ໃຫ້​ມີ​ປະ​ສິດທິ​ຜົນ​ນັ້ນ ບັນຊີ​ການ​ເງິນ​ພິເສດ​ລາຍ​ໜຶ່ງ ໄດ້​ເປີດ​ໄວ້​ຢູ່​ໃນ BNPB. ນອກຈາກ​ນັ້ນແລ້ວ ກໍ​ຍັງ​ມີ​ບັນຊີ​ການ​ເງິນ​ຂອງ​ສະພາກາແດງ ເພື່ອ​ຮັບ​ເອົາ​ຄວາມ​ຊ່ວຍເຫຼືອ​ຈາກ​ບັນດາ​ອົງການ ທີ່​ບໍ່​ຂຶ້ນ​ກັບ​ລັດຖະບານ ແລະ ​ບັນດາ​ບຸກຄົນ. ເຈົ້າ​ໜ້າທີ່​ຂອງ BNPB ຢືນຢັນ​ວ່າ ແຫຼ່ງ​ຄວາມ ຊ່ວຍເຫຼືອ​ຈາກ​ຕ່າງປະເທດ ບໍ່​ສະເພາະ​ແຕ່​ນຳ​ໃຊ້ ໃຫ້​ແກ່​ກໍລະນີ​ສຸກ​ເສີນ​ເທົ່າ​ນັ້ນ ຫາກ​ຍັງ​ຮັບ​ໃຊ້ ໃຫ້​ແກ່​ວຽກ​ງານ​ການ​ຟື້ນ​ຟູ ແລະ​ ການ​ບູລະນະ​ສ້າງສາ​ຄືນໃໝ່​ນຳ​ອີກ.

 

ຂ່າວທີ່ກ່ຽວຂ້ອງ