ປາກງື່ມ ເອົາໃຈໃສ່ເຝົ້າລະວັງພະຍາດທີ່ອາດຈະເກີດຂຶ້ນຫຼັງນ້ຳຖ້ວມ

137 19 ຕ.ລ. 2018 ຂ່າວໜ້າ​ໜຶ່ງ
ປາກງື່ມ ເອົາໃຈໃສ່ເຝົ້າລະວັງພະຍາດທີ່ອາດຈະເກີດຂຶ້ນຫຼັງນ້ຳຖ້ວມ

    ທ່ານ ຄຳ​ຫຼ້າ ເພັດ​ລາ​ວັນ ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ໄດ້​ໃຫ້​ສຳ­ພາດ​ວັນ​ທີ 17 ຕຸ­ລາ 2018 ວ່າ: ພະ­ຍາດ​ທີ່​ມັກ​ເກີດ​ຂຶ້ນ​ຫຼັງ​ຈາກ​ນ້ຳ​ຖ້ວມ ຈະ​ມີ​ພະ­ຍາດ​ຖອກ­ທ້ອງ ທ້ອງ­ບິດ ຕາ­ແດງ ນ້ຳ​ຄັນ​ກັດ​ຕີນ ໄຂ້­ເລືອດ­ອອກ ແລະ ອື່ນໆ ເພື່ອ​ປ້ອງ​ກັນ ແລະ ເຝົ້າ​ລະ­ວັງ​ການ​ລະ­ບາດ​ຂອງ​ພະ­ຍາດ​ທີ່​ກ່າວ​ມາ​ນັ້ນ ຫ້ອງ­ການ​ສາ­ທາ­ລະ­ນະ​ສຸກ​ເມືອງ ໄດ້​ແຕ່ງ­ຕັ້ງ​ທີມ​ງານ​ແພດ​ລົງ​ໄປ​ກວດ​ພະ­ຍາດ​ໃຫ້​ປະ­ຊາ­ຊົນ 1.500 ຄົນ ໃນ 15 ບ້ານ​ທີ່​ໄດ້​ຮັບ​ຜົນ​ກະ­ທົບ ແລະ ໄດ້​ນຳ​ເອົາ​ຈັກ­ສູບ­ນ້ຳ​ລົງ​ໄປ​ດູດ​ນ້ຳ​ເປື້ອນ​ອອກ​ຈາກ​ນ້ຳ­ສ້າງ ແລະ ນ້ຳ​ບາ​ດານ​ພ້ອມ​ທັງ​ໄດ້​ນຳ​ເອົາ​ສານ​ຄໍ​ລີນ​ລົງ​ໄປ​ໃສ່ ເພື່ອ​ບຳ­ບັດ​ໃຫ້​ນ້ຳ​ສະ­ອາດ​ສຳ­ເລັດ 800 ກວ່າ​ໜ່ວຍ ພ້ອມ​ນັ້ນ​ໄດ້​ແຕ່ງ­ຕັ້ງ​ທິມ​ແພດ​ລົງ​ໄປ​ໂຄ­ສະ­ນາ​ສຸ​ຂະ​ສຶກ​ສາ ແນະ­ນຳ​ໃຫ້​ປະ­ຊາ­ຊົນ​ເອົາ­ໃຈ­ໃສ່​ທຳ​ຄວາມ​ສະ­ອາດ​ບໍ­ລິ­ເວນ​ອ້ອມ​ຮອບ​ເຮືອນ ເວົ້າ​ລວມ​ແລ້ວ ມາ​ເຖິງ​ປັດ­ຈຸ­ບັນ ໄດ້​ສຳ­ເລັດ​ໃນ​ການ​ກວດ​ສຸ­ຂະ­ພາບ​ໃຫ້​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ ແລະ ບຳ­ບັດ​ນ້ຳ​ບາ​ດານ ນ້ຳ­ສ້າງ​ໄດ້ 100%.

    ສຳ­ລັບ​ການ​ປ້ອງ​ກັນ​ພະ­ຍາດ​ໄຂ້­ຍຸງ​ລາຍ ຫຼື ໄຂ້­ເລືອດ­ອອກ ໄດ້​ເຝົ້າ​ລະ­ວັງ​ຢ່າງ​ເປັນ​ລະ­ບົບ​ປົກ­ກະ­ຕິ ປັດ­ຈຸ­ບັນ​ພະ­ຍາດ​ໄຂ້­ຍຸງ​ລາຍ​ທີ່​ເກີດ​ຂຶ້ນ​ໃໝ່​ພົບ​ພຽງ 8 ກໍ­ລະ­ນີ ແຕ່​ຫ້ອງ­ການ​ສາ​ທາ ກໍ່​ບໍ່​ໄດ້​ລົດ​ລະ​ຈັດ​ຕັ້ງ​ທິມ​ງານ​ວິ­ຊາ​ການ­ເຄື່ອນ­ໄຫວ​ໂຄ­ສະ­ນາ​ສຸ​ຂະ​ສຶກ​ສາ​ຕື່ມ​ອີກ ເພື່ອ​ປ້ອງ​ກັນ ແລະ ເຝົ້າ​ລະ­ວັງ​ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ ທັງ​ເອົາ­ໃຈ­ໃສ່​ເຝົ້າ​ລະ­ວັງ​ພະ­ຍາດ​ທີ່​ເປັນ​ລະ­ບົບ​ເຝົ້າ​ລະ­ວັງ 17 ພະ­ຍາດ​ຄື: ອາ­ການ​ລ່ອຍ​ແຫຼວ​ກະ­ທັນ­ຫັນ ໄຂ້​ອອກ​ຕຸ່ມ ບາດ​ທະ​ຍັກ​ເດັກ​ເກີດ​ໃໝ່ ບາດ​ທະ​ຍັກ​ທຸກ​ກຸ່ມ​ອາ­ຍຸ ຄໍ​ຕີບ ໄອ​ໄກ່ ຖ່າຍ​ທ້ອງ​ເປັນ​ນ້ຳ​ກະ­ທັນ­ຫັນ ໄຂ້­ຍຸງ​ລາຍ ຖ່າຍ​ທ້ອງ​ເປັນ​ມູກ​ປົນ​ເລືອດ​ກະ­ທັນ­ຫັນ ອາ­ການ​ເບື່ອ​ອາ­ຫານ ພະ­ຍາດ​ໄຂ້­ທໍ­ລະ­ພິດ ພະ­ຍາດ​ໄຂ້​ເລືອດ​ດຳ ໝວດ​ອາ­ການ​ເຫຼືອງ​ແບບ​ກະ­ທັນ­ຫັນ ເຫຍື່ອ​ຫຸ້ມ​ສະ­ໝອງ​ອັກ­ເສບ ໝວດ​ອາ­ການ​ສະ­ໝອງ​ອັກ­ເສບ ກາ­ລະ​ໂລກ ແລະ ຊຶມ​ເຊື້ອ​ລະ­ບົບ​ຫາຍ­ໃຈ​ແບບ​ກະ­ທັນ­ຫັນ.

ຂ່າວທີ່ກ່ຽວຂ້ອງ