ທຸກພາກສ່ວນໃນສັງຄົມ ມີສ່ວນຮ່ວມພັດທະນາຊາວໜຸ່ມ

107 23 ຕ.ລ. 2018 ຂ່າວໜ້າ​ໜຶ່ງ

    ອົງ­ການ​ສະ­ຫະ​ປະ­ຊາ​ຊາດ ແລະ ກະ­ຊວງ​ການ​ຕ່າງ­ປະ­ເທດ ຮ່ວມ​ກັບ​ສູນ​ກາງ​ຊາວ​ໜຸ່ມ ປະ­ຊາ­ຊົນ​ປະ­ຕິ­ວັດ​ລາວ ຮ່ວມ​ກັນ​ຈັດ​ງານ​ສະ­ເຫຼີມ­ສະ­ຫຼອງ​ວັນ​ສະ­ຫະ​ປະ­ຊາ​ຊາດ ຄົບ­ຮອບ 73 ປີ ຂຶ້ນ​ວັນ​ທີ 19 ຕຸ­ລາ 2018 ທີ່​ສູນ​ກາງ​ຊາວ​ໜຸ່ມ ມີ​ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ທ່ານ​ນາງ ຄາ​ຣິ​ນາ ອີມ​ໂມ​ເນັນ ຜູ້​ປະ­ສານ​ງານ​ຂອງ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ​ປະ­ຈຳ​ລາວ ພ້ອມ​ດ້ວຍ​ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດ­ຖະ­ມົນ­ຕີ ກະ­ຊວງ​ການ​ຕ່າງ­ປະ­ເທດ ຜູ້­ຕາງ­ໜ້າ​ຈາກ​ກະ­ຊວງ ກົມ​ກອງ ພະ­ແນກ­ການ ແລະ ນັກ­ຮຽນ-ນັກ​ສຶກ​ສາ​ຈາກ​ສະ​ຖາ​ບັນ​ການ​ສຶກ​ສາ​ອ້ອມ​ຂ້າງ​ສູນ​ກາງ​ຊາວ​ໜຸ່ມ​ເຂົ້າ​ຮ່ວມ.

    ທ່ານ ອາ​ລຸນ​ໄຊ ສູນ​ນະ­ລາດ ກ່າວ​ວ່າ: ຮູ້­ສຶກ​ຍິນ​ດີ​ທີ່​ກະ­ຊວງ​ການ​ຕ່າງ­ປະ­ເທດ ແລະ ອົງ­ການ​ສະ­ຫະ​ປະ­ຊາ​ຊາດ ເຫັນ​ຄວາມ​ສຳ­ຄັນ ແລະ ເອົາ­ໃຈ­ໃສ່​ອົງ​ການ­ຈັດ­ຕັ້ງ​ຊາວ​ໜຸ່ມ​ມາ​ໂດຍ​ຕະ­ຫຼອດ ຜ່ານ​ມາ ສູນ​ກາງ​ຊາວ​ໜຸ່ມ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ ອົງ­ການ​ສະ­ຫະ​ປະ­ຊາ​ຊາດ​ປະ­ຈຳ​ລາວ ໃນ​ການ​ເຮັດ​ກິດ­ຈະ­ກຳ​ກ່ຽວ​ກັບ​ຊາວ​ໜຸ່ມ​ມາ​ໂດຍ​ຕະ­ຫຼອດ ເຊັ່ນ​ດຽວ​ກັບ​ຄັ້ງ​ນີ້ ຄະ­ນະ​ຊາວ​ໜຸ່ມ ໄດ້​ມີ​ໂອ­ກາດ​ຮ່ວມ​ກັບ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ປູກ​ຈິດ​ສຳ­ນຶກ​ເສີມ​ສ້າງ​ຄວາມ​ສາ­ມາດ​ໃຫ້​ຊາວ​ໜຸ່ມ ໃນ​ໂອ­ກາດ​ວັນ​ສະ­ຫະ​ປະ­ຊາ​ຊາດ ຄົບ­ຮອບ 73 ປີ ໄດ້​ຈັດ​ກິດ­ຈະ­ກຳ​ສ້າງ​ຄວາມ​ຮູ້​ດ້ານ​ຂໍ້​ມູນ​ຂ່າວ­ສານ​ດ້ານ​ສຸ­ຂະ­ພາບ ສິ່ງ­ແວ­ດລ້ອມ ການ​ດຳ­ລົງ​ຊີ­ວິດ​ທີ່​ດີ ປັດ­ຈຸ­ບັນ​ມີ​ຫຼາຍ​ຢ່າງ​ມີ​ການ​ປ່ຽນ­ແປງ​ສະ­ພາບ​ດິນ​ຟ້າ​ອາ­ກາດ ເສດ­ຖະ­ກິດ-ສັງ­ຄົມ ເຊິ່ງ​ຊາວ​ໜຸ່ມ​ເຮົາ​ຈະ​ຕ້ອງ​ໄດ້​ສຶກ​ສາ​ຮຽນ​ຮູ້ ສະ­ພາບ​ອ້ອມ​ຕົວ​ໃນ​ເງື່ອນ­ໄຂ​ທີ່​ໂລກ​ມີ​ຂະ​ບວນ​ວິ­ວັດ ຈິນ­ຕະ­ນາ­ການ​ໄປ​ໄກ ເພື່ອ​ການ​ພັດ­ທະ­ນາ​ທີ່​ຍືນ​ຍົງ.

    ສະ­ເພາະ​ການ​ສະ­ເຫຼີມ­ສະ­ຫຼອງ​ຄັ້ງ​ນີ້ ເນັ້ນ​ໃສ່​ການ​ເສີມ​ສ້າງ​ຄວາມ​ຮູ້​ຄວາມ​ສາ­ມາດ ສະ­ໜອງ​ຂໍ້​ມູນ​ຂ່າວ­ສານ​ດ້ານ​ສິ່ງ­ແວ­ດລ້ອມ ສຸ­ຂະ­ພາບ ດ້ານ​ໂພ​ສະ​ນາ​ການ ການ​ຮັກ­ສາ​ສິ່ງ­ແວ­ດລ້ອມ ວິ­ຖີ​ຊີ­ວິດ​ທີ່​ຖືກ­ຕ້ອງ ນອກ​ນັ້ນ ການ​ຈັດ​ງານ​ຍັງ​ມີ​ກິດ­ຈະ­ກຳ​ແຂ່ງ­ຂັນ​ແຕ່ງ­ອາ­ຫານ ແລະ ຊົມ​ການ­ສະ­ແດງ​ສິ­ລະ​ປະ​ຈາກ​ຊາວ​ໜຸ່ມ ວາງ­ສະ­ແດງ​ຮູບ​ພາບ ວຽກ​ງານ​ໂພ​ສະ​ນາ​ການ​ທາງ​ດ້ານ​ອາ­ຫານ ວຽກ​ງານ​ຈະ­ເລີນ​ພັນ ສຳ​ມະ​ນາ​ໃນ​ຫົວ­ຂໍ້​ຕ່າງໆ ໂອ­ກາດ​ນີ້ ຮຽກ­ຮ້ອງ​ມາ​ຍັງ​ທຸກ​ພາກ­ສ່ວນ​ໃນ​ສັງ­ຄົມ​ມີ​ສ່ວນ​ຮ່ວມ​ໃນ​ການ​ຊ່ວຍ­ເຫຼືອ ແລະ ພັດ­ທະ­ນາ​ຊາວ​ໜຸ່ມ​ໃນ 5 ຈຸດ​ສຸມ ການ​ສຶກ​ສາ ສາ­ທາ­ລະ­ນະ​ສຸກ ວຽກ​ເຮັດ​ງານ​ທຳ ການ​ມີ​ສ່ວນ​ຮ່ວມ ແລະ ການ​ປົກ​ປ້ອງ​ສິດ­ຜົນ­ປະ­ໂຫຍດ​ຂອງ​ຊາວ​ໜຸ່ມ.

ຂ່າວທີ່ກ່ຽວຂ້ອງ