ແຕ່ງຕັ້ງຄະນະບໍລິຫານງານ ສະຫະພັນກີລາເທຄວັນໂດຊຸດໃໝ່

251 16 ຕ.ລ. 2018 ວົງຈອນກີລາ
ແຕ່ງຕັ້ງຄະນະບໍລິຫານງານ ສະຫະພັນກີລາເທຄວັນໂດຊຸດໃໝ່

    ກະ­ຊວງ​ສຶກ​ສາ​ທິ​ການ ແລະ ກີ­ລາ ປະ­ກາດ​ແຕ່ງ­ຕັ້ງ​ຄະ­ນະ​ບໍ­ລິ­ຫານ​ງານ ສະ­ຫະ­ພັນ​ກີ­ລາ​ເທ​ຄວັນ​ໂດ​ແຫ່ງ​ຊາດ​ຊຸດ​ໃໝ່ ໃນ​ວັນ​ທີ 12 ຕຸ­ລາ 2018 ທີ່​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ປະ­ທານ​ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ຊຸດ​ໃໝ່ ພ້ອມ​ດ້ວຍ​ຄະ­ນະ​ບໍ­ລິ­ຫານ​ງານ ຄູ​ເຝິກ ນັກ­ກີ­ລາ​ເຂົ້າ​ຮ່ວມ.

    ສຳ­ລັບ​ຄະ­ນະ​ບໍ­ລິ­ຫານ​ງານ​ຊຸດ​ໃໝ່​ມີ​ທັງ​ໝົດ 18 ທ່ານ ໂດຍ​ແມ່ນ​ທ່ານ ອາດ​ສະ­ພັງ​ທອງ ສີ​ພັນ​ດອນ ເປັນ​ປະ­ທານ ທ່ານ ອຸ​ໄດ ສຸ­ວັນ​ນາ­ລີ ທ່ານ ຢູ​ຮາວ ອາຍ​ຊິນ​ເຈຍ​ໂລ ທ່ານ ສີ​ວັນ­ນະ​ກອນ ມະ​ລີ​ວັນ ແລະ ທ່ານ NAM DONGSIK ເປັນ​ຮອງ​ປະ­ທານ ແລະ ທ່ານ ຈັນ­ທະ​ວົງ ປັນ­ຍາ​ສີ​ລິ ເປັນ​ເລ­ຂາ­ທິ­ການ ສ່ວນ​ອີກ 12 ທ່ານ ເປັນ​ກຳ­ມະ­ການ.

    ໂອ­ກາດ​ນີ້ ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຜົນ­ງານ​ອັນ​ພົ້ນ​ເດັ່ນ​ຂອງ​ຄະ­ນະ​ສະ­ຫະ­ພັນ​ຊຸດ​ທີ່​ຜ່ານ​ມາ ແລະ ຂໍ​ຈາ­ລຶກ​ຄຸນ­ງາມ­ຄວາມ­ດີ​ຂອງ​ທ່ານ ພົ.ວ ວິ­ໄລ ດວງ​ມະ­ນີ ອະ­ດີດ​ປະ­ທານ​ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ຊຸດ​ເກົ່າ ທີ່​ໄດ້​ນຳ­ພາ​ຄະ­ນະ​ສະ­ຫະ­ພັນ​ພັດ­ທະ­ນາ​ກີ­ລາ​ຂະ­ຫຍາຍ­ຕົວ​ຢ່າງ­ຮອບ­ດ້ານ ນັບ​ທັງ​ສູນ​ກາງ ແລະ ທ້ອງ­ຖິ່ນ ໄດ້​ທັງ​ປະ­ລິ­ມານ ແລະ ຄຸ­ນະ­ພາບ ແນວ­ໃດ​ກໍ່​ດີ ເພື່ອ​ເຮັດ​ໃຫ້​ວຽກ​ງານ​ກີ­ລາ-ກາ​ຍະ​ກຳ ສາ­ມາດ​ດຳ­ເນີນ​ໄປ​ຢ່າງ​ມີ​ປະ​ສິດ­ທິ​ຜົນ ຈະ​ຕ້ອງ​ໄດ້​ອາ­ໄສ​ອົງ​ກອນ​ຂອງ​ສະ­ຫະ­ພັນ​ກີ­ລາ ເປັນ​ຜູ້​ຮັບ­ຜິດ­ຊອບ​ທາງ​ດ້ານ​ບໍ­ລິ­ຫານ ແລະ ດ້ານ​ວິ­ຊາ​ການ.

    ສະ­ນັ້ນ ຮຽກ­ຮ້ອງ​ໃຫ້​ຄະ­ນະ​ບໍ­ລິ­ຫານ​ຊຸດ​ໃໝ່ ເອົາ­ໃຈ­ໃສ່​ເຊີດ​ຊູ​ນ້ຳ­ໃຈ​ເສຍ­ສະ­ຫຼະ ທັງ​ສະ­ຕິ​ປັນ­ຍາ ແລະ ກຳ­ລັງ​ຊັບ​ເຂົ້າ​ໃນ​ການ​ພັດ­ທະ­ນາ​ກີ­ລາ​ເທ​ຄວັນ​ໂດ ໃຫ້​ມີ​ໃບ​ໜ້າ​ອັນ​ໃໝ່ ແລະ ຜົນ­ງານ​ໃໝ່​ທີ່​ໃຫຍ່​ກວ່າ​ເກົ່າ ສົ່ງ­ເສີມ​ກີ­ລາ​ເທ​ຄວັນ​ໂດ​ໃນ​ຂອບ​ເຂດ​ທົ່ວ​ປະ­ເທດ ໃຫ້​ມີ​ການ​ພັດ­ທະ­ນາ​ຢ່າງ​ຕໍ່​ເນື່ອງ ໂດຍ​ສະ­ເພາະ​ຄູ​ເຝິກ ນັກ­ກີ­ລາ​ກຳ ມະ​ການ​ຕັດ­ສິນ ແລະ ນະ­ໂຍ­ບາຍ​ສະ­ຫວັດ­ດີ​ການ ໃຫ້​ນັກ­ກີ­ລາ​ທີມ​ຊາດ​ທີ່​ພົ້ນ​ກະ­ສຽນ​ເປັນ​ນັກ­ກີ­ລາ​ທີມ​ຊາດ​ໄປ​ແລ້ວ ສ້າງ​ແຜນ​ວຽກ​ຈຸດ​ສຸມ ເພື່ອ​ພັດ­ທະ­ນາ​ນັກ­ກີ­ລາ​ທີ່​ມີ​ຄວາມ​ຫວັງ​ຫຼຽນ ໃນ​ການ​ແຂ່ງ­ຂັນ​ລະ­ດັບ​ສາ­ກົນ ລະ­ດັບ​ເອ​ຊຽນ​ເກມ ແລະ ລະ­ດັບ​ຊີ­ເກມ ເພື່ອ​ກ້າວ​ໄປ​ຫາ​ລະ­ດັບ​ໂອ​ແລມ​ປິກ ສົ່ງ­ເສີມ​ການ​ພົວ­ພັນ​ກັບ​ສາ­ກົນ ແລະ ຍາດ​ແຍ່ງ​ເອົາ​ການ​ຊ່ວຍ­ເຫຼືອ​ຈາກ​ຕ່າງ­ປະ­ເທດ ກວດ­ກາ​ວຽກ​ງານ​ແຕ່​ລະ​ໄລ­ຍະ ເພື່ອ​ສະ­ຫຼຸບ​ຖອດ​ຖອນ​ບົດ­ຮຽນ ຕີ​ລາ­ຄາ​ຈຸດ​ດີ ຈຸດ​ອ່ອນ ແລະ ຍ້ອງ­ຍໍ​ຜູ້​ທີ່​ມີ​ຜົນ­ງານ​ຕໍ່​ສະ­ຫະ­ພັນ.

ຂ່າວທີ່ກ່ຽວຂ້ອງ