ບີເອສວີ ເນັ້ນສ້າງບຸຄະລາກອນໃຫ້ມີຄຸນະພາບ

99 23 ຕ.ລ. 2018 ຂ່າວໜ້າ​ໜຶ່ງ
ບີເອສວີ ເນັ້ນສ້າງບຸຄະລາກອນໃຫ້ມີຄຸນະພາບ

    ໂຮງ­ຮຽນ​ເຕັກ­ນິກ-ວິ­ຊາ​ຊີບ​ບີ​ເອ​ສວີ ຕັ້ງ​ຢູ່​ຖະ­ໜົນ 13 ເໜືອ ບ້ານ​ໄຊ​ມຸງ­ຄຸນ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ເປັນ​ສະ​ຖາ​ບັນ​ການ​ສຶກ​ສາ​ພາກ​ເອ­ກະ​ຊົນ ເປີດ​ການ​ຮຽນ-ການ​ສອນ​ສົກ­ຮຽນ 2017-2018 ເປັນ­ຕົ້ນ​ມາ ເພື່ອ​ຊ່ວຍ​ໂຮງ­ຮຽນ​ພາກ​ລັດ​ໃນ​ການ​ສ້າງ​ບຸ​ຄະ­ລາ​ກອນ​ຮັບ​ໃຊ້​ສັງ­ຄົມ ປັດ­ຈຸ­ບັນ​ກຳ­ລັງ​ຮັບ​ສະ­ໝັກ​ນັກ­ຮຽນ​ເຂົ້າ​ຮຽນ​ລະ­ບົບ​ຊັ້ນ​ສູງ ສົກ­ຮຽນ 2018-2019 ໂດຍ​ເປີດ​ຮັບ​ສະ­ໝັກ​ຮອດ​ທ້າຍ​ເດືອນ​ຕຸ­ລາ 2018.

    ທ່ານ ຈັນ​ສຸກ ຄຳ​ພັນ ຜູ້­ອຳ­ນວຍ­ການ​ໂຮງ­ຮຽນ​ເຕັກ­ນິກ-ວິ­ຊາ​ຊີບ​ບີ​ເອ​ສວີ ໃຫ້​ສຳ­ພາດ​ບໍ່​ດົນ​ນີ້​ວ່າ: ໂຮງ­ຮຽນ​ເຕັກ­ນິກ-ວິ­ຊາ​ຊີບ​ບີ​ເອ​ສວີ ສ້າງ­ຕັ້ງ​ວັນ​ທີ 23 ກຸມ­ພາ 2017 ໂດຍ​ມີ​ຫຼັກ­ສູດ​ການ​ຮຽນ-ການ​ສອນ 4 ຫຼັກ­ສູດ ຊັ້ນ​ສູງ​ລະ­ບົບ 3 ປີ ວັນ​ທີ 22 ພຶດ­ສະ­ພາ 2018 ຄື: ວິ­ຊາ​ຄອມ​ພິວ​ເຕີ​ທຸ­ລະ​ກິດ ວິ­ຊາ​ການ​ບັນ­ຊີ​ວິ​ສາ​ຫະ​ກິດ ວິ­ຊາ​ວິ­ສະ­ວະ­ກຳ​ໄຟ­ຟ້າ ແລະ ວິ­ຊາ​ບໍ­ລິ­ຫານ​ການ­ທ່ອງ­ທ່ຽວ-ໂຮງ­ແຮມ ສ່ວນ​ຫຼັກ­ສູດ​ບໍ­ລິ­ຫານ​ທຸ­ລະ​ກິດ-ພາ­ສາ​ອັງ­ກິດ ແມ່ນ​ກຳ­ລັງ​ຢູ່​ໃນ​ຂັ້ນ​ຕອນ​ຂໍ­ອະ­ນຸ­ຍາດ ແຕ່​ການ​ຮຽນ-ການ​ສອນ​ໄດ້​ດຳ­ເນີນ​ມາ​ເປັນ​ປີ​ທີ 2 ນອກ​ນີ້ ຍັງ​ມີ​ວິ­ຊາ​ອາ­ຫານ-ການ​ໂຮງ­ແຮມ ວິ­ຊາ​ສ້ອມ­ແປງ​ເຄື່ອງ​ເຢັນ-ຕິດ​ຕັ້ງ​ແອ ວິ­ຊາ​ຈອດ​ໄຟ­ຟ້າ ວິ­ຊາ​ຈອດ​ໂລ­ຫະ ວິ­ຊາ​ເດີນ​ສາຍ​ໄຟ­ຟ້າ​ໃນ​ອາ­ຄານ ຊັ້ນ​ຕົ້ນ ລະ­ດັບ 1 (3 ເດືອນ) ລະ­ດັບ 2 (6 ເດືອນ) ລະ­ດັບ 3 (9 ເດືອນ) ແລະ ຫຼັກ­ສູດ​ວິ­ຊາ​ຊີບ​ສະ­ເພາະ​ດ້ານ​ໄອ​ທີ​ຫຼັກ­ສູດ 10 ຊົ່ວ­ໂມງ 20 ຊົ່ວ­ໂມງ 30 ຊົ່ວ­ໂມງ ແລະ 60 ຊົ່ວ­ໂມງ ໂດຍ​ການ​ເຝິກ​ແມ່ນ​ຂຶ້ນ​ກັບ​ຄວາມ​ຕ້ອງ­ການ​ຂອງ​ນັກ­ຮຽນ ເພື່ອ​ຮັບ­ຮອງ​ເອົາ​ຊາວ​ໜຸ່ມ​ທີ່​ເຫຼືອ​ຈາກ​ການ​ສັບ​ຊ້ອນ ຫຼື ເສັງ​ເຂົ້າ​ຊັ້ນ​ສູງ​ໂຮງ­ຮຽນ​ພາກ​ລັດ​ບໍ່​ໄດ້.

    ຜ່ານ​ການ​ຮຽນ-ການ​ສອນ ແມ່ນ​ມີ​ຜູ້​ສົນ­ໃຈ​ເຂົ້າ​ຮຽນ​ຫຼາຍ​ສົມ­ຄວນ ໂດຍ​ສະ­ເພາະ​ຊັ້ນ​ສູງ ມີ​ນັກ­ຮຽນ​ແຕ່​ລະ​ຂະ­ແໜງ​ບໍ່​ຫຼຸດ 20 ຄົນ ສຳ­ລັບ​ວິ­ຊາ​ຊີບ​ຊັ້ນ​ຕົ້ນ​ກໍ່​ມີ​ຜູ້​ທີ່​ສົນ­ໃຈ​ເຂົ້າ​ມາ​ເຝິກ ເຝິກ​ວັນ​ເສົາ-ວັນ​ອາ­ທິດ ເຊິ່ງ​ຊ່ວຍ​ໃຫ້​ຊາວ​ໜຸ່ມ​ມີ​ວຽກ​ເຮັດ​ງານ​ທຳ ແລະ ມີ​ລາຍ​ໄດ້ ເພາະ​ປັດ­ຈຸ­ບັນ​ມີ​ການ​ແຍ່ງ​ຊີງ​ວຽກ​ເຮັດ​ງານ​ທຳ ສະ­ນັ້ນ ຜູ້​ທີ່​ຮຽນ​ບໍ່​ເກ່ງ ກໍ່​ຄວນ​ຫັນ​ເຂົ້າ​ສູ່​ການ​ຮຽນ​ແຂ່ງ​ວິ­ຊາ​ຊີບ​ໃຫ້​ຫຼາຍ​ຂຶ້ນ ເພື່ອ​ຈະ​ງ່າຍ​ໃນ​ການ​ຊອກ​ວຽກ​ເຮັດ​ງານ​ທຳ ປີ 2017 ມີ​ນັກ­ຮຽນ​ມາ​ຮຽນ​ຊັ້ນ​ສູງ 100 ກວ່າ​ຄົນ ສ່ວນ​ຫຼັກ­ສູດ​ໄລ­ຍະ​ສັ້ນ​ແມ່ນ​ມີ​ຈຳ­ນວນ​ຫຼາຍ​ທີ່​ຮຽນ​ຈົບ​ອອກ​ໄປ​ຮັບ​ໃຊ້​ສັງ­ຄົມ ການ​ເຝິກ​ວິ­ຊາ​ຊີບ​ໄລ­ຍະ​ສັ້ນ​ຕ້ອງ​ໄດ້​ໃຊ້​ທຶນ​ສູງ ໃນ​ການ​ຊື້​ວັດ­ຖຸ​ອຸ­ປະ­ກອນ​ຮັບ​ໃຊ້​ການ​ເຮັດ​ຕົວ​ຈິງ ສຳ­ລັບ​ສົກ­ຮຽນ 2018-2019 ປັດ­ຈຸ­ບັນ​ກຳ­ລັງ​ເປີດ​ຮັບ​ເອົາ 5 ຂະ­ແໜງ​ຊັ້ນ​ສູງ ມີ​ຜູ້​ມາ​ລົງ­ທະ­ບຽນ​ຮຽນ​ແລ້ວ 70 ກວ່າ​ຄົນ ແຕ່​ຍັງ​ຈະ​ສືບ­ຕໍ່​ເປີດ​ຮັບ​ໄປ​ຕະ­ຫຼອດ​ຈົນ​ຮອດ​ທ້າຍ​ເດືອນ​ຕຸ­ລາ 2018 ເຊິ່ງ​ສາ­ມາດ​ຮັບ​ນັກ­ຮຽນ​ໄດ້​ສົກ­ຮຽນ​ໜຶ່ງ​ປະ­ມານ 300 ຄົນ ພ້ອມ​ນີ້ ໂຮງ­ຮຽນ​ຍັງ​ມີ​ຫໍ​ພັກ​ນັກ­ຮຽນ ຮອງ​ຮັບ​ໄດ້ 150 ຄົນ ແລະ ຕໍ່­ໜ້າ​ໂຮງ­ຮຽນ​ແຫ່ງ​ນີ້​ຍັງ​ມີ​ແຜນ​ສ້າງ­ຕັ້ງ​ເປັນ​ສະ​ຖາ​ບັນ ຫຼື ມະ­ຫາ­ວິ­ທະ­ຍາ­ໄລ​ຍະ​ພາກ​ເອ­ກະ​ຊົນ ປະ­ລິນ­ຍາ​ຕີ ຕື່ມ​ອີກ.

ຂ່າວທີ່ກ່ຽວຂ້ອງ