ຊ່ວງເຮືອປະຈຳປີ 2018 ຈະຈັດຂຶ້ນຢູ່ທ່າວັດຈັນ ແລະ ຕໍ່ໜ້າໂຮງແຮມແລນມາກ

222 23 ຕ.ລ. 2018 ຂ່າວໜ້າ​ໜຶ່ງ
ຊ່ວງເຮືອປະຈຳປີ 2018 ຈະຈັດຂຶ້ນຢູ່ທ່າວັດຈັນ ແລະ ຕໍ່ໜ້າໂຮງແຮມແລນມາກ

    ອີງ­ໃສ່​ສະ­ພາບ​ນ້ຳ­ຂອງ​ຢູ່​ຈຸດ​ທ່າ​ວັດ​ຈັນ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ມີ​ການ​ປ່ຽນ­ແປງ​ເລື້ອຍໆ ບາງ​ປີ​ກໍ່​ມີ​ຫຼາຍ-ບາງ​ປີ​ກໍ່​ມີ​ໜ້ອຍ ເຮັດ​ໃຫ້​ຕື້ນ​ເຂີນ ບໍ່​ສາ­ມາດ​ຊ່ວງ​ເຮືອ​ໄດ້ ໂດຍ​ສະ­ເພາະ ເຮືອ​ຂະ­ໜາດ​ໃຫຍ່ 55 ສີ­ພາຍ ແຕ່​ບຸນ­ຊ່ວງ­ເຮືອ​ທ່າ​ວັດ​ຈັນ​ຕ້ອງ​ໄດ້​ຈັດ​ຂຶ້ນ​ທຸກໆ​ປີ ຕາມ​ຮີດ­ຄອງ​ປະ­ເພ­ນີ​ທີ່​ເຄີຍ​ປະ­ຕິ­ບັດ​ກັນ​ມາ​ຫຼາຍ­ເຊັ່ນ­ຄົນ ຫຼາຍ​ປີ­ຜ່ານ­ມາ​ໄດ້​ຈັດ​ຢູ່​ທ່າ​ວັດ​ຈັນ​ຕໍ່­ໜ້າ​ສາມ​ແຍກ​ປາກ​ປ່າ​ສັກ ປີ 2016 ໄດ້​ຍ້າຍ​ຈາກ​ບ່ອນ​ທ່າ​ວັດ​ຈັນ ໄປ​ຈັດ​ຢູ່​ເຂດ​ບ້ານ​ສີ​ຖານ​ເໝືອ ເມືອງ​ສີ​ໂຄດ​ຕະ­ບອງ ປີ 2017 ໄດ້​ຈັດ​ຢູ່​ທ່າ​ວັດ​ຈັນ​ຈຸດ​ເກົ່າ ສ່ວນ​ປີ 2018 ຈະ​ໄດ້​ຈັດ​ຢູ່​ສອງ​ຈຸດ ຄື: ຈຸດ​ທ່າ​ວັດ​ຈັນ ແມ່ນ​ຈະ​ຈັດ​ຊ່ວງ​ເຮືອ​ປະ­ເພດ 12 ສີ­ພາຍ ສ່ວນ​ເຮືອ​ສູດ​ປະ­ເພດ 55 ສີ­ພາຍ ຈະ​ຈັດ​ຢູ່​ຕໍ່­ໜ້າ​ໂຮງ­ແຮມ​ແລນ​ມາກ​ແມ່​ຂອງ​ຣີ​ເວີ​ໄຊ ເມືອງ​ສີ​ສັດ­ຕະ​ນາກ.

    ວັນ​ທີ 22 ຕຸ­ລາ 2018 ຢູ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ຄະ­ນະ​ຮັບ­ຜິດ­ຊອບ​ຊີ້​ນຳ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ທ່າ​ວັດ​ຈັນ ປະ­ຈຳ​ປີ 2018 ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກະ­ກຽມ​ບຸນ​ດັ່ງ­ກ່າວ​ຂຶ້ນ ໂດຍ​ເປັນ​ປະ­ທານ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ມີ​ເຈົ້າ­ເມືອງ ຮອງ​ເຈົ້າ­ເມືອງ​ຈັນ­ທະ​ບູ​ລີ ສີ​ໂຄດ​ຕະ­ບອງ ແລະ ສີ​ສັດ­ຕະ​ນາກ ພ້ອມ​ດ້ວຍ​ຄະ­ນະ​ກຳ­ມະ­ການ​ຈັດ​ງານ​ດັ່ງ­ກ່າວ​ເຂົ້າ​ຮ່ວມ.

    ເພື່ອ​ເຮັດ​ໃຫ້­ການ​ຈັດ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ທ່າ​ວັດ​ຈັນ ທີ່​ຈະ​ຈັດ​ຂຶ້ນ​ວັນ​ທີ 24-25 ຕຸ­ລາ 2018 ມີ​ຄວາມ​ຮັບ­ປະ­ກັນ​ໄດ້​ຄວາມ​ສະ­ຫງົບ ປອດ​ໄພ ແລະ ເປັນ​ລະ­ບຽບ​ຮຽບ​ຮ້ອຍ ກອງ​ປະ­ຊຸມ​ໄດ້​ປຶກ­ສາ​ຫາ­ລື​ກັນ​ຫຼາຍ​ບັນ­ຫາ ເປັນ­ຕົ້ນ ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ສິ­ລະ​ປະ​ການ­ສະ­ແດງ ໄຟ­ຟ້າ ຄວາມ​ສະ­ອາດ ສະ­ຖານ­ທີ່​ຈອດ​ລົດ​ການ​ນຳ ແລະ ອື່ນໆ ສຳ­ລັບ​ກິດ­ຈະ­ກຳ​ຊ່ວງ​ເຮືອ​ຈັດ​ຂຶ້ນ 2 ວັນ ຄື: ວັນ​ທີ 24 ຕຸ­ລາ ຢູ່​ທ່າ​ວັດ​ຈັນ ແຂ່ງ­ຂັນ​ເຮືອ​ກີ­ລາ​ປະ­ເພດ 12 ສີ­ພາຍ ມີ​ເຮືອ​ເຂົ້າ​ຮ່ວມ 8 ລຳ ວັນ​ທີ 25 ຕຸ­ລາ ຢູ່​ຕໍ່­ໜ້າ​ໂຮງ­ແຮມ​ແລນ​ມາກ​ແມ່​ຂອງ​ຣີ​ເວີ​ໄຊ ແຂ່ງ­ຂັນ​ປະ­ເພດ​ເຮືອ 55 ສີ­ພາຍ ມີ​ເຮືອ​ເຂົ້າ​ຮ່ວມ 17 ລຳ ໃນ​ນີ້ ເຮືອ​ສູດ​ຊາຍ 5 ລຳ ເຮືອ​ປະ­ເພ­ນີ​ຍິງ 5 ລຳ ແລະ ເຮືອ​ປະ­ເພ­ນີ​ຊາຍ 7 ລຳ ການ​ແຂ່ງ­ຂັນ​ເລີ່ມ​ເວ­ລາ 9-16:00 ໂມງ ດັ່ງ­ນັ້ນ ຂໍ​ເຊີນ­ຊວນ​ປະ­ຊາ­ຊົນ ແຂກ​ພາຍ​ໃນ ແລະ ຕ່າງ­ປະ­ເທດ ມາ​ທ່ຽວ​ຊົມ​ງານ​ບຸນ​ດັ່ງ­ກ່າວ ໃຫ້​ມີ​ຄວາມ​ຄຶກ­ຄື້ນ​ມ່ວນ­ຊື່ນ ແລະ ຮັບ­ປະ­ກັນ​ໄດ້​ຮີດ­ຄອງ​ປະ­ເພ­ນີ​ອັນ​ດີ­ງາມ ມີ​ຄວາມ​ສະ­ຫງົບ​ປອດ​ໄພ.

ຂ່າວທີ່ກ່ຽວຂ້ອງ