ຍັງ​ບໍ່​ມີ​ກໍລະນີ​ຜູ້​ເສຍ​ຊີວິດ​ຈາກ​ການ​ຕິດ​ໄວ​​ຣັສ ຊີ​ກາ ຢູ່​ໃນ​ອິນ​ເດຍ

70 11 ຕ.ລ. 2018 ຂ່າວຕ່າງປະເທດ
ຍັງ​ບໍ່​ມີ​ກໍລະນີ​ຜູ້​ເສຍ​ຊີວິດ​ຈາກ​ການ​ຕິດ​ໄວ​​ຣັສ ຊີ​ກາ ຢູ່​ໃນ​ອິນ​ເດຍ

     ທາງ​ການ​ອິນ​ເດຍ ແຈ້ງ​ໃຫ້​ຮູ້ເມື່ອ​ວັນ​ທີ 9 ຕຸລາ​ນີ້​ວ່າ ຈາກ​ການ​ລະບາດ​ຂອງ​ໄວ​​ຣັສ​ຊີ​ກາ (Zika) ຢູ່​ໃນ​ລັດ ຣາ​ຊາ​ສະຖານ (ພາກ​ຕາເວັນຕົກ​ຂອງ​ອິນ​ເດຍ) ນັ້ນ​ມີ 22 ກໍລະນີ ມີ​ຜົນ​ການ ກວດ​ເປັນ​ບວກ ກັບ​ໄວ​​ຣັສ​ດັ່ງກ່າວ ຊຶ່ງ​ນີ້​ເປັນ​ການ​ລະບາດ​ເທື່ອ​ທີ 3 ຂອງ​ໄວ​​ຣັສ​ດັ່ງກ່າວ​ຢູ່​ໃນ​ອິນ​ເດຍ ນັບ​ແຕ່​ເດືອນ​ມັງກອນ ປີ 2017 ເປັນຕົ້ນ​ມາ.

    ໃນ​ແຈ້ງ​ການ​ດັ່ງກ່າວ ກະຊວງ​ສາທາລະນະ​ສຸກ​ອິນ​ເດຍ ໃຫ້​ຮູ້​ວ່າ ຫ້ອງການ​ຕິດຕາມ​ກວດກາ ແຫ່ງ​ໜຶ່ງ ໄດ້​ເຂົ້າ​ສູ່​ການເຄື່ອນໄຫວ ຢູ່​ໃນ​ສູນ​ຄວບ​ຄຸມພະ​ຍາດ​ແຫ່ງ​ຊາດ (NCDC) ໂດຍ​ມີໜ້າ​ທີ່ ຕິດຕາມ​ສະຖານະ​ການ​ຢ່າງ​ເປັນ​ປະຈຳ.

    ເຈົ້າ​ໜ້າທີ່​ອາວຸໂສ​ຜູ້​ໜຶ່ງ​ເວົ້າ​ວ່າ ທັງ 22 ກໍລະນີ​ທີ່​ຕິດ​ໄວ​​ຣັສ ຊີ​ກາ ດັ່ງກ່າວ​ນັ້ນ ຕ່າງ​ກໍ​ຢູ່​ໃນ​ພື້ນ​ທີ່​ນະຄອນ ຈາຍ​ປູ ຊຶ່ງ​ເປັນ​ເມືອງ​ເອກ​ຂອງ​ລັດ ຣາ​ຊາ​ສະຖານ ໃນ​ນັ້ນ​ມີແຮງ​ງານ ຈຳນວນ​ໜຶ່ງ ທີ່​ມາ​ຈາກ​ລັດ ພິຫານ (ພາກ​ຕາເວັນ​ອອກ​ຂອງ​ອິນ​ເດຍ) ແຕ່​ໂຊກ​ດີ​ທີ່​ຍັງ​ບໍ່​ທັນ​ມີ ກໍລະນີ​ຜູ້​ເສຍ​ຊີວິດ.

    ການ​ລະບາດ​ຂອງ​ໄວ​​ຣັສ​ຊີ​ກາ ຢູ່​ໃນ​ອິນ​ເດຍ ເກີດ​ຂຶ້ນ​ເທື່ອ​ທຳ​ອິດ ເມື່ອ​ເດືອຍ​ມັງກອນ ປີ 2017 ຢູ່​ໃນ​ລັດ ກູ​ຈະ​ຣາດ (ພາກ​ຕາເວັນ​ຕົກ​​​ຂອງ​ອິນ​ເດຍ). ຕໍ່​ມາ ໄດ້​ເກີດ​ການ​ລະບາດ​ເທື່ອ​ທີ​ສອງ ຢູ່​ໃນ​ລັດ ທະມິນ ນາ​ດູ (ພາກ​ໃຕ້​ອິນ​ເດຍ) ເມື່ອ​ເດືອນ​ກໍລະກົດ ປີ   2017.

    ໃນ​ປີ 2015 ແລະ 2016 ໄວ​​ຣັສ​ຊີ​ກາ ໄດ້​ລະບາດ​ຢູ່​ໃນ​ບັນດາ​ປະເທດ​ໃນ​ເຂດ​ອາ​ເມ​ຣິ​ກາ ລາ​ຕິນ ກາ​ຣາ​ອິບ ແລະ ທິດໃຕ້ ສ ອາ​ເມ​ຣິ​ກາ ເຮັດ​ໃຫ້​ມີ​ເດັກນ້ອຍ​ເກີດ​ໃໝ່​ຫຼາຍ​ພັນ​ຄົນ ມີ​ຫົວ​ຂະໜາດ ນ້ອຍ. ໃນ​ເດືອນ​ກຸມພາ ປີ 2016 ອົງການ​ອະນາໄມ​ໂລກ (WHO) ໄດ້​ປະກາດ​ໃຫ້​ໄວ​​ຣັສ​ຊີ​ກາ ເປັນ​ບັນຫາ​ສາທາລະນະ​ສຸກ​ສຸກ​ເສີນ​ທົ່ວ​ໂລກ. ໃນ​ເດືອນ​ພະຈິກ ປີ 2017 WHO ໄດ້​ຍົກເລີກ​ພາວະ​ສຸກ​ເສີນ ແຕ່​ກໍ​ຍັງ​ແຈ້ງ​ເຕືອນ​ວ່າ​ໄວ​​ຣັສ​ດັ່ງກ່າວ ສາມາດ​ສືບຕໍ່​ລະບາດ​ຢູ່​ທີ່​ໃດ​ກໍ​ໄດ້ ທີ່​ມີ​ຍຸງ​ເປັນ​ພາຫະນະ​ໃນ​ການ​ນຳ​ເຊື້ອ​ພະຍາດ.

 

ຂ່າວທີ່ກ່ຽວຂ້ອງ