ອອກພັນສາ ຢ່າເປັນບຸນເອົາແຕ່ໜ້າຕາ

304 22 ຕ.ລ. 2018 ນານາສາລະ

    ເຖິງ​ແມ່ນ​ວ່າ​ປີ​ໜຶ່ງ ມີ 12 ເດືອນ ແລະ ເຂົ້າ​ພັນ​ສາ​ສາມ​ເດືອນ ມັນ​ຈະ​ໝູ­ນວຽນ​ມາ​ໄວ​ຕາມ​ຄວາມ​ຮູ້­ສຶກ ແຕ່​ຄວາມ​ຈິງ​ແລ້ວ ການ​ເວ​ລາ­ມັນ​ກໍ່​ເຮັດ​ໜ້າ­ທີ່​ຂອງ​ມັນ ມັນ​ຈະ​ໝູນ​ຢູ່​ຕະ­ຫຼອດ​ເວ­ລາ ພຸດ​ທະ​ສາດ­ສະ­ໜາ​ຈຶ່ງ​ສອນ​ວ່າ: ການ​ເວ­ລາ​ຍ່ອມ​ກືນ​ກິນ​ສັບ­ພະ­ສັດ ຜູ້​ຂຽນ​ມັກ­ໄດ້​ຍິນ​ເຂົາ​ເວົ້າ ອອກ​ພັນ​ສາ­ລາ​ພະ​ເຈົ້າ ອັນ​ນີ້​ຄື​ຊິ​ແມ່ນ​ຄວາມ​ເວົ້າ​ຂອງ​ຊາວ­ບ້ານ ຫຼື ຜູ້​ບວດ​ຮຽນ​ຖື​ໂອ­ກາດ​ລາ​ສິກ​ເມື່ອ​ອອກ​ພັນ​ສາ​ອອກ​ພັນ​ສາ​ປີ​ນີ້ ກົງ​ກັບ​ວັນ​ພຸດ ວັນ​ທີ 24 ເດືອນ​ຕຸ­ລາ ຂຶ້ນ 15 ຄ່ຳ​ເດືອນ 11 ລາວ.

    ອອກ​ພັນ​ສາ ໝາຍ​ຄວາມ​ວ່າ ອອກ​ຈາກ​ຂອບ​ເຂດ​ຈຳ­ກັດ ຕາມ​ທີ່​ວິ​ໃນ​ຂອງ​ພະ­ສົງ​ທີ່​ກຳ­ນົດ​ໄວ້​ວ່າ ພະ­ສົງ​ຈະ​ຕ້ອງ​ຢູ່​ຈຳ​ພັນ​ສາ 3 ເດືອນ ບໍ່​ທ່ອງ​ທ່ຽວ ເດີນ­ທາງ​ຂຶ້ນ​ເໜືອ​ລົງ​ໃຕ້ ຍົກ­ເວັ້ນ​ມີ​ເຫດ​ຈຳ­ເປັນ​ຕ້ອງ​ໄປ​ວິ​ໃນ​ກໍ່​ມີ​ຂໍ້​ຍົກ­ເວັ້ນ​ໃຫ້​ໄປ​ໄດ້​ບໍ່​ເກີນ 7 ມື້ ສຳ­ລັບ​ຢູ່​ນະ­ຄອນ­ຫຼວງ​ວຽງ​ຈັນ ບຸນ​ອອກ​ພັນ​ສາ​ຍັງ​ມີ​ບຸນ­ຊ່ວງ­ເຮືອ​ທີ່​ຕິດ­ຕໍ່​ກັນ ບຸນ​ໄຫຼ­ເຮືອ­ໄຟ ບຸນ​ອອກ​ພັນ​ສາ​ນີ້ ພະ­ພຸດ­ທະ­ເຈົ້າ​ມີ​ຄວາມ​ປະ­ສົງ​ອະ­ນຸ­ຍາດ​ໃຫ້​ພະ­ສົງ​ເດີນ­ທາງ​ໄດ້ ເພື່ອ​ໄປ​ເທ­ສະ­ໜາ​ອົບ­ຮົມ​ສັ່ງ­ສອນ​ປະ­ຊາ­ຊົນ​ໃຫ້​ຕັ້ງ​ຢູ່​ໃນ​ຫຼັກ​ສິນ​ທຳ ປະ­ກອບ​ອາ­ຊີບ​ສຸດ­ຈະ­ລິດ ບໍ່​ສໍ້​ໂກງ ຂີ້­ລັກ​ຊັບ​ຂອງ​ຄົນ​ອື່ນ ເພາະ​ຖ້າ​ຈະ​ອາ­ໄສ​ແຕ່​ກົດ­ໝາຍ​ອາດ​ບໍ່​ພຽງ­ພໍ ດັ່ງ­ນັ້ນ ບົດ­ບາດ​ການ​ເຜີຍ­ແຜ່​ສິນ​ທຳ​ຈຶ່ງ​ແມ່ນ​ໜ້າ­ທີ່​ຂອງ​ພະ­ສົງ​ໂດຍ​ກົງ.

    ສຳ­ລັບ​ມື້­ບຸນ​ອອກ​ພັນ​ສາ​ນັ້ນ ຊາວ​ພຸດ​ລາວ ໄດ້​ພາ­ກັນ​ຫ້າງ­ເຄື່ອງ​ຖວາຍ​ທານ​ແດ່​ພະ­ສົງ ແລະ ຮັບ​ສິນ​ໄປ​ປະ­ຕິ­ບັດ ແຕ່​ສຳ­ລັບ​ບາງ​ຄົນ​ທີ່​ຕັ້ງ­ໃຈ​ງົດ​ເຫຼົ້າ ບໍ່​ດື່ມ​ສຸ­ລາ​ໄລ­ຍະ​ເຂົ້າ​ພັນ​ສາ ກໍ່​ຄື ຊິ​ດີ­ໃຈ​ຫຸ່ມໆ​ວ່າ ມື້​ອອກ​ພັນ​ສາ​ແລ້ວ​ຈະ​ໄດ້​ກິນ​ດື່ມ​ໃຫ້​ສົມ​ໃຈ (ບໍ່​ວ່າ​ກັນ​ນໍ) ແຕ່​ຂໍ​ໃຫ້​ມີ​ຂອບ​ເຂດ ແລະ ມີ​ສະ­ຕິ​ບໍ່​ຕົກ​ຢູ່​ໃນ​ອາ­ການ​ປະ­ໝາດ​ມຶນ­ເມົາ ບໍ່​ກໍ່​ຄວາມ​ທະ​ເລາະ​ວິ­ວາດ ຈົນ​ເປັນ​ເຫດ​ໃຫ້​ເສຍ­ຊື່​ສຽງ ແລະ ຊັບ​ສິນ ແນວ­ໃດ​ກໍ່​ຕາມ ນັກ­ປາດ​ອາ­ຈານ​ເພິ່ນ​ກໍ່ ສອນ​ໄວ້​ວ່າ: ຜູ້​ໃດ​ກໍ່​ຕາມ​ຫາກ​ຕິດ​ໃນ​ອະ­ບາຍ​ຍະ​ມຸກ​ກໍ່​ຈະ​ມີ​ແຕ່​ຄວາມ​ເສື່ອມ​ເສຍ­ທ່າ​ດຽວ ດັ່ງ­ນັ້ນ ບຸນ​ອອກ​ພັນ​ສາ ຈຶ່ງ​ເປັນ​ການ​ເປີດ​ໂອ­ກາດ​ໃຫ້​ທັງ​ພະ­ສົງ ໄດ້​ປະ­ຕິ­ບັດ​ໜ້າ­ທີ່​ອອກ​ເຜີຍ­ແຜ່​ສິນ​ທຳ​ໃຫ້​ປະ­ຊາ­ຊົນ ແລະ ເປີດ​ໂອ­ກາດ​ໃຫ້​ປະ­ຊາ­ຊົນ ໄດ້​ມີ​ໂອ­ກາດ​ໂອ້​ລົມ​ສົນ­ທະ­ນາ​ຫຼັກ​ທຳ​ມະ ເມື່ອ​ໄດ້​ພົບ​ກັບ​ພະ­ສົງ ຈຸດ​ນີ້​ຈຶ່ງ​ເປັນ​ໜ້າ­ທີ່​ຂອງ​ຊາວ​ພຸດ​ທີ່​ຕ້ອງ​ໄດ້​ສຶກ​ສາ​ຮຽນ​ຮູ້​ວ່າ ເຮົາ​ຕ້ອງ​ໄດ້​ຮູ້­ຈັກ​ຫຼັກ​ທຳ​ໃນ​ຖາ­ນະ​ເປັນ​ຊາວ​ພຸດ.

    ບຸນ​ອອກ​ພັນ​ສາ​ປີ​ນີ້ ຂໍ​ໃຫ້​ພວກ​ເຮົາ​ທັງ­ຫຼາຍ​ຈົ່ງ​ມີ​ສະ­ຕິ​ຕັ້ງ­ໃຈ​ເຮັດ​ໜ້າ­ທີ່​ຊາວ​ພຸດ ເຮັດ­ບຸນ​ຕາມ​ກຳ­ລັງ ບໍ່​ແມ່ນ​ເຮັດ­ບຸນ​ເອົາ­ໜ້າ​ຕາ ຖ້າ​ເປັນ​ແນວ​ນັ້ນ ມັນ​ຈະ​ເປັນ​ສັດ­ທາ​ຫົວ​ເຕົ່າ ເຊິ່ງ​ບໍ່​ຖືກ​ກັບ​ຫຼັກ­ການ​ເປັນ​ຊາວ​ພຸດ​ທີ່​ເນັ້ນ​ສັດ­ທາ (ຄວາມ​ເຊື່ອ) ຕ້ອງ​ໄປ​ຄຽງ​ຄູ່​ກັບ​ປັນ­ຍາ.

ຂ່າວທີ່ກ່ຽວຂ້ອງ