ຂ່າວຫຼ້າສຸດ

ການ​ສົ່ງ​ອອກ​ສິນຄ້າ​ຂອງ​ຍີ່ປຸ່ນ ຫຼຸດ​ລົງ​ເປັນ​ເທື່ອ​ທຳ​ອິດ​ໃນ​ຮອບ​ເວລາ​ເກືອບ 2 ປີ

421 22 ຕ.ລ. 2018 ຂ່າວຕ່າງປະເທດ
ການ​ສົ່ງ​ອອກ​ສິນຄ້າ​ຂອງ​ຍີ່ປຸ່ນ ຫຼຸດ​ລົງ​ເປັນ​ເທື່ອ​ທຳ​ອິດ​ໃນ​ຮອບ​ເວລາ​ເກືອບ 2 ປີ

    ກະຊວງ​ການ​ເງິນ​ຍີ່ປຸ່ນ ປະກາດ​ບົດ​ລາຍ​ງານ​ເບື້ອງ​ຕົ້ນ​ສະບັບ​ໜຶ່ງ​ອອກ​ມາ​ເມື່ອ​ວັນ​ທີ 18 ຕຸລາ​ນີ້ ໂດຍ​ຊີ້​ໃຫ້​ເຫັນ​ວ່າ ການ​ສົ່ງ​ອອກ​ສິນຄ້າ​ຂອງ​ຍີ່ປຸ່ນ ໃນ 9 ເດືອນ​ທີ່​ຜ່ານ​ມາ ໄດ້​ຫຼຸດ​ລົງ​ເປັນ​ເທື່ອ ທຳ​ອິດ ໃນ​ຮອບ​ເວລາ​ເກືອບ 2 ປີຜ່ານມາ ຊຶ່ງ​ເປັນ​ຍ້ອນ​ພາຍຸ ເຈ​ບີ (Jebi) ທຳລາຍ​ຢູ່​ໃນ​ເຂດ ອ້ອມແອ້ມ​ແຂວງ ໂອຊາ​ກາ (ພາກ​ຕາເວັນຕົກ​ຍີ່ປຸ່ນ) ຊຶ່ງ​ໄດ້​ເຮັດ​ໃຫ້​ການເຄື່ອນໄຫວ​ຜະລິດ ແລະ​ສົ່ງ​ອອກ​ສິນຄ້າ​ຢຸດ​ສະ​ງັກ.

    ໃນ​ນັ້ນ ການ​ສົ່ງ​ອອກ​ສິນຄ້າ​ຂອງ​ຍີ່ປຸ່ນ ໃນ​ເດືອນ​ກັນຍາ​ທີ່​ຜ່ານ​ມາ ຫຼຸດ​ລົງ 1,2% ເມື່ອ​ທຽບ ໃສ່​ໃນ​ເດືອນ​ກັນຍາ ປີ 2017 ລົງ​ໄປ​ບັນລຸ​ທີ່ 6.730 ຕື້​ເຢນ (ເທົ່າ​ກັບ​ປະມານ 59,8 ຕື້​ໂດ​ລາ ສະຫະລັດ). ນີ້​ເປັນ​ການ​ຫຼຸດ​ລົງ​ເທື່ອ​ທຳ​ອິດ ນັບ​ແຕ່​ເດືອນ​ພະຈິກ ປີ 2016 ເປັນຕົ້ນ​ມາ.

    ໃນ​ຂະນະ​ດຽວ​ກັນ ການ​​​ນຳ​ເຂົ້າ​ສິນຄ້າ​ຂອງ​ຍີ່ປຸ່ນ ເພີ່ມ​ຂຶ້ນ 7% ບັນລຸ​ມູນ​ຄ່າ 6.590 ຕື້​ເຢນ ຍ້ອນ​ວ່າ​ລາຄາ​ພະລັງງານ​ເພີ່ມ​ຂຶ້ນ ໃນ​ນັ້ນ​ການ​ນຳ​ເຂົ້າ​ນ້ຳມັນ​ດິບ ເພີ່ມ​ຂຶ້ນ 37,9% ເປັນ​ມູນ​ຄ່າ 722,8 ຕື້​ເຢນ ເຖິງ​ວ່າ​ບໍ​ລິ​ມາດ​ນ້ຳມັນ​ດິບ​ທີ່​ນຳ​ເຂົ້າ​ຫຼຸດ​ລົງ ຍ້ອນ​ລາຄາ​ນ້ຳມັນ​ໂລກ​ເພີ່ມ​ຂຶ້ນ​ກໍ​ຕາມ.

    ໃນ​ເດືອນ​ກັນຍາ​ທີ່​ຜ່ານ​ມາ ຄວາມ​ສົມ​ດຸນ​ທາງ​ດ້ານ​ການ​ຄ້າ​ສິນຄ້າ​ຂອງ​ຍີ່ປຸ່ນ ກັບ​ປະເທດ​ອື່ນໆ ບັນລຸ​ເກີນ​ດຸນ 139,6 ຕື້​ເຢນ ນັບ​ວ່າ​ເປັນ​ຕົວ​ເລກ​ເກີນ​ດຸນ​ເທື່ອ​ທຳ​ອິດ ໃນ​ຮອບ 3 ເດືອນ​ທີ່​ຜ່ານ​ມາ ແຕ່​ກໍ​ຫຼຸດ​ລົງ 78,7% ເມື່ອ​ທຽບໃສ່​ເດືອນ​ກັນຍາ ປີ 2017.

ຂ່າວທີ່ກ່ຽວຂ້ອງ