ຄາ​​ຣສ​ເບີກ ພັດທະນາ​ດ້ານ​ບັນຈຸ​ພັນ ຫຼຸດຜ່ອນ​ສິ່ງ​ເສດ​ເຫຼືອ​ຈາກ​ການ​ນຳ​ໃຊ້​​ປຼັສ​ຕິກ

255 19 ຕ.ລ. 2018 ຂ່າວຕ່າງປະເທດ
ຄາ​​ຣສ​ເບີກ ພັດທະນາ​ດ້ານ​ບັນຈຸ​ພັນ ຫຼຸດຜ່ອນ​ສິ່ງ​ເສດ​ເຫຼືອ​ຈາກ​ການ​ນຳ​ໃຊ້​​ປຼັສ​ຕິກ

   ບັນດາ​ຜູ້​ດື່ມ​ເບຍ​ທີ່​ເອົາໃຈໃສ່​ຕໍ່​ສິ່ງແວດລ້ອມ ພ້ອມ​ກັນ​ຊົມ ເຊີຍ​ໃຫ້ ບໍລິສັດ ຄາ​​ຣສ​ເບີກ ໃນ​ມື້ນີ້ ຫຼັງ​ຈາກ​ບໍລິສັດ​ໄດ້​ເປີດເຜີຍ​ແຜນການ​ປ່ຽນແປງ​ແນວ​ບັນຈຸ (ປ່ອງ) ເບຍ​ແບບ​ເກົ່າ ດ້ວຍ​ເຕັກ​ໂນ​ໂລ​ຊີ Snap pack ແບບ​ໃໝ່ ທີ່​ຫຼຸດຜ່ອນ​ການ​ນຳ​ໃຊ້​​ປຼັສ​ຕິກ ເຊິ່ງ​ເປັນ​ສ່ວນ​ໜຶ່ງ​ຂອງ​ແຜນການ​ສ້າງ​ຄວາມ​ຍືນ​ຍົງ  ແລະ  ເພື່ອ​ຊ່ວຍ​ແກ້​ໄຂ​ບັນຫາ ການ​ປ່ຽນແປງ​ຂອງ​ສະພາບ​ອາກາດ.

    ຄາ​​ຣສ​ເບີກ ກຳລັງ​ນຳ​ສະເໜີ​ນະ​ວັດຕະ​ກຳ​ດ້ານ​ການ​ຫຸ້ມ​ຫໍ່​ແບບ Snap pack ໃໝ່ ທີ່​ຖື​ໄດ້​ວ່າ​ເປັນ​ບໍລິສັດ​ທຳ​ອິດ​ຂອງ​ໂລກ ເຊິ່ງ​ເຕັກ​ໂນ​ໂລ​ຊີ​ນີ້ ຈະ​ນຳ​ໃຊ້​ກາວ​ທີ່​ສາມາດ​ນຳ​ກັບ​ຄືນ​ມາ​ໃຊ້​ໄດ້​ເພື່ອ​ຢຶດ​ກະ​ປ໋ອງ​ໄວ້​ນຳ​ກັນ ເຊິ່ງ​ບໍລິສັດ ຄາ​​ຣສ​ເບີກ ໄດ້​ກ່າວ​ວ່າ: ເຕັກ​ໂນ​ໂລ​ຊີ​ໃໝ່​ນີ້​ຈະ​ຊ່ວຍ​ຫຼຸດຜ່ອນ​ສິ່ງ​ເສດ​ເຫຼືອ​ຂອງ​ຢາງ​​ປຼັສ​ຕິກ​ຢູ່​ທົ່ວ​ໂລກ​ຫຼາຍ​ກວ່າ 1.200 ໂຕນ​ຕໍ່​ປີ ຫຼື ເທົ່າ​ກັບ​ຖົງ​ຢາງ​​ປຼັສ​ຕິກ​ເຖິງ 60 ລ້ານ​ຖົງ ເຊິ່ງ​ນີ້​ສະແດງ​ໃຫ້​ເຫັນ​ເຖິງ​ການ​ຫຼຸດ​ລົງ​ຂອງ​ຈຳນວນ​ຢາງ​​ປຼັສ​ຕິກ ທີ່​ນຳ​ໃຊ້​ໃນ​ການ​ຫຸ້ມ​ຫໍ່​ແບບ​ເກົ່າ​ເຖິງ 76%.

   ບໍລິສັດ ແລະ ຜູ້​ສະໜອງ​ໄດ້​ຮ່ວມ​ກັນ​ເຮັດ​ການ​ທົດ​ລອງ​ນຳ​ໃຊ້​ກາວ​ປະມານ 40.000 ຮູບ​ແບບທີ່​ແຕກ​ຕ່າງ​ກັນ ກ່ອນ​ຈະ​ຕົກລົງ​ນຳ​ໃຊ້​ຮູບ​ແບບ​ກາວ​ປະເພດ​ດຽວ​ກັນ​ກັບ​ເຂົ້າໜົມ​ຊິງ​ໂອມ (Chewing Gum) ໂດຍ​ອີງ​ຕາມ​ລາຍ​ງານ​ພົບ​ວ່າ ກາວ​ຂອງ​ຜະລິດ​ຕະ​ພັນ​ແບບ Snap Pack ແມ່ນ​ມີ​ຄວາມ​ແຂງ​ພໍ ທີ່​ຈະ​ຮັກສາ​ໃຫ້​ກະ​ປ໋ອງ​ຕິດ​ຢູ່​ນຳ​ກັນ​ລະຫວ່າງ​ການ​ຂົນສົ່ງ ແລະ ເກັບ​ມ້ຽນ ແຕ່​ກໍ່​ສາມາດ​ດຶງ​ອອກ​ໄດ້​ງ່າຍ​ຫາກ​ຕ້ອງການ.

    ຫ່ວງ​ຢາງ​​ປຼັສ​ຕິກ ທີ່​ນຳ​ໃຊ້​ໃນ​ບັນຈຸ​ພັນ​ກະ​ປ໋ອງ​ໃນ​ຫຼາຍ​ທົດ​ສະ​ວັດ​ທີ່​ຜ່ານ​ມາ ແມ່ນ​ໄດ້​ສ້າງ​ຄວາມ​ສ່ຽງ​ຕໍ່​ບັນດາ​ສັດ ແລະ ເຊື່ອມ​ໂຍງ​ກັບ​ບັນຫາ​ມົນ​ລະ​ພິດ​ທີ່​ເພີ່ມ​ຂຶ້ນ​ໃນ​ແມ່ນ້ຳ ແລະ ທະເລ​ດ້ວຍ​ເຫດ​ນີ້​ຈຶ່ງ​ເກີດ​ມີການ​ຮຽກ  ຮ້ອງ​ໃຫ້​ມີ​ການ​ຈຳກັດ ແລະ ຢຸດ​ເຊົາ​ການ​ນຳ​ໃຊ້​​ປຼັສ​ຕິກ​ພຽງ​ຄັ້ງ​ດຽວ​ແລ້ວ​ຖິ້ມ​ຂອງ​ບັນດາ​ຫົວໜ່ວຍ​ທຸລະ​ກິດ​ໃນ​ທົ່ວ​ໂລກ ອີງ​ຕາມ​ບົດ​ລາຍ​ງານ​ກ່ຽວ​ກັບ​ອະນາຄົດ​ຂອງ​ທະເລ ໄດ້​ຄາດ​ຄະເນ​ສິ່ງ​ເສດເຫຼືອ​ທີ່​ຕົກ​ຄ້າງ​ໃນ​ມະຫາ​ສະ ໝຸດ​ຈະ​ເພີ່ມ​ຂຶ້ນ​ເຖິງ 3 ເທົ່າ​ໃນ​ປີ 2050 ເຊິ່ງ​ນະ​ວັດຕະ​ກຳ​ໃໝ່​ນີ້​ໃຊ້​ເວລາ​ເຖິງ 3 ປີ ໃນ​ການ​ພັດທະນາ Snap Pack ເປັນ​ໜຶ່ງ​ໃນ​ບັນດາ​ຫຼາຍ​ນະ​ວັດຕະ​ກຳ​ດ້ານ​ການ​ຫຸ້ມ​ຫໍ່​ແບບ​ຍືນ​ຍົງ ທີ່ ຄຣາ​​ສ​ເບີກ ເລີ່ມ​ປະກາດ​ໃຊ້​ໃນ​ບໍ່​ດົນ​ມາ​ນີ້.

     ນອກ​ນີ້ ຍັງ​ມີ​ນະ​ວັດຕະ​ກຳ​ອື່ນໆ ເຊັ່ນ: ການ​ນຳ​ໃຊ້​ນ້ຳເມິກ​ທີ່​ສາມາດ​ນຳ​ກັບ​ມາ​ໃຊ້​ຄືນ​ໄດ້ ການ​ເຄືອບແບບ​ພິເສດ ເພື່ອ​ຂະຫຍາຍ​ອາຍຸ​ການ​ນຳ​ໃຊ້​ຂອງ​ຂວດ​ແກ້ວ ແລະ ນະ​ວັດຕະ​ກຳ​ໃໝ່​ດ້ານ​ຝາອັດ​ທີ່​ສາມາດ​ດູດ​ຊັບ​ອາຍ​ອອກ​ຊີ​ແຊນ ເພື່ອ​ຊ່ວຍ​ໃຫ້​ເບຍ​ຍັງ​ຄົງ​ສົດ​ໃໝ່​ຢູ່​ໄດ້​ດົນ​ຂຶ້ນ.

     ນະ​ວັດຕະ​ກຳ​ນີ້​ເປັນ​ພຽງ​ຈຸດເລີ່ມ​ຕົ້ນ​ຂອງ​ຫຼາຍໆ​ໂຄງການ​ຂອງ​ການ​ພັດທະນາ​ແບບ​ຍືນ​ຍົງ​ຂອງ​ກຸ່ມ​ບໍລິສັດ ຄຣາ​​ສ​ເບີກ ໄປ​ຄຽງ​ຄູ່​ກັບ​ໂຄງການ ພ້ອມ​ກັນ​ກ້າວ​ສູ່​ສູນ​ທີ່​ມີ​ຈຸດປະສົງ​ໃນ​ການ​ຫຼຸ​​ຸດ​ຜ່ອນ​ອາຍ​ກາກ​ໂບ​ນິກ ແລະ ນ້ຳ​ເປື້ອນ.

     ທ່ານ ເຄ​​ສ​ຮາດ ຜູ້​ບໍລິຫານ​ຂອງ​ເຄືອ​ບໍລິສັດ​ຄາ​​ຣສ​ເບີກ ໄດ້​ກ່າວ​ວ່າ: ພວກ​ເຮົາ​ກຳລັງ​ເຮັດ​ວຽກຢ່າງ​ໜັກ​ເພື່ອ​ພັດທະນາ​ໂຄງການ​ສ້າງ​ຄວາມ​ຍືນ​ຍົງ​ຂອງ​ພວກ​ເຮົາ ແລະ ທັງ​ເປັນ​ການ​ຊ່ວຍ​ແກ້​ໄຂ​ບັນຫາ​ການ​ປ່ຽນແປງ​ຂອງ​ສະພາບ​ອາກາດ ພວກ​ເຮົາ​ຈະ​ພະຍາຍາມ​ມອບ​ປະສົບ​ການ​ການ​ດື່ມ​ເບຍ​ທີ່​ດີ​ໃຫ້​ແກ່​ລູກ​ຄ້າ​ຂອງ​ພວກ​ເຮົາ ດ້ວຍ​ການ​ສ້າງ​ຜົນ​ກະທົບ​ສິ່ງແວດລ້ອມ​ໃຫ້​ໜ້ອຍ​ລົງ​ທີ່​ສຸດ.

    ເຕັກ​ໂນ​ໂລ​ຊີ “Snap Pack” ແມ່ນ​ໄດ້​ຮັບ​ການ​ທົດ​ລອງ​ໃຊ້​ໃນ​ລາຊະ​ອານາຈັກ​ອັງກິດ ນ໋ອກ​ແວ ແລະ ກຳລັງ​ເປີດ​ຕົວ​ໃນ​ບາງ​ຕະ ຫຼາດ​ເອີ​ຣົບ​ອື່ນໆ ເລີ່ມ​ຕົ້ນ​ແຕ່​ເດືອນ​ກັນຍາ 2018 ເປັນຕົ້ນ​ມາ ເຊິ່ງ​ຄາດ​ວ່າ​ຈະ​ນຳ​ມາ​ໃຊ້​ຢູ່​ໃນ   ​ສປປ ລາວ ໃນ​ອະນາຄົດ ບໍລິສັດ ຄາ​​ຣສ​ເບີກ ບໍ່​ໄດ້​ສະຫງວນ​ສິດ ໃນ​ການ​ນຳ​ໃຊ້​ກາວ​ດັ່ງກ່າວ ແລະ​ຫວັງ​ວ່າ ບໍລິສັດ​ເບຍ​ອື່ນໆ ກໍ່​ຈະ​ນຳ​ແນວ​ຄວາມ​ຄິດ​ນີ້​ໄປ​ໃຊ້​ໃນ​ຂະ​ບວນ​ການ​ຜະລິດ ແລະ ພວກ​ເຮົາ​ຕ້ອງ​ການສະແດງ​ໃຫ້​ທົ່ວ​ໂລກ​ເຫັນ​ວ່າ ການ​ເຮັດ​ວຽກ​ຮ່ວມ​ກັນ​ເພື່ອ​ສ້າງ​ທາງ​ເລືອກ​ທີ່​ຍືນ​ຍົງ​ພວກ​ເຮົາ​ສາມາດ​ເຮັດ​ໃຫ້​ໂລກ​ນີ້​ດີ​ຂຶ້ນ​ກວ່າ​ເກົ່າ.

     ເຕັກ​ໂນ​ໂລ​ຊີ Snap Pack ບໍ່​ພຽງ​ແຕ່​ຈະ​ຖືກ​ໃຈ​ບັນດາ​ຜູ້​ບໍລິໂພກ​ທີ່​ເອົາໃຈໃສ່​ຕໍ່​ສິ່ງແວດລ້ອມ​ເທົ່າ​ນັ້ນ ແຕ່​ຍັງ​ສ້າງ​ຄວາມ​ປະ​ທັບ​ໃຈ​ໃຫ້​ແກ່​ນັກ​ວິເຄາະ​ອຸດສາຫະກຳ ທີ່​ຄິດ​ໃນ​ທາງ​ບວກ​ກ່ຽວ​ກັບ​ການ​ອອກ​ແບບ ແລະ ວິທີ​ການ​ທີ່​ມັນ​ອາດ​ຈະ​ສາມາດ​ໄປ​ປັບ​ໃຊ້​ໃນ​ອຸດສາຫະກຳ​ອື່ນ​ໄດ້ ຄວາມ​ຈິງ​ແລ້ວ ບໍລິສັດ​ຜູ້​ຜະລິດ​ສິນຄ້າ​ອຸປະໂພກ​ຫຼາຍ​ບໍລິສັດ​ໃນ​ອາຊີ ຫຼັງ​ຈາກ​ໄດ້​ເຫັນ​ລາຍ​ງານ​ນີ້​ໄດ້​ສະແດງ​ຄວາມ​ສົນໃຈ ແລະ ຕ້ອງການ​ຢາກ​ຈະ​ເຂົ້າ​ຮ່ວມ​ໂຄງການ ເພື່ອ​ຊ່ວຍ​ຫຼຸດຜ່ອນ​ສິ່ງ​ເສດ​ເຫຼືອ​ຈາກ​ຢາງ​​ປຼັສ​ຕິກ ເຊິ່ງ​ໜຶ່ງ​ໃນ​ນັ້ນ ມີ​ບໍລິສັດ Vitasoy ຂອງ​ປະເທດ​ຈີນ​ໄດ້​ກ່າວ​ວ່າ​ເຂົາເຈົ້າ​ກຳລັງ​ພິ​ຈາ ລະ​ນາ​ນຳ​ໃຊ້​ເຕັກ​ໂນ​ໂລ​ຊີ​ໃໝ່ ໃນ​ການ​ບັນຈຸ​ພັນ​ກະ​ປ໋ອງ​ຊາ​ໝາກ​ນາວ​ຂອງ​ເຂົາເຈົ້າ.

ຂ່າວທີ່ກ່ຽວຂ້ອງ