ລາວ ຮ່ວມແຂ່ງຂັນເທັນນິດສາກົນ ສະຫຼອງເສັ້ນທາງສາຍໄໝ

210 22 ຕ.ລ. 2018 ວົງຈອນກີລາ
ລາວ ຮ່ວມແຂ່ງຂັນເທັນນິດສາກົນ ສະຫຼອງເສັ້ນທາງສາຍໄໝ

    ທີມ​ນັກ­ກີ­ລາ​ເທັນ​ນິດ​ລາວ ພ້ອມ​ດ້ວຍ​ບັນ­ດາ​ປະ­ເທດ​ອາ­ຊີ​ໃຕ້ ແລະ ອາ­ຊີ​ຕາ­ເວັນ​ອອກ­ສຽງ​ໃຕ້ ໄດ້​ເຂົ້າ​ຮ່ວມ​ແຂ່ງ­ຂັນ​ໃນ​ລາຍ­ການ​ຢູນ​ນານ​ສວຍ​ງາມ-ເສັ້ນ­ທາງ​ສາຍ­ໄໝ ການ​ແຂ່ງ­ຂັນ​ກີ­ລາ​ເທັນ​ນິດ​ຄຸນ​ໝິງ​ສາ­ກົນ ຢູ່​ສູນ​ກາງ​ກີ­ລາ​ເທັນ​ນິດ​ບໍ່​ນ້ຳ​ອຸ່ນ ເມືອງ​ອານ​ໜິງ ນະ­ຄອນ​ຄຸນ​ໝິງ ແຂວງ​ຢູນ​ນານ ສປ ຈີນ ວັນ​ທີ 6-14 ຕຸ­ລາ 2018 ທີ່​ຜ່ານ​ມາ.

    ເພື່ອ​ສະ­ເຫຼີມ­ສະ­ຫຼອງ​ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ເສັ້ນ­ທາງ​ສາຍ­ໄໝ ຄົບ­ຮອບ 5 ປີ ທີ່​ທ່ານ ສີ ຈິນ​ຜິງ ປະ­ທານ​ປະ­ເທດ​ຈີນ​ເປັນ​ຜູ້​ລິ​ເລີ່ມ​ແນວ​ຄິດ​ນີ້ ໂດຍ​ເລັ່ງ​ໃສ່​ສົ່ງ­ເສີມ ແລະ ຮັດ​ແໜ້ນ​ການ​ຮ່ວມ​ມື​ລະ­ຫວ່າງ​ປະ­ຊາ­ຊົນ ແລະ ປະ­ເທດ​ຕ່າງໆ ການ​ແຂ່ງ­ຂັນ​ຄັ້ງ​ນີ້​ຍັງ​ເລັ່ງ​ໃສ່​ການ​ແລກ­ປ່ຽນ ແລະ ຮ່ວມ​ມື​ໃນ​ຂົງ­ເຂດ​ການ​ກີ­ລາ​ກັບ​ບັນ­ດາ​ປະ­ເທດ ໃນ​ຂົງ­ເຂດ​ອາ­ຊີ​ໃຕ້ ແລະ ອາ­ຊີ​ຕາ­ເວັນ​ອອກ­ສຽງ​ໃຕ້ ເພື່ອ​ເປີດ​ປະ­ຕູ ແລະ ກາ­ລະ​ໂອ­ກາດ​ການ​ພົວ­ພັນ ແລະ ຮ່ວມ​ມື​ໃນ​ພາກ​ພື້ນ​ຫຼາຍ​ດ້ານ ໂດຍ​ນຳ​ໃຊ້​ກີ­ລາ​ເທັນ​ນິດ ເພື່ອ​ສົ່ງ­ເສີມ​ມິດ­ຕະ­ພາບ​ລະ­ຫວ່າງ​ປະ­ເທດ​ຕ່າງໆ ແລະ ປະ­ຊາ­ຊົນ ອີກ​ດ້ານ​ໜຶ່ງ​ກໍ່​ເປັນ​ການ​ສົ່ງ­ເສີມ​ການ­ທ່ອງ­ທ່ຽວ​ຢູ່​ແຂວງ​ຢຸນ​ໜານ ໂດຍ​ສະ­ເພາະ​ເມືອງ​ອານ​ໜິງ​ທີ່​ມີ​ບໍ່​ນ້ຳ​ອຸ່ນ​ຈາກ​ທຳ​ມະ​ຊາດ ແລະ ຊັບ­ພະ­ຍາ­ກອນ​ທຳ​ມະ​ຊາດ​ທີ່​ສວຍ​ສົດ​ງົດ​ງາມ.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ມາ​ຈາກ​ຈີນ ມຽນ​ມາ ສິງ­ກະ­ໂປ ສ ເກົາ­ຫຼີ ໄທ ຫວຽດ­ນາມ ລາວ ຟີ​ລິບ​ປິນ ມາ​ເລ​ເຊຍ ກຳ­ປູ­ເຈຍ ແລະ ມາ​ເກົາ​ເຂົ້າ​ຮ່ວມ ສະ­ເພາະ​ລາວ​ເຮົາ​ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ 8 ຄົນ ຍິງ 4 ຄົນ ແລະ ຄູ​ເຝິກ 1 ຄົນ ເຊິ່ງ​ການ​ແຂ່ງ­ຂັນ​ໄດ້​ແບ່ງ​ອອກ​ເປັນ 3 ປະ­ເພດ ເຊັ່ນ: ປະ­ເພດ​ທີມ​ປະ­ສົມ ປະ­ເພດ​ທີມ​ຊາຍ ອາ­ຍຸ​ບໍ່​ເກີນ 16 ປີ ແລະ ປະ­ເພດ​ທີມ​ຍິງ​ອາ­ຍຸ​ບໍ່​ເກີນ 16 ປີ.

    ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ: ປະ­ເພດ​ທີມ​ປະ­ສົມ​ທີ 1 ຈີນ ທີ 2 ໄທ ແລະ ທີ 3 ຈີນ ແລະ ຟີ​ລິບ​ປິນ​ປະ­ເພດ​ທີມ​ຊາຍ​ທີ 1 ສ ເກົາ­ຫຼີ ທີ 2 ຟິ​ລິບ​ປິນ ແລະ ທີ 3 ໄທ ປະ­ເພດ​ທີມ​ຍິງ ທີ 1 ໄທ ທີ 2 ສ ເກົາ­ຫຼີ ແລະ ທີ 3 ອິນ​ໂດ​ເນ​ເຊຍ.

ຂ່າວທີ່ກ່ຽວຂ້ອງ