ຂ່າວຫຼ້າສຸດ

ສຸລິຍາ ຄອງຂັນຊະນະເລີດສະນຸກເກີ 6 ແດງທົ່ວປະເທດ

292 22 ຕ.ລ. 2018 ວົງຈອນກີລາ
ສຸລິຍາ ຄອງຂັນຊະນະເລີດສະນຸກເກີ 6 ແດງທົ່ວປະເທດ

    ອີງ​ຕາມ​ຂໍ້​ມູນ​ຈາກ Lao National TV ລາຍ​ງານ​ໃຫ້​ຮູ້​ວ່າ: ການ​ແຂ່ງ­ຂັນ​ກີ­ລາ​ສະ­ນຸກ​ເກີ 6 ແດງ​ທົ່ວ​ປະ­ເທດ ຊີງ​ຂັນ​ປະ­ທານ​ສະ­ຫະ­ພັນ​ກີ­ລາ​ບິນ​ລ້ຽດ-ສະ­ນຸກ​ເກີ​ແຫ່ງ​ຊາດ ປະ­ຈຳ​ປີ 2018 ໄດ້​ຈັດ​ຂຶ້ນ​ວັນ​ທີ 13-16 ຕຸ­ລາ 2018 ທີ່​ສະ­ໂມ­ສອນ​ສະ­ນຸກ​ເກີ​ສະ​ຕາ ມີ​ທ່ານ ບຸນ​ເຖິງ ສຸ­ວັນ­ນະ​ສີ ຮອງ​ເຈົ້າ­ເມືອງ​ຈັນ­ທະ​ບູ​ລີ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ແລະ ທ່ານ ປະ­ສິດ​ໄຊ ຫຼວງ​ໂຄດ ປະ­ທານ​ສະ­ຫະ­ພັນ​ກີ­ລາ​ບິນ​ລ້ຽດ-ສະ­ນຸກ​ເກີ​ແຫ່ງ​ຊາດ ພ້ອມ​ດ້ວຍ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ເຂົ້າ​ຮ່ວມ​ເກືອບ 100 ຄົນ ຈາກ ລາວ ໄທ ມຽນ​ມາ ແລະ ກຳ­ປູ­ເຈຍ ໂດຍ​ແຂ່ງ­ຂັນ​ແບບ​ເປີດ​ກວ້າງ​ໃຫ້​ນັກ­ກີ­ລາ​ອາ­ຊີບ ແລະ ມື​ສະ­ໝັກ​ຫຼິ້ນ​ສາ­ມາດ​ເຂົ້າ​ຮ່ວມ​ແຂ່ງ­ຂັນ​ວັດ​ສີ­ມື​ກັນ​ໄດ້ ເພື່ອ​ເປັນ​ການ​ທົດ​ສອບ​ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ເຊິ່ງ​ກັນ ແລະ ກັນ ລະ­ຫວ່າງ​ນັກ­ກີ­ລາ​ພາຍ​ໃນ ແລະ ຕ່າງ­ປະ­ເທດ ກໍ່​ຄື ໃນ​ຂົງ­ເຂດ​ອາ​ຊຽນ.

    ຜ່ານ​ການ​ແຂ່ງ­ຂັນ​ສາ­ມາດ​ຄັດ​ໄດ້​ຄູ່​ຊີງ​ຊະ­ນະ​ເລີດ ເຊິ່ງ​ເປັນ​ການ​ໂຄ­ຈອນ​ມາ​ພົບ​ກັນ​ຂອງ 2 ນັກ­ກີ­ລາ​ສະ­ນຸກ​ເກີ​ທີມ​ຊາດ​ລາວ​ທ້າວ ສຸ­ລິ­ຍາ ມີ­ນາ​ລາ​ວົງ ເຈົ້າ​ຂອງ​ຫຼຽນ​ທອງ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ​ປີ 2017 ພົບ​ກັບ​ທ້າວ ສິດ­ທິ​ເດດ ສັກ​ບ່ຽງ ຫຼື ໜຶ່ງ​ເມືອງ​ລາວ ເຈົ້າ​ຂອງ​ຫຼຽນ​ຄຳ​ຊີ­ເກມ ຄັ້ງ​ທີ 29 ເຊັ່ນ​ກັນ ແລະ ເປັນ​ຝ່າຍ​ທ້າວ ສຸ­ລິ­ຍາ ສາ­ມາດ​ເອົາ​ຊະ­ນະ​ທ້າວ ສິດ­ທິ​ເດດ ສັກ​ບ່ຽງ ໄປ​ໄດ້​ແບບ​ຫວຸດ​ຫວິດ 5-3 ເຟຣມ ໄດ້​ຂັນ​ລາ­ງວັນ​ຊະ­ນະ​ເລີດ ພ້ອມ​ເງິນ­ສົດ 10 ລ້ານ​ກີບ ໄປ​ຄອງ​ໄດ້​ສຳ­ເລັດ ສ່ວນ​ທ້າວ ສິດ­ທິ​ເດດ ໄດ້​ຮັບ​ເງິນ 5 ລ້ານ​ກີບ ອັນ​ດັບ​ທີ 3 ທ້າວ ຫົງ​ສາ​ວະ​ດີ ອີກ​ໜຶ່ງ​ນັກ­ກີ­ລາ​ສະ­ນຸກ​ເກີ​ທີມ​ຊາດ​ລາວ ໄດ້​ຮັບ​ເງິນ​ລາ­ງວັນ​ຮ່ວມ​ກັບ​ອັນ​ດັບ​ທີ 4 ຜູ້​ລະ 2 ລ້ານ​ກີບ ສ່ວນ​ລາ­ງວັນ​ເກັບ​ຄະ­ແນນ​ສູງ​ສຸດ​ແມັກ​ຊິ​ໝ່ຳ​ເບຣກ ຕົກ​ເປັນ​ຂອງ​ນັກ­ກີ­ລາ​ປະ­ເທດ​ໄທ​ຮັບ​ເງິນ​ລາ­ງວັນ 1 ລ້ານ​ກີບ.

ຂ່າວທີ່ກ່ຽວຂ້ອງ