ມູນນິທິເບົາຫວານໂລກ ໃຫ້ທຶນ 1,23 ຕື້ກີບ ຄຸ້ມຄອງພະຍາດເບົາຫວານຢູ່ລາວ

343 24 ຕ.ລ. 2018 ຂ່າວໜ້າ​ໜຶ່ງ
ມູນນິທິເບົາຫວານໂລກ ໃຫ້ທຶນ 1,23 ຕື້ກີບ ຄຸ້ມຄອງພະຍາດເບົາຫວານຢູ່ລາວ

    ເພື່ອ​ພັດ­ທະ­ນາ​ຄູ່​ມື​ແຫ່ງ​ຊາດ ກ່ຽວ​ກັບ​ການ​ຄຸ້ມ​ຄອງ​ພະ­ຍາດ​ເບົາ­ຫວານ​ປະ­ເພດ​ສອງ ພະ­ຍາດ​ເບົາ­ຫວານ​ໃນ​ແມ່­ຍິງ​ຖື­ພາ ແລະ ພະ­ຍາດ​ຄວາມ­ດັນ­ເລືອດ­ສູງ ໂດຍ​ມີ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ​ເລີ່ມ​ແຕ່​ມື້​ອະ­ນຸ­ມັດ ເຖິງ​ວັນ​ທີ 31 ມິ­ຖຸ­ນາ 2019 ໃນ​ນີ້ ມີ​ກິດ­ຈະ­ກຳ​ຈັດ​ກອງ​ປະ­ຊຸມ​ວິ­ຊາ​ການ​ໃນ​ການ​ພັດ­ທະ­ນາ​ຄູ່​ມື​ການ​ເຝິກ­ອົບ­ຮົມ ຈັດ​ພິມ​ປຶ້ມ​ຄູ່​ມື ກຳ­ນົດ​ຄູ່​ມື​ກວດ­ກາ​ຄຸ­ນະ­ພາບ ລວມ​ມີ​ຊຸດ​ລາຍ­ການ​ກວດ​ຮັບ­ປະ­ກັນ​ຄຸ­ນະ­ພາບ ກອງ​ປະ­ຊຸມ​ປະ­ຈຳ​ປີ ແລະ ກິດ­ຈະ­ກຳ​ວັນ​ເບົາ­ຫວານ​ໂລກ ງົບ­ປະ­ມານ 150.000 ໂດ​ລາ​ສະ­ຫະ­ລັດ ຫຼື ປະ­ມານ 1,23 ຕື້​ກີບ ໂດຍ​ການ​ສະ­ໜັບ­ສະ­ໜູນ​ຈາກ​ມູນ​ນິ­ທິ​ເບົາ­ຫວານ​ໂລກ ນອກ​ນີ້​ຍັງ​ໄດ້​ຈັດ​ຊື້​ອຸ­ປະ­ກອນ​ທີ່​ຈຳ­ເປັນ ຄື: ຄອມ​ພິວ​ເຕີ 5 ໜ່ວຍ ອຸ­ປະ­ກອນ​ການ​ແພດ ເປັນ­ຕົ້ນ ເຄື່ອງ​ຕິດ­ຕາມ​ນ້ຳ­ຕານ​ໃນ​ເລືອດ 4 ເຄື່ອງ ເຄື່ອງ​ສ່ອງ​ຕາ 4 ເຄື່ອງ ແລະ ຊຸດ​ກວດ​ລະ­ດັບ​ນ້ຳ­ຕານ​ໃນ​ເລືອດ 4 ຊຸດ.

    ສຳ­ລັບ​ຜູ້​ທີ່​ຈະ​ໄດ້​ຮັບ​ຜົນ​ປະ­ໂຫຍດ​ໂດຍ​ກົງ​ຈາກ​ວຽກ​ງານ​ດັ່ງ­ກ່າວ ແມ່ນ​ທ່ານ­ໝໍ​ທີ່​ໃຫ້­ການ​ບໍ­ລິ­ການ​ປະ­ຊາ­ຊົນ ກ່ຽວ​ກັບ​ການ​ຄຸ້ມ​ຄອງ​ພະ­ຍາດ​ເບົາ­ຫວານ​ປະ­ເພດ​ສອງ ພະ­ຍາດ​ເບົາ­ຫວານ​ໃນ​ແມ່­ຍິງ​ຖື­ພາ ແລະ ຄວາມ­ດັນ­ເລືອດ­ສູງ.

    ພິ­ທີ​ລົງ​ນາມ​ບົດ​ບັນ­ທຶກ​ຂໍ້​ຕົກ­ລົງ​ກ່ຽວ​ກັບ​ກິດ­ຈະ­ກຳ​ການ​ສ້າງ​ຄວາມ​ເຂັ້ມ­ແຂງ​ໃຫ້​ພາກ​ລັດ ສຳ­ລັບ​ການ​ຄຸ້ມ​ຄອງ​ພະ­ຍາດ​ເບົາ­ຫວານ​ໃນ ສປປ ລາວ ຈັດ​ຂຶ້ນ​ວັນ​ທີ 23 ຕຸ­ລາ 2018 ຢູ່​ກະ­ຊວງ​ສາ­ທາ­ລະ­ນະ​ສຸກ ລະ­ຫວ່າງ​ທ່ານ ບຸນ​ໜັກ ໄຊ­ຊະ­ນະ​ສົງ­ຄາມ ຫົວ­ໜ້າ​ກົມ​ປິ່ນ­ປົວ ແລະ ຟື້ນ​ຟູ​ໜ້າ­ທີ່​ການ ກະ­ຊວງ​ສາ­ທາ­ລະ­ນະ​ສຸກ ແລະ ທ່ານ Eric Seastedt ຜູ້­ຕາງ­ໜ້າ​ອົງ­ການ​ສາ­ກົນ​ບໍ­ລິ­ການ​ປະ­ຊາ­ຊົນ ປະ­ຈຳ​ລາວ (PSI) ມີ​ຫົວ­ໜ້າ-ຮອງ​ຫົວ­ໜ້າ​ຫ້ອງ­ການ​ກະ­ຊວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ