Vietcombank ສ້າງຄວາມສະດວກໃຫ້ລູກຄ້າ ທີ່ດຳເນີນທຸລະກິດຢູ່ລາວ

145 23 ຕ.ລ. 2018 ຂ່າວໜ້າ​ໜຶ່ງ
Vietcombank ສ້າງຄວາມສະດວກໃຫ້ລູກຄ້າ ທີ່ດຳເນີນທຸລະກິດຢູ່ລາວ

    ທະ­ນາ­ຄານ​ຮຸ້ນ​ສ່ວນ​ການ​ຄ້າ​ຕ່າງ­ປະ­ເທດ​ຫວຽດ­ນາມ (Vietcombank) ໄດ້​ຂະ­ຫຍາຍ ແລະ ສ້າງ­ຕັ້ງ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ຫວຽດ­ນາມ ປະ­ຈຳ​ລາວ ຈຳ­ກັດ (VCB Laos) ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ການ​ພັດ­ທະ­ນາ ກໍ່​ຄື ການ​ເຕີບ​ໃຫຍ່​ຂະ­ຫຍາຍ­ຕົວ​ຂອງ​ນັກ​ລົງ­ທຶນ ສສ ຫວຽດ­ນາມ ທີ່​ນັບ​ມື້​ມີ​ການ​ລົງ­ທຶນ​ຢູ່ ສປປ ລາວ ສູງ​ຂຶ້ນ ເຊິ່ງ​ພິ­ທີ​ເປີດ​ທະ­ນາ­ຄານ​ດັ່ງ­ກ່າວ ຈັດ​ຂຶ້ນ​ວັນ​ທີ 19 ຕຸ­ລາ 2018 ຢູ່​ບ້ານ​ຫັດ­ສະ­ດີ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ສອນ​ໄຊ ສິດ​ພະ​ໄຊ ຮັກ­ສາ​ການ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ທ່ານ​ນາງ ຫງວ​ຽນ ທິ ຮົ່ງ ຮອງ​ຜູ້​ວ່າ­ການ​ທະ­ນາ­ຄານ​ແຫ່ງ​ລັດ ສສ ຫວຽດ­ນາມ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

    ທ່ານ ຝາມ ແມັງ ທັງ ຮອງ​ຜູ້­ອຳ­ນວຍ­ການ Vietcombank ປະ­ທານ​ສະ­ພາ​ບໍ­ລິ­ຫານ VCB Laos ກ່າວ​ວ່າ: ປັດ­ຈຸ­ບັນ Vietcombank ມີ​ສາ­ຂາ​ໜ່ວຍ​ບໍ­ລິ­ການ ຫ້ອງ­ການ​ຜູ້­ຕາງ­ໜ້າ ແລະ ຫົວ­ໜ່ວຍ​ສະ­ມາ­ຊິກ​ພາຍ​ໃນ ແລະ 131 ປະ­ເທດ​ທົ່ວ​ໂລກ ຫຼາຍ​ກວ່າ 500 ແຫ່ງ ການ­ເຄື່ອນ­ໄຫວ​ດຳ­ເນີນ​ງານ​ຂອງ​ທະ­ນາ­ຄານ​ໄດ້​ນຳ​ໃຊ້​ລະ­ບົບ Autobank ກັບ 2.500 ຕູ້​ເອ​ທີ​ເອັມ 47.000 ກວ່າ​ສະ­ຖາ­ນີ​ທີ່​ສາ­ມາດ​ຮອງ​ຮັບ​ບັດ (POS) ຫຼາຍ​ກວ່າ 2.105 ທະ­ນາ­ຄານ​ຕົວ​ແທນ​ລວມ​ທັງ ສປປ ລາວ.

    ການ​ເປີດ VCB Laos ຄັ້ງ​ນີ້ ເປັນ​ການ​ປະ­ກອບ­ສ່ວນ​ສ້າງ​ຄວາມ​ເຂັ້ມ­ແຂງ ແລະ ພັດ­ທະ­ນາ​ເສດ­ຖະ­ກິດ-ສັງ­ຄົມ​ຢູ່ ສປປ ລາວ ໂດຍ​ສະ­ເພາະ ອຳ­ນວຍ​ຄວາມ​ສະ­ດວກ​ໃຫ້​ນັກ​ລົງ­ທຶນ​ທີ່​ມາ​ລົງ­ທຶນ​ຢູ່​ລາວ ໃຫ້​ເຂົາ­ເຈົ້າ​ສາ­ມາດ​ເຂົ້າ​ເຖິງ​ແຫຼ່ງ​ເງິນ​ທຶນ​ໄດ້​ງ່າຍ ແລະ ວ່ອງ­ໄວ​ຂຶ້ນ Vietcombank ໄດ້​ສ້າງ​ແຜນ​ປັບ­ປຸງ​ໂຄງ​ສ້າງ​ຮອດ​ປີ 2020 ເຊິ່ງ​ໄດ້​ຮັບ​ການ​ເຫັນ​ດີ​ຈາກ​ຜູ້​ວ່າ­ການ​ທະ­ນາ­ຄານ​ແຫ່ງ​ລັດ ສສ ຫວຽດ­ນາມ ແລະ ເຊື່ອ​ໝັ້ນ​ວ່າ Vietcombank ຈະ​ກາຍ­ເປັນ​ອັນ​ດັບ​ໜຶ່ງ​ຢູ່ ສສ ຫວຽດ­ນາມ ເປັນ​ໜຶ່ງ​ໃນ 100 ທະ­ນາ­ຄານ​ໃນ​ຂົງ­ເຂດ​ພາກ​ພື້ນ ເປັນ​ໜຶ່ງ​ໃນ 300 ສະ​ຖາ​ບັນ​ການ​ເງິນ ທີ່​ໃຫ້­ການ​ບໍ­ລິ­ການ​ດ້ານ​ການ​ທະ­ນາ­ຄານ​ທີ່​ໃຫຍ່​ທີ່​ສຸດ​ຂອງ​ໂລກ ແລະ ຄຸ້ມ​ຄອງ​ດ້ວຍ​ມາດ­ຕະ­ຖານ​ສາ­ກົນ​ທີ່​ດີ​ທີ່​ສຸດ.

ຂ່າວທີ່ກ່ຽວຂ້ອງ