ສະຫຼອງວັນລ້າງມືສາກົນ ມືສະອາດ ສຸຂະພາບແຂງແຮງ

118 23 ຕ.ລ. 2018 ຂ່າວໜ້າ​ໜຶ່ງ
ສະຫຼອງວັນລ້າງມືສາກົນ ມືສະອາດ ສຸຂະພາບແຂງແຮງ

    ເພື່ອ​ເປັນ​ການ​ເຜີຍ­ແຜ່​ຄວາມ​ຮູ້ ຄວາມ​ເຂົ້າ­ໃຈ​ກ່ຽວ​ກັບ​ຄວາມ​ສຳ­ຄັນ​ຂອງ​ການ​ລ້າງ​ມື​ໃສ່​ສະ­ບູ ເຊິ່ງ​ເປັນ​ວິ­ທີ​ປ້ອງ​ກັນ​ພະ­ຍາດ​ທີ່​ມີ​ປະ​ສິດ­ທິ​ຜົນ​ສູງ ແລະ ມີ­ຄ່າ​ໃຊ້​ຈ່າຍ​ບໍ່​ແພງ ສຳ­ລັບ​ຄຳ​ຂວັນ​ຂອງ​ວັນ​ລ້າງ​ມື​ສາ­ກົນ ປະ­ຈຳ​ປີ 2018 “ມື​ສະ­ອາດ ສຸ­ຂະ­ພາບ​ແຂງ­ແຮງ” ເຊິ່ງ​ໄດ້​ເນັ້ນ​ໃຫ້​ເຫັນ​ເຖິງ​ການ​ພົວ­ພັນ​ລະ­ຫວ່າງ​ການ​ລ້າງ​ມື ແລະ ອາ­ຫານ ການ​ລ້າງ​ມື​ໃສ່​ສະ­ບູ ເຮັດ​ໃຫ້​ອາ­ຫານ​ປອດ​ໄພ ປາ­ສະ­ຈາກ​ພະ­ຍາດ ແລະ ຊ່ວຍ​ໃຫ້​ເດັກ​ຈະ­ເລີນ​ເຕີບ​ໂຕ​ສົມ­ບູນ ພະ­ຍາດ​ຖອກ­ທ້ອງ​ຈະ​ຈຳ­ກັດ​ຄວາມ​ສາ­ມາດ​ຂອງ​ຮ່າງ­ກາຍ ໃນ​ການ​ດູດ​ຊຶມ​ສານ​ອາ­ຫານ ແລະ ເປັນ​ສາ­ເຫດ​ຕົ້ນ­ຕໍ​ຂອງ​ການ​ເສຍ​ຊີ­ວິດ​ໃນ​ຫຼາຍ​ປະ­ເທດ.

    ພິ­ທີ​ສະ­ເຫຼີມ­ສະ­ຫຼອງ​ໄດ້​ມີ​ຜູ້­ຕາງ­ໜ້າ​ຈາກ​ກະ­ຊວງ​ສຶກ​ສາ​ທິ​ການ ແລະ ກີ­ລາ ຂັ້ນ​ແຂວງ ແລະ ຂັ້ນ​ເມືອງ ເຂົ້າ​ຮ່ວມ​ໂດຍ​ມີ​ການ​ປະ­ສານ​ງານ​ກັບ​ຂະ­ແໜງ­ການ​ສາ­ທາ­ລະ­ນະ​ສຸກ ແລະ ຄູ່​ຮ່ວມ​ພັດ­ທະ­ນາ ເປັນ­ຕົ້ນ ໂຄງ­ການ​ສຸ­ຂະ­ພາບ​ດີ​ໃນ​ໂຮງ­ຮຽນ​ທີ່​ຈັດ​ຕັ້ງ​ປະ­ຕິ­ບັດ​ໂດຍ GIZ ອົງ­ການ​ຊີ​ເມວ​ອິນ​ໂນ​ເຕັກ ທີ່​ໄດ້​ຈັດ​ຂຶ້ນ​ວັນ​ທີ 15-17 ຕຸ­ລາ 2018 ຜ່ານ​ມາ​ທີ່​ໂຮງ­ຮຽນ​ປະ­ຖົມ​ສົມ­ບູນ​ທ່າ​ເດື່ອ ເມືອງ​ຫາດ​ຊາຍ​ຟອງ ໂຮງ­ຮຽນ​ປະ­ຖົມ​ນາ​ຊອນ ເມືອງ​ປາກ​ງື່ມ ແລະ ໂຮງ­ຮຽນ​ປະ­ຖົມ​ມີ​ໄຊ ເມືອງ​ຈັນ­ທະ​ບູ​ລີ.

    Fit for School ເປັນ​ໂຄງ­ການ​ໜຶ່ງ​ທີ່​ເນັ້ນ​ແກ້​ໄຂ​ບັນ­ຫາ​ດ້ວຍ​ວິ­ທີ​ລຽບ​ງ່າຍ ຜັນ​ຂະ­ຫຍາຍ​ໄດ້ ມີ​ຄວາມ​ຍືນ​ຍົງ ແລະ ເຊື່ອມ​ໂຍງ​ເຂົ້າ​ໃນ​ລະ­ບົບ​ການ​ສຶກ​ສາ ໂຄງ­ການ​ນີ້​ສົ່ງ­ເສີມ​ໃຫ້​ເດັກ­ນ້ອຍ​ຮັກ­ສາ​ສຸ­ຂະ­ພາບ ແລະ ປ່ຽນ­ແປງ​ພຶດ­ຕິ​ກຳ ໂດຍ​ຜ່ານ​ກິດ​ຈະ​ວັດ​ປະ­ຈຳ​ວັນ ເຊັ່ນ: ການ​ລ້າງ​ມື​ໃສ່​ສະ­ບູ​ເປັນ​ກຸ່ມ​ທຸກ​ວັນ ທ່ານ ອາ​ເລັກ​ຊັນ​ເດີ ວິງ​ຊາ ຜູ້​ປະ­ສານ​ງານ​ລະ­ດັບ​ພາກ​ພື້ນ​ຂອງ​ໂຄງ­ການ​ສຸ­ຂະ­ພາບ​ດີ​ໃນ​ໂຮງ­ຮຽນ ໄດ້​ກ່າວ​ວ່າ: “ຜົນ­ສຳ­ເລັດ​ອັນ​ຍິ່ງ​ໃຫຍ່​ມີ​ໂຮງ­ຮຽນ​ຫຼາຍ​ກວ່າ 2.000 ແຫ່ງ ໄດ້​ປັບ­ປຸງ​ຈັດ​ຕັ້ງ​ການ​ລ້າງ​ມື​ໃສ່​ສະ­ບູ​ທຸກ​ວັນ​ໄດ້ ກໍ່​ຍ້ອນ​ຄວາມ​ຕັດ­ສິນ​ໃຈ​ຂອງ​ອຳ­ນວຍ​ການ​ໂຮງ­ຮຽນ ຄູ-ອາ­ຈານ ການ​ນຳ​ກະ­ຊວງ​ສຶກ​ສາ ກະ­ຊວງ​ສາ​ທາ ແລະ ທຸກ​ພາກ­ສ່ວນ​ໃຫ້­ການ​ສະ­ໜັບ­ສະ­ໜູນ​ໂຮງ­ຮຽນ ກະ­ຊວງ​ສຶກ​ສາ​ໄດ້​ຈັດ​ຕັ້ງ​ປະ­ຕິ­ບັດ​ໂຄງ­ການ​ສຸ­ຂະ­ພາບ​ດີ​ໃນ​ໂຮງ­ຮຽນ ນັບ​ແຕ່​ປີ 2011 ແລະ ມາ​ຮອດ​ເດືອນ​ຕຸ­ລາ 2018 ມີ​ໂຮງ­ຮຽນ​ທີ່​ປະ­ຕິ­ບັດ​ກິດ­ຈະ­ກຳ​ລ້າງ​ມື ແລະ ຖູ­ແຂ້ວ​ເປັນ​ກຸ່ມ 2.000 ກວ່າ​ແຫ່ງ.

    GIZ ໃນ​ນາມ​ເປັນ​ສ່ວນ​ໜຶ່ງ​ຂອງ​ການ​ຮ່ວມ​ມື​ເຢຍ​ລະ​ມັນ ເພື່ອ​ການ​ພັດ­ທະ­ນາ​ໄດ້​ເຄື່ອນ​ໄຫວ​ວຽກ​ງານ​ຢູ່​ປະ­ເທດ​ລາວ​ຕັ້ງ­ແຕ່​ປີ 1993 ແລະ ປັດ­ຈຸ­ບັນ​ກຳ­ລັງ​ຈັດ​ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ໃນ​ສອງ​ຂົງ­ເຂດ​ບຸ­ລິ­ມະ­ສິດ ຄື: ການ​ພັດ­ທະ­ນາ​ຊົນ­ນະ­ບົດ ແລະ ການ​ຮ່ວມ​ມື​ດ້ານ​ເສດ­ຖະ­ກິດ ນອກ​ນີ້ ຍັງ​ຈັດ​ຕັ້ງ​ປະ­ຕິ­ບັດ​ໂຄງ­ການ​ກ່ຽວ​ກັບ​ການ​ປົກ­ຄອງ​ທີ່​ດີ ແລະ ເຂົ້າ​ຮ່ວມ​ໃນ​ໂຄງ­ການ​ລະ­ດັບ​ພາກ​ພື້ນ ຮ່ວມ​ກັບ​ຄະ­ນະ​ກຳ­ມາ​ທິ​ການ​ແມ່­ນ້ຳ​ຂອງ​ສາ­ກົນ.

ຂ່າວທີ່ກ່ຽວຂ້ອງ