ສຳຫຼວດຄວາມເປັນໄປໄດ້ ການພັດທະນາກີລາສາກົນລາວ-ຈີນ

114 23 ຕ.ລ. 2018 ວົງຈອນກີລາ
ສຳຫຼວດຄວາມເປັນໄປໄດ້ ການພັດທະນາກີລາສາກົນລາວ-ຈີນ

    ພິ­ທີ​ລົງ​ນາມ​ບົດ​ບັນ­ທຶກ​ຂໍ້​ຕົກ­ລົງ (MOA) ເພື່ອ​ການ​ສຶກ​ສາ​ຄວາມ​ເປັນ​ໄປ​ໄດ້​ໂຄງ­ການ​ຮ່ວມ​ມື​ພັດ­ທະ­ນາ​ວຽກ​ງານ​ກີ­ລາ “ເຂດ​ອຸດ­ສາ­ຫະ­ກຳ ວັດ­ທະ­ນະ­ທຳ ການ​ກີ­ລາ​ສາ­ກົນ ລາວ-ຈີນ” ຈັດ​ຂຶ້ນ​ວັນ​ທີ 19 ຕຸ­ລາ 2018 ຢູ່​ໂຮງ­ແຮມ​ດອນ​ຈັນ​ພາ​ເລດ ລະ­ຫວ່າງ​ທ່ານ​ນາງ ຂັນ​ທະ​ລີ ສິ­ລິ​ພົງ­ພັນ ຫົວ­ໜ້າ​ຫ້ອງ­ການ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ທ່ານ ປາຍ​ຢູນ ປະ­ທານ​ບໍ­ລິ­ສັດ ເປີຍ​ຈີງ​ຟູ​ລຸ້ຍ​ເຮີງ​ທົ່ງ​ການ​ລົງ­ທຶນ ຈຳ­ກັດ (BFIC) ປັກ​ກິ່ງ ສປ ຈີນ ແລະ ທ່ານ ລີ​ຂາຍ ອຳ­ນວຍ​ການ​ໃຫຍ່​ບໍ­ລິ­ສັດ ທີ່​ປຶກ­ສາ​ດ້ານ​ການ​ລົງ­ທຶນ ແລະ ກໍ່­ສ້າງ​ເຂື່ອນ​ໄຟ­ຟ້າ ຈຳ­ກັດ​ຜູ້​ດຽວ ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ ສສກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ​ຮ່ວມ​ມື​ເຂດ​ອຸດ­ສາ­ຫະ­ກຳ ວັດ­ທະ­ນະ­ທຳ ການ​ກີ­ລາ​ສາ­ກົນ ລາວ-ຈີນ ເປັນ​ໂຄງ­ການ​ລະ­ດັບ​ສາ­ກົນ ເພື່ອ​ຍົກ​ລະ­ດັບ​ການ​ແຂ່ງ­ຂັນ​ກີ­ລາ​ລະ­ດັບ​ຊາດ​ຂອງ ສປປ ລາວ ແລະ ສົ່ງ­ເສີມ​ຄຸ­ນະ­ພາບ​ດ້ານ​ຮ່າງ­ກາຍ​ຂອງ​ປະ­ຊາ­ຊົນ​ລາວ ຕອບ​ສະ­ໜອງ​ຄວາມ​ຕ້ອງ­ການ​ໃນ​ການ​ເຝິກ­ຊ້ອມ​ນັກ­ກີ­ລາ​ທີມ​ຊາດ​ຂອງ​ຈີນ​ໃນ​ລະ­ດູ​ໜາວ ໂດຍ​ສົ່ງ­ເສີມ​ການ​ແຂ່ງ­ຂັນ​ກີ­ລາ​ລະ­ດັບ​ສາ­ກົນ ສ້າງ​ໃຫ້ ສປປ ລາວ ກາຍ­ເປັນ​ສະ­ຖານ­ທີ່​ເຝິກ­ຊ້ອມ ແລະ ຈັດ­ການ​ແຂ່ງ­ຂັນ​ລະ­ດັບ​ສາ­ກົນ ໂຄງ­ການ​ດັ່ງ­ກ່າວ ຈະ​ປະ­ກອບ­ສ່ວນ​ເຮັດ​ໃຫ້­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ມີ​ຄວາມ​ເຂັ້ມ­ແຂງ ໂດຍ​ສະ­ເພາະ​ຂົງ­ເຂດ​ວັດ­ທະ­ນະ­ທຳ-ສັງ­ຄົມ ແລະ ການ​ກີ­ລາ ນອກ​ນີ້ ຍັງ​ເປັນ​ໂຄງ­ການ​ໜຶ່ງ​ທີ່​ສຳ­ຄັນ ຕໍ່​ການ­ຈັດ­ຕັ້ງ​ປະ­ຕິ­ບັດ​ແຜນ​ຍຸດ​ທະ​ສາດ​ພັດ­ທະ­ນາ​ກີ­ລາ​ລາວ ເພື່ອ​ຮັບ​ໃຊ້​ໃນ​ການ​ພັດ­ທະ­ນາ​ກີ­ລາ-ກາຍ­ຍະ­ກຳ​ລາວ ໃຫ້​ສາ­ມາດ​ເຊື່ອມ​ໂຍງ ແລະ ເຂົ້າ​ຮ່ວມ​ການ​ແຂ່ງ­ຂັນ​ໃນ​ລະ­ດັບ​ສາ­ກົນ.

    ທ່ານ ບົວ​ລານ ສິ­ລິ​ປັນ­ຍາ ກ່າວ​ວ່າ: ການ​ດຳ­ເນີນ​ການ​ສຳ​ຫຼວດ​ວຽກ​ງານ​ຂອງ​ໂຄງ­ການ ຕ້ອງ​ໃຫ້​ກຳ­ນົດ​ລະ­ອຽດ​ກ່ຽວ​ກັບ​ເນື້ອ­ທີ່​ຂອງ​ໂຄງ­ການ ທີ່​ຈະ​ນຳ​ໃຊ້​ໄລ­ຍະ​ສຳ​ປະ­ທານ ການ​ຖື​ຫຸ້ນ ແລະ ອື່ນໆ​ຂອງ​ແຕ່​ລະ​ຝ່າຍ ໃຫ້​ສອດ­ຄ່ອງ​ກັບ​ກົດ­ໝາຍ​ວ່າ​ດ້ວຍ​ການ​ສົ່ງ­ເສີມ​ການ​ລົງ­ທຶນ​ຂອງ ສປປ ລາວ ການ​ດຳ­ເນີນ​ວຽກ​ງານ​ປະ­ສານ​ງານ ແລະ ການ​ສ້າງ​ເອ­ກະ­ສານ​ນິ­ຕິ​ກຳ​ຕ່າງໆ​ຂອງ​ໂຄງ­ການ ຕ້ອງ​ໃຫ້​ຖືກ­ຕ້ອງ​ຕາມ​ຂັ້ນ​ຕອນ ລະ­ບຽບ​ການ​ຂອງ​ການ​ສ້າງ​ນິ­ຕິ​ກຳ​ລະ­ຫວ່າງ​ປະ­ເທດ ແລະ ສອດ­ຄ່ອງ​ກັບ​ກົດ­ໝາຍ ສປປ ລາວ.

ຂ່າວທີ່ກ່ຽວຂ້ອງ